14. අන්තෙවාසිකවත්තකථා

381. තෙන ඛො පන සමයෙන ආචරියා අන්තෙවාසිකෙසු න සම්මා වත්තන්ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ආචරියා අන්තෙවාසිකෙසු න සම්මා වත්තිස්සන්තී’’ති! අථ ඛො තෙ භික්ඛූ භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා භික්ඛූ පටිපුච්ඡි – ‘‘සච්චං කිර, භික්ඛවෙ, ආචරියා අන්තෙවාසිකෙසු න සම්මා වත්තන්තී’’ති? ‘‘සච්චං භගවා’’ති…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි –

382. ‘‘තෙන හි, භික්ඛවෙ, ආචරියානං අන්තෙවාසිකෙසු වත්තං පඤ්ඤපෙස්සාමි යථා ආචරියෙහි අන්තෙවාසිකෙසු සම්මා වත්තිතබ්බං. [මහාව. 79] ආචරියෙන, භික්ඛවෙ, අන්තෙවාසිකම්හි සම්මා වත්තිතබ්බං. තත්‍රායං සම්මාවත්තනා –

‘‘ආචරියෙන, භික්ඛවෙ, අන්තෙවාසිකො සඞ්ගහෙතබ්බො අනුග්ගහෙතබ්බො උද්දෙසෙන පරිපුච්ඡාය ඔවාදෙන අනුසාසනියා. සචෙ ආචරියස්ස පත්තො හොති, අන්තෙවාසිකස්ස පත්තො න හොති, ආචරියෙන අන්තෙවාසිකස්ස පත්තො දාතබ්බො, උස්සුක්කං වා කාතබ්බං – කින්ති නු ඛො අන්තෙවාසිකස්ස පත්තො උප්පජ්ජියෙථාති. සචෙ ආචරියස්ස චීවරං හොති, අන්තෙවාසිකස්ස චීවරං න හොති, ආචරියෙන අන්තෙවාසිකස්ස චීවරං දාතබ්බං, උස්සුක්කං වා කාතබ්බං – කින්ති නු ඛො අන්තෙවාසිකස්ස චීවරං උප්පජ්ජියෙථාති. සචෙ ආචරියස්ස පරික්ඛාරො හොති, අන්තෙවාසිකස්ස පරික්ඛාරො න හොති, ආචරියෙන අන්තෙවාසිකස්ස පරික්ඛාරො දාතබ්බො, උස්සුක්කං වා කාතබ්බං – කින්ති නු ඛො අන්තෙවාසිකස්ස පරික්ඛාරො උප්පජ්ජියෙථාති.

‘‘සචෙ අන්තෙවාසිකො ගිලානො හොති, කාලස්සෙව උට්ඨාය දන්තකට්ඨං දාතබ්බං, මුඛොදකං දාතබ්බං, ආසනං පඤ්ඤපෙතබ්බං. සචෙ යාගු හොති, භාජනං ධොවිත්වා යාගු උපනාමෙතබ්බා. යාගුං පීතස්ස උදකං දත්වා භාජනං පටිග්ගහෙත්වා නීචං කත්වා සාධුකං අප්පටිඝංසන්තෙන ධොවිත්වා පටිසාමෙතබ්බං. අන්තෙවාසිකම්හි වුට්ඨිතෙ ආසනං උද්ධරිතබ්බං. සචෙ සො දෙසො උක්ලාපො හොති, සො දෙසො සම්මජ්ජිතබ්බො.

‘‘සචෙ අන්තෙවාසිකො ගාමං පවිසිතුකාමො හොති, නිවාසනං දාතබ්බං, පටිනිවාසනං පටිග්ගහෙතබ්බං, කායබන්ධනං දාතබ්බං, සගුණං කත්වා සඞ්ඝාටියො දාතබ්බා, ධොවිත්වා පත්තො සොදකො දාතබ්බො.

