4. පහාරසික්ඛාපදවණ්ණනා

451. චතුත්ථෙ පාළියං කායපටිබද්ධෙන වාති එත්ථ පාසාණාදිනිස්සග්ගියපහාරොපි සඞ්ගහිතො.

452. රත්තචිත්තොති කායසංසග්ගරාගෙන වුත්තං. මෙථුනරාගෙන පන පහාරතො පුරිසාදීසු දුක්කටමෙව. මොක්ඛාධිප්පායෙන දණ්ඩකොටියා සප්පාදිං ඝට්ටෙත්වා මණ්ඩූකාදිං මොචෙන්තස්සපි අනාපත්ති එව. කුපිතතා, උපසම්පන්නස්ස න මොක්ඛාධිප්පායෙන පහාරොති ද්වෙ අඞ්ගානි.

පහාරසික්ඛාපදවණ්ණනා නිට්ඨිතා.