2. වජ්ජපටිච්ඡාදිකසික්ඛාපදවණ්ණනා

666. දුතියෙ පුරිමෙනාතිආදි සුන්දරීනන්දාය වජ්ජපටිච්ඡාදනෙ පඤ්ඤත්තතං සන්ධාය වුත්තං. ‘‘අට්ඨන්න’’න්ති වුත්තත්තා වජ්ජපටිච්ඡාදනස්සාපි පටිච්ඡාදනෙ පාරාජිකමෙවාති දට්ඨබ්බං. ‘‘ධුරං නික්ඛිත්තමත්තෙ’’ති වුත්තත්තා පණ්ණත්තිං අජානන්තියාපි ‘‘ඉදං වජ්ජං න පකාසෙස්සාමී’’ති ඡන්දෙන ධුරං නික්ඛෙපක්ඛණෙ පාරාජිකන්ති දට්ඨබ්බං. තං පන පටිච්ඡාදනං යස්මා ‘‘පෙසලා ඤත්වා ගරහිස්සන්තී’’ති භයෙනෙව හොති, භයඤ්ච කොධචිත්තසම්පයුත්තං, තස්මා ඉදං ‘‘දුක්ඛවෙදන’’න්ති වුත්තං. යං පන සාරත්ථදීපනියං (සාරත්ථ. ටී. පාරාජිකකණ්ඩ 3.666) ‘‘කිඤ්චාපි වජ්ජපටිච්ඡාදනං පෙමවසෙන හොති, තථාපි සික්ඛාපදවීතික්කමචිත්තං දොමනස්සිතමෙව හොතී’’ති එවං පණ්ණත්තිවීතික්කමචිත්තෙනෙව ඡාදනං දොමනස්සත්තෙ කාරණං වුත්තං, තං අකාරණං පණ්ණත්තිවිජානනං විනාපි ආපජ්ජිතබ්බතොව.

වජ්ජපටිච්ඡාදිකසික්ඛාපදවණ්ණනා නිට්ඨිතා.

669. තතියං උත්තානමෙව.