5. අබ්භානාරහවත්තං

95. තෙන ඛො පන සමයෙන අබ්භානාරහා භික්ඛූ සාදියන්ති පකතත්තානං භික්ඛූනං අභිවාදනං පච්චුට්ඨානං…පෙ… නහානෙ පිට්ඨිපරිකම්මං. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අබ්භානාරහා භික්ඛූ සාදියිස්සන්ති පකතත්තානං භික්ඛූනං අභිවාදනං පච්චුට්ඨානං…පෙ… නහානෙ පිට්ඨිපරිකම්ම’’න්ති! අථ ඛො තෙ භික්ඛූ භගවතො එතමත්ථං ආරොචෙසුං.

අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා භික්ඛූ පටිපුච්ඡි – ‘‘සච්චං කිර, භික්ඛවෙ, අබ්භානාරහා භික්ඛූ සාදියන්ති පකතත්තානං භික්ඛූනං අභිවාදනං පච්චුට්ඨානං…පෙ… නහානෙ පිට්ඨිපරිකම්මන්ති? ‘‘සච්චං භගවා’’ති. විගරහි බුද්ධො භගවා – ‘‘අනනුච්ඡවිකං…පෙ… කථඤ්හි නාම, භික්ඛවෙ, අබ්භානාරහා භික්ඛූ සාදියිස්සන්ති පකතත්තානං භික්ඛූනං අභිවාදනං පච්චුට්ඨානං…පෙ… නහානෙ පිට්ඨිපරිකම්මං! නෙතං, භික්ඛවෙ, අප්පසන්නානං වා පසාදාය…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි – ‘‘න, භික්ඛවෙ, අබ්භානාරහෙන භික්ඛුනා සාදිතබ්බං පකතත්තානං භික්ඛූනං අභිවාදනං පච්චුපට්ඨානං…පෙ… නහානෙ පිට්ඨිපරිකම්මං. යො සාදියෙය්‍ය, ආපත්ති දුක්කටස්ස. අනුජානාමි, භික්ඛවෙ, අබ්භානාරහානං භික්ඛූනං මිථු යථාවුඩ්ඪං අභිවාදනං පච්චුට්ඨානං…පෙ… නහානෙ පිට්ඨිපරිකම්මං. අනුජානාමි, භික්ඛවෙ, අබ්භානාරහානං භික්ඛූනං පඤ්ච යථාවුඩ්ඪං – උපොසථං, පවාරණං, වස්සිකසාටිකං, ඔණොජනං, භත්තං. තෙන හි, භික්ඛවෙ, අබ්භානාරහානං භික්ඛූනං වත්තං පඤ්ඤාපෙස්සාමි යථා අබ්භානාරහෙහි භික්ඛූහි වත්තිතබ්බං.

96. ‘‘අබ්භානාරහෙන, භික්ඛවෙ, භික්ඛුනා සම්මා වත්තිතබ්බං. තත්‍රායං සම්මාවත්තනා –

න උපසම්පාදෙතබ්බං…පෙ… (යථා හෙට්ඨා, තථා විත්ථාරෙතබ්බං,) න භික්ඛූහි සම්පයොජෙතබ්බං.

‘‘න, භික්ඛවෙ, අබ්භානාරහෙන භික්ඛුනා පකතත්තස්ස භික්ඛුනො පුරතො ගන්තබ්බං, න පුරතො නිසීදිතබ්බං. යො හොති සඞ්ඝස්ස ආසනපරියන්තො සෙය්‍යාපරියන්තො විහාරපරියන්තො සො තස්ස පදාතබ්බො. තෙන ච සො සාදිතබ්බො.

‘‘න, භික්ඛවෙ, අබ්භානාරහෙන භික්ඛුනා පකතත්තෙන භික්ඛුනා පුරෙසමණෙන වා පච්ඡාසමණෙන වා කුලානි උපසඞ්කමිතබ්බානි; න ආරඤ්ඤිකඞ්ගං සමාදාතබ්බං; න පිණ්ඩපාතිකඞ්ගං සමාදාතබ්බං; න ච තප්පච්චයා පිණ්ඩපාතො නීහරාපෙතබ්බො – මා මං ජානිංසූති.

‘‘න, භික්ඛවෙ, අබ්භානාරහෙන භික්ඛුනා සභික්ඛුකා ආවාසා අභික්ඛුකො ආවාසො ගන්තබ්බො, අඤ්ඤත්‍ර පකතත්තෙන, අඤ්ඤත්‍ර අන්තරායා.

‘‘න, භික්ඛවෙ, අබ්භානාරහෙන භික්ඛුනා සභික්ඛුකා ආවාසා අභික්ඛුකො අනාවාසො ගන්තබ්බො, අඤ්ඤත්‍ර පකතත්තෙන, අඤ්ඤත්‍ර අන්තරායා…පෙ…. (යථා හෙට්ඨා, තථා විත්ථාරෙතබ්බා.)

‘‘ගන්තබ්බො, භික්ඛවෙ, අබ්භානාරහෙන භික්ඛුනා සභික්ඛුකා ආවාසා…පෙ… අනාවාසා…පෙ… ආවාසා වා අනාවාසා වා සභික්ඛුකො ආවාසො…පෙ… සභික්ඛුකො අනාවාසො…පෙ… සභික්ඛුකො ආවාසො වා අනාවාසො වා, යත්ථස්සු භික්ඛූ සමානසංවාසකා, යං ජඤ්ඤා සක්කොමි අජ්ජෙව ගන්තුන්ති.

