8. කුමාරිභූතවග්ගවණ්ණනා

1119. කුමාරිභූතවග්ගස්ස පඨමෙ සබ්බපඨමා ද්වෙ මහාසික්ඛමානාති ගබ්භිනිවග්ගෙ සබ්බපඨමං වුත්තා ද්වෙ සික්ඛමානා. සික්ඛමානා ඉච්චෙව වත්තබ්බාති සම්මුතිකම්මාදීසු එවං වත්තබ්බා. ගිහිගතාති වා කුමාරිභූතාති වා න වත්තබ්බාති සචෙ වදන්ති, කම්මං කුප්පතීති අධිප්පායො. ඉතො පරං නවමපරියොසානං උත්තානත්ථමෙව.

1163. දසමෙ අපුබ්බසමුට්ඨානසීසන්ති පඨමපාරාජිකසමුට්ඨානාදීසු තෙරසසු සමුට්ඨානෙසු අනනුඤ්ඤාතසමුට්ඨානං සන්ධාය වුත්තං. තඤ්හි ඉතො පුබ්බෙ තාදිසස්ස සමුට්ඨානසීසස්ස අනාගතත්තා ‘‘අපුබ්බසමුට්ඨානසීස’’න්ති වුත්තං.

1166. එකාදසමාදීනි උත්තානත්ථානෙව.

කුමාරිභූතවග්ගවණ්ණනා නිට්ඨිතා.