‘‘එත්තාවතා නිවත්තිස්සතීති ආසනං පඤ්ඤපෙතබ්බං, පාදොදකං පාදපීඨං පාදකථලිකං උපනික්ඛිපිතබ්බං, පච්චුග්ගන්ත්වා පත්තචීවරං පටිග්ගහෙතබ්බං, පටිනිවාසනං දාතබ්බං, නිවාසනං පටිග්ගහෙතබ්බං. සචෙ චීවරං සින්නං හොති, මුහුත්තං උණ්හෙ ඔතාපෙතබ්බං, න ච උණ්හෙ චීවරං නිදහිතබ්බං. චීවරං සඞ්ඝරිතබ්බං. චීවරං සඞ්ඝරන්තෙන චතුරඞ්ගුලං කණ්ණං උස්සාරෙත්වා චීවරං සඞ්ඝරිතබ්බං – මා මජ්ඣෙ භඞ්ගො අහොසීති. ඔභොගෙ කායබන්ධනං කාතබ්බං.

‘‘සචෙ පිණ්ඩපාතො හොති, අන්තෙවාසිකො ච භුඤ්ජිතුකාමො හොති, උදකං දත්වා පිණ්ඩපාතො උපනාමෙතබ්බො. අන්තෙවාසිකො පානීයෙන පුච්ඡිතබ්බො. භුත්තාවිස්ස උදකං දත්වා පත්තං පටිග්ගහෙත්වා නීචං කත්වා සාධුකං අප්පටිඝංසන්තෙන ධොවිත්වා වොදකං කත්වා මුහුත්තං උණ්හෙ ඔතාපෙතබ්බො, න ච උණ්හෙ පත්තො නිදහිතබ්බො. පත්තචීවරං නික්ඛිපිතබ්බං. පත්තං නික්ඛිපන්තෙන…පෙ… චීවරං නික්ඛිපන්තෙන…පෙ… පාරතො අන්තං ඔරතො භොගං කත්වා චීවරං නික්ඛිපිතබ්බං. අන්තෙවාසිකම්හි උට්ඨිතෙ ආසනං උද්ධරිතබ්බං, පාදොදකං පාදපීඨං පාදකථලිකං පටිසාමෙතබ්බං. සචෙ සො දෙසො උක්ලාපො හොති, සො දෙසො සම්මජ්ජිතබ්බො.

‘‘සචෙ අන්තෙවාසිකො නහායිතුකාමො හොති, නහානං පටියාදෙතබ්බං. සචෙ සීතෙන අත්ථො හොති, සීතං පටියාදෙතබ්බං. සචෙ උණ්හෙන අත්ථො හොති, උණ්හං පටියාදෙතබ්බං.

‘‘සචෙ අන්තෙවාසිකො ජන්තාඝරං පවිසිතුකාමො හොති, චුණ්ණං සන්නෙතබ්බං, මත්තිකා තෙමෙතබ්බා, ජන්තාඝරපීඨං ආදාය [ආදාය අන්තෙවාසිකස්ස පිට්ඨිතො පිට්ඨිතො (ක.)] ගන්ත්වා ජන්තාඝරපීඨං දත්වා චීවරං පටිග්ගහෙත්වා එකමන්තං නික්ඛිපිතබ්බං, චුණ්ණං දාතබ්බං, මත්තිකා දාතබ්බා. සචෙ උස්සහති ජන්තාඝරං පවිසිතබ්බං. ජන්තාඝරං පවිසන්තෙන මත්තිකාය මුඛං මක්ඛෙත්වා පුරතො ච පච්ඡතො ච පටිච්ඡාදෙත්වා ජන්තාඝරං පවිසිතබ්බං. න ථෙරෙ භික්ඛූ අනුපඛජ්ජ නිසීදිතබ්බං. න නවා භික්ඛූ ආසනෙන පටිබාහිතබ්බා. ජන්තාඝරෙ අන්තෙවාසිකස්ස පරිකම්මං කාතබ්බං. ජන්තාඝරා නික්ඛමන්තෙන ජන්තාඝරපීඨං ආදාය පුරතො ච පච්ඡතො ච පටිච්ඡාදෙත්වා ජන්තාඝරා නික්ඛමිතබ්බං.

