3. තතියවග්ගො
1. මාතුගාමසුත්තවණ්ණනා
170. යං විසභාගවත්ථු පුරිසස්ස චිත්තං පරියාදාය ඨාතුං සක්කොතීති වුච්චති, තතො විසෙසතො ලාභසක්කාරොව සත්තානං චිත්තං පරියාදාය ඨාතුං සක්කොතීති දස්සෙන්තො භගවා ‘‘න තස්ස, භික්ඛවෙ’’තිආදිමවොචාති දස්සෙන්තො ‘‘න තස්සා’’තිආදිමාහ.
මාතුගාමසුත්තවණ්ණනා නිට්ඨිතා.
2. කල්‍යාණීසුත්තවණ්ණනා
171. දුතියං උත්තානමෙව, තස්සෙව අත්ථස්ස කෙවලං ජනපදකල්‍යාණීවසෙන වුත්තං.
කල්‍යාණීසුත්තවණ්ණනා නිට්ඨිතා.
3-6. එකපුත්තකසුත්තාදිවණ්ණනා
172-175. සද්ධාති අරියමග්ගෙන ආගතසද්ධා අධිප්පෙතාති ආහ ‘‘සොතාපන්නා’’ති.
එකපුත්තකසුත්තාදිවණ්ණනා නිට්ඨිතා.
7. තතියසමණබ්‍රාහ්මණසුත්තවණ්ණනා
176. එවමාදීති ආදි-සද්දෙන බාහුසච්චසංවරසීලාදීනං සඞ්ගහො දට්ඨබ්බො. ලාභසක්කාරස්ස සමුදයං උප්පත්තිකාරණං සමුදයසච්චවසෙන දුක්ඛසච්චස්ස උප්පත්තිහෙතුතාවසෙන.
තතියසමණබ්‍රාහ්මණසුත්තවණ්ණනා නිට්ඨිතා.
8. ඡවිසුත්තවණ්ණනා
177. ලාභසක්කාරසිලොකො නරකාදීසු නිබ්බත්තෙන්තොති ඉදං තන්නිස්සයං කිලෙසගණං සන්ධායාහ. නිබ්බත්තෙන්තොති නිබ්බත්තාපෙන්තො. ඉමං මනුස්සඅත්තභාවං නාසෙති මනුස්සත්තං පුන නිබ්බත්තිතුං අප්පදානවසෙන. තස්මාති දුග්ගතිනිබ්බත්තාපනතො ඉධ මරණදුක්ඛාවහනතො ච.
ඡවිසුත්තවණ්ණනා නිට්ඨිතා.
9. රජ්ජුසුත්තවණ්ණනා
178. ඛරා ඵරුසා ඡවිආදීනි ඡින්දනෙ සමත්ථා.
රජ්ජුසුත්තවණ්ණනා නිට්ඨිතා.
10. භික්ඛුසුත්තවණ්ණනා
179. තං සන්ධායාති දිට්ඨධම්මසුඛවිහාරස්ස ඔකාසාභාවං සන්ධාය.
භික්ඛුසුත්තවණ්ණනා නිට්ඨිතා.
තතියවග්ගවණ්ණනා නිට්ඨිතා.