‘‘න, භික්ඛවෙ, අබ්භානාරහෙන භික්ඛුනා පකතත්තෙන භික්ඛුනා සද්ධිං එකච්ඡන්නෙ ආවාසෙ වත්ථබ්බං, න එකච්ඡන්නෙ අනාවාසෙ වත්ථබ්බං, න එකච්ඡන්නෙ ආවාසෙ වා අනාවාසෙ වා වත්ථබ්බං; පකතත්තං භික්ඛුං දිස්වා ආසනා වුට්ඨාතබ්බං, පකතත්තො භික්ඛු ආසනෙන නිමන්තෙතබ්බො; න පකතත්තෙන භික්ඛුනා සද්ධිං එකාසනෙ නිසීදිතබ්බං, න නීචෙ ආසනෙ නිසින්නෙ උච්චෙ ආසනෙ නිසීදිතබ්බං, න ඡමායං නිසින්නෙ ආසනෙ නිසීදිතබ්බං; න එකචඞ්කමෙ චඞ්කමිතබ්බං, න නීචෙ චඞ්කමෙ චඞ්කමන්තෙ උච්චෙ චඞ්කමෙ චඞ්කමිතබ්බං, න ඡමායං චඞ්කමන්තෙ චඞ්කමෙ චඞ්කමිතබ්බං.

‘‘න, භික්ඛවෙ, අබ්භානාරහෙන භික්ඛුනා පාරිවාසිකෙන භික්ඛුනා සද්ධිං…පෙ… මූලායපටිකස්සනාරහෙන භික්ඛුනා සද්ධිං…පෙ… මානත්තාරහෙන භික්ඛුනා සද්ධිං…පෙ… මානත්තචාරිකෙන භික්ඛුනා සද්ධිං…පෙ… අබ්භානාරහෙන වුඩ්ඪතරෙන භික්ඛුනා සද්ධිං එකච්ඡන්නෙ ආවාසෙ වත්ථබ්බං, න එකච්ඡන්නෙ අනාවාසෙ වත්ථබ්බං; න එකච්ඡන්නෙ ආවාසෙ වා අනාවාසෙ වා වත්ථබ්බං; න එකාසනෙ නිසීදිතබ්බං, න නීචෙ ආසනෙ නිසින්නෙ උච්චෙ ආසනෙ නිසීදිතබ්බං, න ඡමායං නිසින්නෙ ආසනෙ නිසීදිතබ්බං; න එකචඞ්කමෙ චඞ්කමිතබ්බං, න නීචෙ චඞ්කමෙ චඞ්කමන්තෙ උච්චෙ චඞ්කමෙ චඞ්කමිතබ්බං, න ඡමායං චඞ්කමන්තෙ චඞ්කමෙ චඞ්කමිතබ්බං.

[මහාව. 393] ‘‘අබ්භානාරහචතුත්ථො චෙ, භික්ඛවෙ, පරිවාසං දදෙය්‍ය, මූලාය පටිකස්සෙය්‍ය, මානත්තං දදෙය්‍ය, තංවීසො අබ්භෙය්‍ය, අකම්මං, න ච කරණීය’’න්ති.

අබ්භානාරහවත්තං නිට්ඨිතං.

පාරිවාසිකක්ඛන්ධකො දුතියො.

ඉමම්හි ඛන්ධකෙ වත්ථූ පඤ්ච.

තස්සුද්දානං –

පාරිවාසිකා සාදෙන්ති, පකතත්තාන භික්ඛුනං;

අභිවාදනං පච්චුට්ඨානං, අඤ්ජලිඤ්ච සාමීචියං.

ආසනං සෙය්‍යාභිහාරං, පාදො පීඨං කථලිකං;

පත්තං නහානෙ පරිකම්මං, උජ්ඣායන්ති ච පෙසලා.

දුක්කටං සාදියන්තස්ස, මිථු පඤ්ච යථාවුඩ්ඪං [පුනාපරෙ (ක.)];

උපොසථං පවාරණං, වස්සිකොණොජභොජනං.

සම්මා ච වත්තනා තත්ථ, පකතත්තස්ස ගච්ඡන්තං;

යො ච හොති පරියන්තො, පුරෙ පච්ඡා තථෙව ච [න පුරෙ පච්ඡාසමණෙන (සී. ස්‍යා.)].

ආරඤ්ඤපිණ්ඩනීහාරො, ආගන්තුකෙ උපොසථෙ;

පවාරණාය දූතෙන, ගන්තබ්බො ච සභික්ඛුකො.

එකච්ඡන්නෙ ච වුට්ඨානං, තථෙව ච නිමන්තයෙ;

ආසනෙ නීචෙ චඞ්කමෙ, ඡමායං චඞ්කමෙන ච.

වුඩ්ඪතරෙන අකම්මං, රත්තිච්ඡෙදා ච සොධනා;

නික්ඛිපනං සමාදානං, වත්තංව පාරිවාසිකෙ [රත්ති වා පාරිවාසිකෙ (ක.), ඤාතබ්බං පාරිවාසිකා (සී. ස්‍යා.)].

මූලාය මානත්තාරහා, තථා මානත්තචාරිකා;

අබ්භානාරහෙ නයො චාපි, සම්භෙදං නයතො [සම්භෙදනයතො (ස්‍යා.)] පුන.

පාරිවාසිකෙසු තයො, චතු මානත්තචාරිකෙ;

න සමෙන්ති රත්තිච්ඡෙදෙසු [රත්තිච්ඡෙදෙ (ඉතිපි), රත්තිච්ඡෙදා (ස්‍යා.)], මානත්තෙසු ච දෙවසි;

ද්වෙ කම්මා සදිසා සෙසා, තයො කම්මා සමාසමාති [සමා මතාති (සී.)].

පාරිවාසිකක්ඛන්ධකං නිට්ඨිතං.