‘‘උදකෙපි අන්තෙවාසිකස්ස පරිකම්මං කාතබ්බං. නහාතෙන පඨමතරං උත්තරිත්වා අත්තනො ගත්තං වොදකං කත්වා නිවාසෙත්වා අන්තෙවාසිකස්ස ගත්තතො උදකං පමජ්ජිතබ්බං, නිවාසනං දාතබ්බං, සඞ්ඝාටි දාතබ්බා, ජන්තාඝරපීඨං ආදාය පඨමතරං ආගන්ත්වා ආසනං පඤ්ඤපෙතබ්බං, පාදොදකං පාදපීඨං පාදකථලිකං උපනික්ඛිපිතබ්බං, අන්තෙවාසිකො පානීයෙන පුච්ඡිතබ්බො.

‘‘යස්මිං විහාරෙ අන්තෙවාසිකො විහරති, සචෙ සො විහාරො උක්ලාපො හොති, සචෙ උස්සහති, සොධෙතබ්බො. විහාරං සොධෙන්තෙන පඨමං පත්තචීවරං නීහරිත්වා එකමන්තං නික්ඛිපිතබ්බං…පෙ… ආචමනකුම්භියා උදකං න හොති, ආචමනකුම්භියා උදකං ආසිඤ්චිතබ්බං.

‘‘සචෙ අන්තෙවාසිකස්ස අනභිරති උප්පන්නා හොති, ආචරියෙන වූපකාසෙතබ්බො, වූපකාසාපෙතබ්බො, ධම්මකථා වාස්ස කාතබ්බා. සචෙ අන්තෙවාසිකස්ස කුක්කුච්චං උප්පන්නං හොති, ආචරියෙන විනොදෙතබ්බං, විනොදාපෙතබ්බං, ධම්මකථා වාස්ස කාතබ්බා. සචෙ අන්තෙවාසිකස්ස දිට්ඨිගතං උප්පන්නං හොති, ආචරියෙන විවෙචෙතබ්බං, විවෙචාපෙතබ්බං, ධම්මකථා වාස්ස කාතබ්බා. සචෙ අන්තෙවාසිකො ගරුධම්මං අජ්ඣාපන්නො හොති, පරිවාසාරහො, ආචරියෙන උස්සුක්කං කාතබ්බං – කින්ති නු ඛො සඞ්ඝො අන්තෙවාසිකස්ස පරිවාසං දදෙය්‍යාති. සචෙ අන්තෙවාසිකො මූලායපටිකස්සනාරහො හොති, ආචරියෙන උස්සුක්කං කාතබ්බං – කින්ති නු ඛො සඞ්ඝො අන්තෙවාසිකං මූලාය පටිකස්සෙය්‍යාති. සචෙ අන්තෙවාසිකො මානත්තාරහො හොති, ආචරියෙන උස්සුක්කං කාතබ්බං – කින්ති නු ඛො සඞ්ඝො අන්තෙවාසිකස්ස මානත්තං දදෙය්‍යාති. සචෙ අන්තෙවාසිකො අබ්භානාරහො හොති, ආචරියෙන උස්සුක්කං කාතබ්බං – කින්ති නු ඛො සඞ්ඝො අන්තෙවාසිකං අබ්භෙය්‍යාති. සචෙ සඞ්ඝො අන්තෙවාසිකස්ස කම්මං කත්තුකාමො හොති, තජ්ජනීයං වා නියස්සං වා පබ්බාජනීයං වා පටිසාරණීයං වා උක්ඛෙපනීයං වා, ආචරියෙන උස්සුක්කං කාතබ්බං – කින්ති නු ඛො සඞ්ඝො අන්තෙවාසිකස්ස කම්මං න කරෙය්‍ය, ලහුකාය වා පරිණාමෙය්‍යාති. කතං වා පනස්ස හොති, සඞ්ඝෙන කම්මං, තජ්ජනීයං වා නියස්සං වා පබ්බාජනීයං වා පටිසාරණීයං වා උක්ඛෙපනීයං වා, ආචරියෙන උස්සුක්කං කාතබ්බං – කින්ති නු ඛො අන්තෙවාසිකො සම්මා වත්තෙය්‍ය, ලොමං පාතෙය්‍ය, නෙත්ථාරං වත්තෙය්‍ය, සඞ්ඝො තං කම්මං පටිප්පස්සම්භෙය්‍යාති.

