2. දුතියසඞ්ඝාදිසෙසසික්ඛාපදවණ්ණනා

683. දුතියෙ මල්ලගණභටිපුත්තගණාදිකන්තිආදීසු මල්ලගණො නාම නාරායනභත්තිකො තත්ථ තත්ථ පානීයට්ඨපනපොක්ඛරණීඛණනාදිපුඤ්ඤකම්මකාරකො ගණො, භටිපුත්තගණො නාම කුමාරභත්තිකගණො. ධම්මගණොති සාසනභත්තිගණො අනෙකප්පකාරපුඤ්ඤකම්මකාරකගණො වුච්චති. ගන්ධිකසෙණීති අනෙකප්පකාරසුගන්ධිවිකතිකාරකො ගණො. දුස්සිකසෙණීති පෙසකාරකගණො. කප්පගතිකන්ති කප්පියභාවං ගතං.

වුට්ඨාපෙන්තියාති උපසම්පාදෙන්තියා. ‘‘චොරිං වුත්තනයෙන අනාපුච්ඡා පබ්බාජෙන්තියා දුක්කට’’න්ති වදන්ති. පණ්ණත්තිං අජානන්තා අරියාපි වුට්ඨාපෙන්තීති වා කම්මවාචාපරියොසානෙ ආපත්තික්ඛණෙ විපාකාබ්‍යාකතසමඞ්ගිතාවසෙන වා ‘‘තිචිත්ත’’න්ති වුත්තන්ති වෙදිතබ්බං. සෙසමෙත්ථ උත්තානමෙව. චොරිතා, චොරිසඤ්ඤා, අඤ්ඤත්‍ර අනුඤ්ඤාතකාරණා වුට්ඨාපනන්ති ඉමානි පනෙත්ථ තීණි අඞ්ගානි.

දුතියසඞ්ඝාදිසෙසසික්ඛාපදවණ්ණනා නිට්ඨිතා.