3. නග්ගවග්ගවණ්ණනා

883-887. නග්ගවග්ගස්ස පඨමදුතියානි උත්තානත්ථානෙව.

893. තතියෙ විසිබ්බෙත්වාති දුස්සිබ්බිතං පුන සිබ්බනත්ථාය විසිබ්බෙත්වා විජටෙත්වා. අඤ්ඤත්‍ර චතූහපඤ්චාහාති විසිබ්බිතදිවසතො පඤ්ච දිවසෙ අතික්කමිත්වා. නිවාසනපාවුරණූපගචීවරතා, උපසම්පන්නාය සන්තකතා, සිබ්බනත්ථාය විසිබ්බනං වා විසිබ්බාපනං වා, අඤ්ඤත්‍ර අනුඤ්ඤාතකාරණා පඤ්චාහාතික්කමො, ධුරනික්ඛෙපොති ඉමානි පනෙත්ථ පඤ්ච අඞ්ගානි.

898. චතුත්ථෙ පඤ්චන්නං චීවරානන්ති තිචීවරං උදකසාටිකා සඞ්කච්චිකාති ඉමෙසං පඤ්චන්නං චීවරානං. පඤ්චන්නං චීවරානං අඤ්ඤතරතා, පඤ්චාහාතික්කමො, අනුඤ්ඤාතකාරණාභාවො, අපරිවත්තනන්ති ඉමානි පනෙත්ථ චත්තාරි අඞ්ගානි.

902. පඤ්චමං උත්තානත්ථමෙව.

907. ඡට්ඨෙ චීවරලාභන්ති ලභිතබ්බචීවරං. විකප්පනුපගපච්ඡිමතා, සඞ්ඝස්ස පරිණතභාවො, විනා ආනිසංසදස්සනෙන අන්තරායකරණන්ති ඉමානි පනෙත්ථ තීණි අඞ්ගානි.

911. සත්තමං උත්තානත්ථමෙව.

916. අට්ඨමෙ කුම්භථූණං නාම කුම්භසද්දො, තෙන චරන්ති කීළන්ති, තං වා සිප්පං එතෙසන්ති කුම්භථූණිකා. තෙනාහ ‘‘ඝටකෙන කීළනකා’’ති. දීඝනිකායට්ඨකථායං (දී. නි. අට්ඨ. 1.13) පන ‘‘කුම්භථූණං නාම චතුරස්සඅම්බණකතාළ’’න්ති වුත්තං. චතුරස්සඅම්බණකතාළං නාම රුක්ඛසාරදන්තාදීසු යෙන කෙනචි චතුරස්සඅම්බණං කත්වා චතූසු පස්සෙසු චම්මෙන ඔනන්ධිත්වා කතවාදිතභණ්ඩං. බිම්බිසකන්තිපි තස්සෙව වෙවචනං, තං වාදෙන්ති, තං වා සිප්පං එතෙසන්ති කුම්භථූණිකා. තෙනාහ ‘‘බිම්බිසකවාදකාතිපි වදන්තී’’ති. සමණචීවරතා, ඨපෙත්වා සහධම්මිකෙ මාතාපිතරො ච අඤ්ඤෙසං දානං, අතාවකාලිකතාති ඉමානි පනෙත්ථ තීණි අඞ්ගානි.

920. නවමං උත්තානත්ථමෙව.

927. දසමෙ ධම්මිකං කථිනුද්ධාරන්ති සබ්බාසං භික්ඛුනීනං අකාලචීවරං දාතුකාමෙන උපාසකෙන යත්තකො අත්ථාරමූලකො ආනිසංසො, තතො අධිකං වා සමකං වා දත්වා යාචිතකෙන සමග්ගෙන භික්ඛුනිසඞ්ඝෙන යං කථිනං ඤත්තිදුතියෙන කම්මෙන අන්තරා උද්ධරීයති, තස්ස සො උද්ධාරො ධම්මිකොති වුච්චති, එවරූපං කථිනුද්ධාරන්ති අත්ථො. සෙසං උත්තානත්ථමෙව.

නග්ගවග්ගවණ්ණනා නිට්ඨිතා.

932. තුවට්ටවග්ගෙ සබ්බං උත්තානමෙව.