1. පඨමාදිසික්ඛාපදවණ්ණනා

883-887. තතියවග්ගස්ස පඨමදුතියානි උත්තානානි.

893. තතියෙ විසිබ්බෙත්වාති විජටෙත්වා. ධුරං නික්ඛිත්තමත්තෙති විසිබ්බනදිවසතො පඤ්ච දිවසෙ අතික්කාමෙත්වා ධුරං නික්ඛිත්තමත්තෙ. අන්තොපඤ්චාහෙ පන ධුරනික්ඛෙපෙපි අනාපත්ති එව ‘‘අඤ්ඤත්‍ර චතූහපඤ්චාහා’’ති වුත්තත්තා. උපසම්පන්නාය චීවරං සිබ්බනත්ථාය විසිබ්බෙත්වා පඤ්චහාතික්කමො, අනනුඤ්ඤාතකාරණා ධුරනික්ඛෙපොති ද්වෙ අඞ්ගානි.

900. චතුත්ථෙ පඤ්චන්නං චීවරානං අපරිවත්තනං, අනනුඤ්ඤාතකාරණා පඤ්චාහාතික්කමොති ද්වෙ අඞ්ගානි.

903. පඤ්චමං උත්තානමෙව.

909. ඡට්ඨෙ විකප්පනුපගස්ස සඞ්ඝෙ පරිණතතා, විනා ආනිසංසදස්සනෙන අන්තරායකරණන්ති ද්වෙ අඞ්ගානි.

911. සත්තමං උත්තානමෙව.

916. අට්ඨමෙ කුම්භථූණං නාම කුම්භසද්දො, තෙන කීළන්තීති කුම්භථූණිකා. තෙනාහ ‘‘ඝටකෙන කීළනකා’’ති. දීඝනිකායට්ඨකථායං පන ‘‘චතුරස්සඅම්බණකතාළ’’න්ති වුත්තං. තඤ්හි රුක්ඛසාරාදිමයං අන්තොඡිද්දං චතූසු පස්සෙසු චම්මොනද්ධං වාදිතභණ්ඩං, යං ‘‘බිම්බිසක’’න්තිපි වුච්චති, තං වාදෙන්තාපි කුම්භථූණිකා. තෙනාහ ‘‘බිම්බිසකවාදිතකාතිපි වදන්තී’’ති.

918. පාළියං කප්පකතන්ති කප්පකතං නිවාසනපාරුපනූපගං. සමණචීවරතා, අනනුඤ්ඤාතානං දානන්ති ද්වෙ අඞ්ගානි.

921-931. නවමදසමානි උත්තානානෙව.

නිට්ඨිතො නග්ගවග්ගො තතියො.