‘‘සචෙ අන්තෙවාසිකස්ස චීවරං ධොවිතබ්බං හොති, ආචරියෙන ආචික්ඛිතබ්බං – එවං ධොවෙය්‍යාසීති, උස්සුක්කං වා කාතබ්බං – කින්ති නු ඛො අන්තෙවාසිකස්ස චීවරං ධොවියෙථාති. සචෙ අන්තෙවාසිකස්ස චීවරං කාතබ්බං හොති, ආචරියෙන ආචික්ඛිතබ්බං – එවං කරෙය්‍යාසීති, උස්සුක්කං වා කාතබ්බං – කින්ති නු ඛො අන්තෙවාසිකස්ස චීවරං කරියෙථාති. සචෙ අන්තෙවාසිකස්ස රජනං පචිතබ්බං හොති, ආචරියෙන ආචික්ඛිතබ්බං – එවං පචෙය්‍යාසීති, උස්සුක්කං වා කාතබ්බං – කින්ති නු ඛො අන්තෙවාසිකස්ස රජනං පචියෙථාති. සචෙ අන්තෙවාසිකස්ස චීවරං රජිතබ්බං හොති, ආචරියෙන ආචික්ඛිතබ්බං – එවං රජෙය්‍යාසීති, උස්සුක්කං වා කාතබ්බං – කින්ති නු ඛො අන්තෙවාසිකස්ස චීවරං රජියෙථාති. චීවරං රජන්තෙන සාධුකං සම්පරිවත්තකං සම්පරිවත්තකං රජිතබ්බං. න ච අච්ඡින්නෙ ථෙවෙ පක්කමිතබ්බං. සචෙ අන්තෙවාසිකො ගිලානො හොති, යාවජීවං උපට්ඨාතබ්බො, වුට්ඨානමස්ස ආගමෙතබ්බං. ඉදං ඛො, භික්ඛවෙ, ආචරියානං අන්තෙවාසිකෙසු වත්තං යථා ආචරියෙහි අන්තෙවාසිකෙසු සම්මා වත්තිතබ්බ’’න්ති.

වත්තක්ඛන්ධකො අට්ඨමො.

ඉමම්හි ඛන්ධකෙ වත්ථූ එකූනවීසති, වත්තා චුද්දස.

තස්සුද්දානං –

සඋපාහනා ඡත්තා ච, ඔගුණ්ඨි සීසං පානීයං;

නාභිවාදෙ න පුච්ඡන්ති, අහි උජ්ඣන්ති පෙසලා.

ඔමුඤ්චි ඡත්තං ඛන්ධෙ ච, අතරඤ්ච පටික්කමං;

පත්තචීවරං නික්ඛිපා, පතිරූපඤ්ච පුච්ඡිතා.

ආසිඤ්චෙය්‍ය ධොවිතෙන, සුක්ඛෙනල්ලෙනුපාහනා;

වුඩ්ඪො නවකො පුච්ඡෙය්‍ය, අජ්ඣාවුට්ඨඤ්ච ගොචරා.

සෙක්ඛා වච්චා පානී පරි, කත්තරං කතිකං තතො;

කාලං මුහුත්තං උක්ලාපො, භූමත්ථරණං නීහරෙ.

පටිපාදො භිසිබිබ්බො, මඤ්චපීඨඤ්ච මල්ලකං;

අපස්සෙනුල්ලොකකණ්ණා, ගෙරුකා කාළ අකතා.

සඞ්කාරඤ්ච භූමත්ථරණං, පටිපාදකං මඤ්චපීඨං;

භිසි නිසීදනම්පි, මල්ලකං අපස්සෙන ච.

පත්තචීවරං භූමි ච, පාරන්තං ඔරතො භොගං;

පුරත්ථිමා පච්ඡිමා ච, උත්තරා අථ දක්ඛිණා.

සීතුණ්හෙ ච දිවාරත්තිං, පරිවෙණඤ්ච කොට්ඨකො;

උපට්ඨානග්ගි සාලා ච, වත්තං වච්චකුටීසු ච.

පානී පරිභොජනියා, කුම්භි ආචමනෙසු ච;

අනොපමෙන පඤ්ඤත්තං, වත්තං ආගන්තුකෙහිමෙ [වෙ (ක. එවමුපරිපි)].

