7. විහාරකාරසික්ඛාපදවණ්ණනා
365. සත්තමෙ පූජාවචනප්පයොගෙ කත්තරි සාමිවචනස්සපි ඉච්ඡිතත්තා ‘‘ගාමස්ස වා පූජිත’’න්ති වුත්තං. රූපින්ද්‍රියෙසු විජ්ජමානං සන්ධාය එකින්ද්‍රියතා වුච්චතීති ආහ ‘‘කායින්ද්‍රියං සන්ධායා’’ති. තෙ හි මනින්ද්‍රියම්පි භූතගාමානං ඉච්ඡන්ති.
366. කිරියතො සමුට්ඨානාභාවොති වත්ථුනො අදෙසනාසඞ්ඛාතං අකිරියං විනා න කෙවලං කිරියාය සමුට්ඨානභාවො. කිරියාකිරියතො හි ඉදං සමුට්ඨාති. ඉමස්මිං සික්ඛාපදෙ භික්ඛූ වා අනභිනෙය්‍යාති එත්ථ වා-සද්දො සමුච්චයත්ථො, තෙන ‘‘මහල්ලකඤ්ච විහාරං කරෙය්‍ය, භික්ඛූ ච අනභිනෙය්‍යා’’ති කිරියඤ්ච අකිරියඤ්ච සමුච්චිනොති.
විහාරකාරසික්ඛාපදවණ්ණනා නිට්ඨිතා.