1. පඨමපාටිදෙසනීයසික්ඛාපදවණ්ණනා
අන්තරඝරං පවිට්ඨායාති රථිකං බ්‍යූහං සිඞ්ඝාටකං ඝරං පවිට්ඨාය. අසප්පායන්ති සග්ගමොක්ඛානං අහිතං අනනුකූලං. භික්ඛුනියා අන්තරඝරෙ ඨත්වා දදමානාය වසෙනෙත්ථ ආපත්ති වෙදිතබ්බා, භික්ඛුස්ස ඨිතට්ඨානං පන අප්පමාණං. තෙනාහ ‘‘අන්තරඝරං පවිට්ඨායාති වචනතො’’තිආදි. අන්තරාරාමාදීසූති අන්තරාරාමභික්ඛුනුපස්සයතිත්ථියසෙය්‍යාපටික්කමනෙසු. රථියාබ්‍යූහසිඞ්ඝාටකඝරානන්ති එත්ථ රථියාති රච්ඡා. බ්‍යූහන්ති අනිබ්බිජ්ඣිත්වා ඨිතා ගතපච්චාගතරච්ඡා. සිඞ්ඝාටකන්ති චතුක්කොණං වා තිකොණං වා මග්ගසමොධානට්ඨානං. ඝරන්ති කුලඝරං. යථා ච රථියාදීසු ඨත්වා දදමානාය ගණ්හතො ආපත්ති, එවං හත්ථිසාලාදීසුපි දට්ඨබ්බං.
‘‘යාමකාලිකාදීසු පටිග්ගහණෙපි අජ්ඣොහරණෙපි දුක්කට’’න්ති ඉදං ආමිසෙන අසම්භින්නං සන්ධාය වුත්තං, සම්භින්නෙ පන එකරසෙ පාටිදෙසනීයමෙව. එකතො උපසම්පන්නායාති භික්ඛුනීනං සන්තිකෙ උපසම්පන්නාය, භික්ඛූනං සන්තිකෙ උපසම්පන්නාය පන යථාවත්ථුකමෙව.
ඤාතිකාය වා දාපෙන්තියාති සයං අදත්වා යාය කායචි ඤාතිකාය දාපෙන්තියා, අඤ්ඤාතිකායාති අත්ථො. උපනික්ඛිපිත්වා වා දදමානායාති භූමියං ඨපෙත්වා ‘‘ඉදං, අය්‍ය, තුම්හාකං දම්මී’’ති දදමානාය. එවං දින්නං ‘‘සාධු, භගිනී’’ති සම්පටිච්ඡිත්වා තාය එව වා භික්ඛුනියා, අඤ්ඤෙන වා කෙනචි පටිග්ගහාපෙත්වා ඉදං භුඤ්ජිතුං වට්ටති.
පඨමපාටිදෙසනීයසික්ඛාපදවණ්ණනා නිට්ඨිතා.