නෙවාසනං න උදකං, න පච්චු න ච පානියං;

නාභිවාදෙ නපඤ්ඤපෙ, උජ්ඣායන්ති ච පෙසලා.

වුඩ්ඪාසනඤ්ච උදකං, පච්චුග්ගන්ත්වා ච පානියං;

උපාහනෙ එකමන්තං, අභිවාදෙ ච පඤ්ඤපෙ.

වුත්ථං ගොචරසෙක්ඛො ච, ඨානං පානියභොජනං;

කත්තරං කතිකං කාලං, නවකස්ස නිසින්නකෙ.

අභිවාදයෙ ආචික්ඛෙ, යථා හෙට්ඨා තථා නයෙ;

නිද්දිට්ඨං සත්ථවාහෙන වත්තං ආවාසිකෙහිමෙ.

ගමිකා දාරුමත්ති ච, විවරිත්වා න පුච්ඡිය;

නස්සන්ති ච අගුත්තඤ්ච, උජ්ඣායන්ති ච පෙසලා.

පටිසාමෙත්වා ථකෙත්වා, ආපුච්ඡිත්වාව පක්කමෙ;

භික්ඛු වා සාමණෙරො වා, ආරාමිකො උපාසකො.

පාසාණකෙසු ච පුඤ්ජං, පටිසාමෙ ථකෙය්‍ය ච;

සචෙ උස්සහති උස්සුක්කං, අනොවස්සෙ තථෙව ච.

සබ්බො ඔවස්සති ගාමං, අජ්ඣොකාසෙ තථෙව ච;

අප්පෙවඞ්ගානි සෙසෙය්‍යුං, වත්තං ගමිකභික්ඛුනා.

නානුමොදන්ති ථෙරෙන, ඔහාය චතුපඤ්චහි;

වච්චිතො මුච්ඡිතො ආසි, වත්තානුමොදනෙසුමෙ.

ඡබ්බග්ගියා දුන්නිවත්ථා, අථොපි ච දුප්පාරුතා;

අනාකප්පා ච වොක්කම්ම, ථෙරෙ අනුපඛජ්ජනෙ.

නවෙ භික්ඛූ ච සඞ්ඝාටි, උජ්ඣායන්ති ච පෙසලා;

තිමණ්ඩලං නිවාසෙත්වා, කායසගුණගණ්ඨිකා.

න වොක්කම්ම පටිච්ඡන්නං, සුසංවුතොක්ඛිත්තචක්ඛු;

උක්ඛිත්තොජ්ජග්ඝිකාසද්දො, තයො චෙව පචාලනා.

ඛම්භොගුණ්ඨිඋක්කුටිකා, පටිච්ඡන්නං සුසංවුතො;

ඔක්ඛිත්තුක්ඛිත්තඋජ්ජග්ඝි, අප්පසද්දො තයො චලා.

ඛම්භොගුණ්ඨිපල්ලත්ථි ච, අනුපඛජ්ජ නාසනෙ;

ඔත්ථරිත්වාන උදකෙ, නීචං කත්වාන සිඤ්චියා.

පටි සාමන්තා සඞ්ඝාටි, ඔදනෙ ච පටිග්ගහෙ;

සූපං උත්තරිභඞ්ගෙන, සබ්බෙසං සමතිත්ථි ච.

සක්කච්චං පත්තසඤ්ඤී ච, සපදානඤ්ච සූපකං;

න ථූපතො පටිච්ඡාදෙ, විඤ්ඤත්තුජ්ඣානසඤ්ඤිනා.

මහන්තමණ්ඩලද්වාරං, සබ්බහත්ථො න බ්‍යාහරෙ;

උක්ඛෙපො ඡෙදනාගණ්ඩ, ධුනං සිත්ථාවකාරකං.

ජිව්හානිච්ඡාරකඤ්චෙව, චපුචපු සුරුසුරු;

හත්ථපත්තොට්ඨනිල්ලෙහං, සාමිසෙන පටිග්ගහෙ.

