10. වච්චකුටිවත්තකථා

373. තෙන ඛො පන සමයෙන අඤ්ඤතරො භික්ඛු බ්‍රාහ්මණජාතිකො වච්චං කත්වා න ඉච්ඡති ආචමෙතුං – කො ඉමං වසලං දුග්ගන්ධං ආමසිස්සතීති [ආචමිස්සතීති (ක.)]. තස්ස වච්චමග්ගෙ කිමි සණ්ඨාති. අථ ඛො සො භික්ඛු භික්ඛූනං එතමත්ථං ආරොචෙසි. ‘‘කිං පන ත්වං, ආවුසො, වච්චං කත්වා න ආචමෙසී’’ති? ‘‘එවමාවුසො’’ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛු වච්චං කත්වා න ආචමෙස්සතී’’ති! අථ ඛො තෙ භික්ඛූ භගවතො එතමත්ථං ආරොචෙසුං…පෙ… ‘‘සච්චං කිර ත්වං, භික්ඛු, වච්චං කත්වා න ආචමෙසී’’ති? ‘‘සච්චං භගවා’’ති…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි – ‘‘න, භික්ඛවෙ, වච්චං කත්වා සති උදකෙ නාචමෙතබ්බං. යො නාචමෙය්‍ය, ආපත්ති දුක්කටස්සා’’ති.

තෙන ඛො පන සමයෙන භික්ඛූ වච්චකුටියා යථාවුඩ්ඪං වච්චං කරොන්ති. නවකා භික්ඛූ පඨමතරං ආගන්ත්වා වච්චිතා ආගමෙන්ති. තෙ වච්චං සන්ධාරෙන්තා මුච්ඡිතා පපතන්ති. භගවතො එතමත්ථං ආරොචෙසුං…පෙ… සච්චං කිර භික්ඛවෙ…පෙ… සච්චං භගවාති…පෙ… ‘‘න, භික්ඛවෙ, වච්චකුටියා යථාවුඩ්ඪං වච්චො කාතබ්බො. යො කරෙය්‍ය, ආපත්ති දුක්කටස්ස. අනුජානාමි, භික්ඛවෙ, ආගතපටිපාටියා වච්චං කාතු’’න්ති.

තෙන ඛො පන සමයෙන ඡබ්බග්ගියා භික්ඛූ අතිසහසාපි වච්චකුටිං පවිසන්ති, උබ්භජිත්වාපි [උබ්භුජ්ජිත්වාපි (සී.), උබ්භුජිත්වා (ස්‍යා.)] පවිසන්ති, නිත්ථුනන්තාපි වච්චං කරොන්ති, දන්තකට්ඨං ඛාදන්තාපි වච්චං කරොන්ති, බහිද්ධාපි වච්චදොණිකාය වච්චං කරොන්ති, බහිද්ධාපි පස්සාවදොණිකාය පස්සාවං කරොන්ති, පස්සාවදොණිකායපි ඛෙළං කරොන්ති, ඵරුසෙනපි කට්ඨෙන අවලෙඛන්ති, අවලෙඛනකට්ඨම්පි වච්චකූපම්හි පාතෙන්ති, අතිසහසාපි නික්ඛමන්ති, උබ්භජිත්වාපි නික්ඛමන්ති, චපුචපුකාරකම්පි ආචමෙන්ති, ආචමනසරාවකෙපි උදකං සෙසෙන්ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ අතිසහසාපි වච්චකුටිං පවිසිස්සන්ති, උබ්භජිත්වාපි පවිසිස්සන්ති, නිත්ථුනන්තාපි වච්චං කරිස්සන්ති, දන්තකට්ඨං ඛාදන්තාපි වච්චං කරිස්සන්ති, බහිද්ධාපි වච්චදොණිකාය වච්චං කරිස්සන්ති, බහිද්ධාපි පස්සාවදොණිකාය පස්සාවං කරිස්සන්ති, පස්සාවදොණිකායපි ඛෙළං කරිස්සන්ති, ඵරුසෙනපි කට්ඨෙන අවලෙඛිස්සන්ති, අවලෙඛනකට්ඨම්පි වච්චකූපම්හි පාතෙස්සන්ති, අතිසහසාපි නික්ඛමිස්සන්ති, උබ්භජිත්වාපි නික්ඛමිස්සන්ති, චපුචපුකාරකම්පි ආචමෙස්සන්ති, ආචමනසරාවකෙපි උදකං සෙසෙස්සන්තී’’ති! අථ ඛො තෙ භික්ඛූ භගවතො එතමත්ථං ආරොචෙසුං…පෙ… සච්චං කිර, භික්ඛවෙ…පෙ… සච්චං භගවාති…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි –

374. ‘‘තෙන හි, භික්ඛවෙ, භික්ඛූනං වච්චකුටිවත්තං පඤ්ඤපෙස්සාමි යථා භික්ඛූහි වච්චකුටියා සම්මා වත්තිතබ්බං. යො වච්චකුටිං ගච්ඡති තෙන බහි ඨිතෙන [බහි ඨිතෙන (සී. ක.)] උක්කාසිතබ්බං. අන්තො නිසින්නෙනපි උක්කාසිතබ්බං. චීවරවංසෙ වා චීවරරජ්ජුයා වා චීවරං නික්ඛිපිත්වා සාධුකං අතරමානෙන වච්චකුටී පවිසිතබ්බා. නාතිසහසා පවිසිතබ්බා. න උබ්භජිත්වා පවිසිතබ්බා. වච්චපාදුකාය ඨිතෙන උබ්භජිතබ්බං. න නිත්ථුනන්තෙන වච්චො කාතබ්බො. න දන්තකට්ඨං ඛාදන්තෙන වච්චො කාතබ්බො. න බහිද්ධා වච්චදොණිකාය වච්චො කාතබ්බො. න බහිද්ධා පස්සාවදොණිකාය පස්සාවො කාතබ්බො. න පස්සාවදොණිකාය ඛෙළො කාතබ්බො. න ඵරුසෙන කට්ඨෙන අවලෙඛිතබ්බං. න අවලෙඛනකට්ඨං වච්චකූපම්හි පාතෙතබ්බං. වච්චපාදුකාය ඨිතෙන පටිච්ඡාදෙතබ්බං. නාතිසහසා නික්ඛමිතබ්බං. න උබ්භජිත්වා නික්ඛමිතබ්බං. ආචමනපාදුකාය ඨිතෙන උබ්භජිතබ්බං. න චපුචපුකාරකං ආචමෙතබ්බං. න ආචමනසරාවකෙ උදකං සෙසෙතබ්බං. ආචමනපාදුකාය ඨිතෙන පටිච්ඡාදෙතබ්බං.

‘‘සචෙ වච්චකුටි උහතා [ඌහතා (සී. ස්‍යා.)] හොති, ධොවිතබ්බා. සචෙ අවලෙඛනපිධරො පූරො හොති, අවලෙඛනකට්ඨං ඡඩ්ඩෙතබ්බං. සචෙ වච්චකුටි උක්ලාපා හොති, වච්චකුටි සම්මජ්ජිතබ්බා. සචෙ පරිභණ්ඩං උක්ලාපං හොති, පරිභණ්ඩං සම්මජ්ජිතබ්බං. සචෙ පරිවෙණං උක්ලාපං හොති, පරිවෙණං සම්මජ්ජිතබ්බං. සචෙ කොට්ඨකො උක්ලාපො හොති, කොට්ඨකො සම්මජ්ජිතබ්බො. සචෙ ආචමනකුම්භියා උදකං න හොති, ආචමනකුම්භියා උදකං ආසිඤ්චිතබ්බං. ඉදං ඛො, භික්ඛවෙ, භික්ඛූනං වච්චකුටිවත්තං යථා භික්ඛූහි වච්චකුටියා සම්මා වත්තිතබ්බ’’න්ති.