6. ඡට්ඨසඞ්ඝාදිසෙසසික්ඛාපදවණ්ණනා
705. ඡට්ඨෙ පරිවාරගාථාය අයමත්ථො. න දෙති න පටිග්ගණ්හාතීති (පරි. අට්ඨ. 481) න උය්‍යොජිකා දෙති, නාපි උය්‍යොජිතා තස්සා හත්ථතො ගණ්හාති. පටිග්ගහො තෙන න විජ්ජතීති තෙනෙව කාරණෙන උය්‍යොජිකාය හත්ථතො උය්‍යොජිතාය පටිග්ගහො න විජ්ජති. ආපජ්ජති ගරුකන්ති එවං සන්තෙපි අවස්සුතස්ස හත්ථතො පිණ්ඩග්ගහණෙ උය්‍යොජෙන්තී සඞ්ඝාදිසෙසාපත්තිං ආපජ්ජති. තඤ්ච පරිභොගපච්චයාති තඤ්ච පන ආපත්තිං ආපජ්ජමානා තස්සා උය්‍යොජිතාය පරිභොගපච්චයා ආපජ්ජති. තස්සා හි භොජනපරියොසානෙ උය්‍යොජිකාය සඞ්ඝාදිසෙසො හොති. සෙසමෙත්ථ උත්තානමෙව. මනුස්සපුරිසතා, අඤ්ඤත්‍ර අනුඤ්ඤාතකාරණා ඛාදනීයං භොජනීයං ගහෙත්වා භුඤ්ජාති උය්‍යොජනා, තෙන වචනෙන ගහෙත්වා ඉතරිස්සා භොජනපරියොසානන්ති ඉමානි පනෙත්ථ තීණි අඞ්ගානි.
ඡට්ඨසඞ්ඝාදිසෙසසික්ඛාපදවණ්ණනා නිට්ඨිතා.