යාව න සබ්බෙ උදකෙ, නීචං කත්වාන සිඤ්චියං;

පටි සාමන්තා සඞ්ඝාටි, නීචං කත්වා ඡමාය ච.

සසිත්ථකං නිවත්තන්තෙ, සුප්පටිච්ඡන්නමුක්කුටි;

ධම්මරාජෙන පඤ්ඤත්තං, ඉදං භත්තග්ගවත්තනං.

දුන්නිවත්ථා අනාකප්පා, අසල්ලෙක්ඛෙත්වා ච සහසා;

දූරෙ අච්ච චිරං ලහුං, තථෙව පිණ්ඩචාරිකො.

පටිච්ඡන්නොව ගච්ඡෙය්‍ය, සුංසවුතොක්ඛිත්තචක්ඛු;

උක්ඛිත්තොජ්ජග්ඝිකාසද්දො, තයො චෙව පචාලනා.

ඛම්භොගුණ්ඨිඋක්කුටිකා, සල්ලක්ඛෙත්වා ච සහසා;

දූරෙ අච්ච චිරං ලහුං, ආසනකං කටච්ඡුකා.

භාජනං වා ඨපෙති ච, උච්චාරෙත්වා පණාමෙත්වා;

පටිග්ගහෙ න උල්ලොකෙ, සූපෙසුපි තථෙව තං.

භික්ඛු සඞ්ඝාටියා ඡාදෙ, පටිච්ඡන්නෙව ගච්ඡියං;

සංවුතොක්ඛිත්තචක්ඛු ච, උක්ඛිත්තොජ්ජග්ඝිකාය ච;

අප්පසද්දො තයො චාලා, ඛම්භොගුණ්ඨිකඋක්කුටි.

පඨමාසනවක්කාර, පානියං පරිභොජනී;

පච්ඡාකඞ්ඛති භුඤ්ජෙය්‍ය, ඔපිලාපෙය්‍ය උද්ධරෙ.

පටිසාමෙය්‍ය සම්මජ්ජෙ, රිත්තං තුච්ඡං උපට්ඨපෙ;

හත්ථවිකාරෙ භින්දෙය්‍ය, වත්තිදං පිණ්ඩචාරිකෙ.

පානී පරි අග්ගිරණි, නක්ඛත්තදිසචොරා ච;

සබ්බං නත්ථීති කොට්ටෙත්වා, පත්තංසෙ චීවරං තතො.

ඉදානි අංසෙ ලග්ගෙත්වා, තිමණ්ඩලං පරිමණ්ඩලං;

යථා පිණ්ඩචාරිවත්තං, නයෙ ආරඤ්ඤකෙසුපි.

පත්තංසෙ චීවරං සීසෙ, ආරොහිත්වා ච පානියං;

පරිභොජනියං අග්ගි, අරණී චාපි කත්තරං.

නක්ඛත්තං සප්පදෙසං වා, දිසාපි කුසලො භවෙ;

සත්තුත්තමෙන පඤ්ඤත්තං, වත්තං ආරඤ්ඤකෙසුමෙ.

අජ්ඣොකාසෙ ඔකිරිංසු, උජ්ඣායන්ති ච පෙසලා;

සචෙ විහාරො උක්ලාපො, පඨමං පත්තචීවරං.

භිසිබිබ්බොහනං මඤ්චං, පීඨඤ්ච ඛෙළමල්ලකං;

අපස්සෙනුල්ලොකකණ්ණා, ගෙරුකා කාළ අකතා.

සඞ්කාරං භික්ඛුසාමන්තා, සෙනාවිහාරපානියං;

පරිභොජනසාමන්තා, පටිවාතෙ ච අඞ්ගණෙ.

අධොවාතෙ අත්ථරණං, පටිපාදකමඤ්චො ච;

පීඨං භිසි නිසීදනං, මල්ලකං අපස්සෙන ච.

පත්තචීවරං භූමි ච, පාරන්තං ඔරතො භොගං;

පුරත්ථිමා ච පච්ඡිමා, උත්තරා අථ දක්ඛිණා.

සීතුණ්හෙ ච දිවා රත්තිං, පරිවෙණඤ්ච කොට්ඨකො;

උපට්ඨානග්ගිසාලා ච, වච්චකුටී ච පානියං.

ආචමනකුම්භි වුඩ්ඪෙ ච, උද්දෙසපුච්ඡනා සජ්ඣා;

ධම්මො පදීපං විජ්ඣාපෙ, න විවරෙ නපි ථකෙ.

යෙන වුඩ්ඪො පරිවත්ති, කණ්ණෙනපි න ඝට්ටයෙ;

පඤ්ඤපෙසි මහාවීරො, වත්තං සෙනාසනෙසු තං.

නිවාරියමානා ද්වාරං, මුච්ඡිතුජ්ඣන්ති පෙසලා;

ඡාරිකං ඡඩ්ඩයෙ ජන්තා, පරිභණ්ඩං තථෙව ච.

පරිවෙණං කොට්ඨකො සාලා, චුණ්ණමත්තිකදොණිකා;

මුඛං පුරතො න ථෙරෙ, න නවෙ උස්සහති සචෙ.

පුරතො උපරිමග්ගො, චික්ඛල්ලං මත්ති පීඨකං;

විජ්ඣාපෙත්වා ථකෙත්වා ච, වත්තං ජන්තාඝරෙසුමෙ.

නාචමෙති යථාවුඩ්ඪං, පටිපාටි ච සහසා;

උබ්භජි නිත්ථුනො කට්ඨං, වච්චං පස්සාව ඛෙළකං.

ඵරුසා කූප සහසා, උබ්භජි චපු සෙසෙන;

බහි අන්තො ච උක්කාසෙ, රජ්ජු අතරමානඤ්ච.

සහසා උබ්භජි ඨිතෙ, නිත්ථුනෙ කට්ඨ වච්චඤ්ච;

පස්සාව ඛෙළ ඵරුසා, කූපඤ්ච වච්චපාදුකෙ.

නාතිසහසා උබ්භජි, පාදුකාය චපුචපු;

න සෙසයෙ පටිච්ඡාදෙ, උහතපිධරෙන ච.

වච්චකුටී පරිභණ්ඩං, පරිවෙණඤ්ච කොට්ඨකො;

ආචමනෙ ච උදකං, වත්තං වච්චකුටීසුමෙ.

උපාහනා දන්තකට්ඨං, මුඛොදකඤ්ච ආසනං;

යාගු උදකං ධොවිත්වා, උද්ධාරුක්ලාප ගාම ච.

නිවාසනා කායබන්ධා, සගුණං පත්තසොදකං;

පච්ඡා තිමණ්ඩලො චෙව, පරිමණ්ඩල බන්ධනං.

සගුණං ධොවිත්වා පච්ඡා, නාතිදූරෙ පටිග්ගහෙ;

භණමානස්ස ආපත්ති, පඨමාගන්ත්වාන ආසනං.

උදකං පීඨකථලි, පච්චුග්ගන්ත්වා නිවාසනං;

ඔතාපෙ නිදහි භඞ්ගො, ඔභොගෙ භුඤ්ජිතු නමෙ.

පානීයං උදකං නීචං, මුහුත්තං න ච නිදහෙ;

පත්තචීවරං භූමි ච, පාරන්තං ඔරතො භොගං.

උද්ධරෙ පටිසාමෙ ච, උක්ලාපො ච නහායිතුං;

සීතං උණ්හං ජන්තාඝරං, චුණ්ණං මත්තික පිට්ඨිතො.

පීඨඤ්ච චීවරං චුණ්ණං, මත්තිකුස්සහති මුඛං;

පුරතො ථෙරෙ නවෙ ච, පරිකම්මඤ්ච නික්ඛමෙ.

පුරතො උදකෙ න්හාතෙ, නිවාසෙත්වා උපජ්ඣායං;

නිවාසනඤ්ච සඞ්ඝාටි, පීඨකං ආසනෙන ච.

පාදො පීඨං කථලිඤ්ච, පානීයුද්දෙසපුච්ඡනා;

උක්ලාපං සුසොධෙය්‍ය, පඨමං පත්තචීවරං.

නිසීදනපච්චත්ථරණං, භිසි බිබ්බොහනානි ච;

මඤ්චො පීඨං පටිපාදං, මල්ලකං අපස්සෙන ච.