6. ආරාමවග්ගො

1-2. ආරාමපවිසනාදිසික්ඛාපදවණ්ණනා

සීසානුලොකිකායාති සීසං අනුලොකෙන්තියා. යත්ථ වා භික්ඛුනියො සන්නිපතිතාති යත්ථ භික්ඛුනියො පඨමතරං සජ්ඣායනචෙතියවන්දනාදිඅත්ථං සන්නිපතිතා. ආපදාසූති කෙනචි උපද්දුතා හොති, එවරූපාසු ආපදාසු පවිසිතුං වට්ටති.

දුතියං උත්තානත්ථමෙව.

ආරාමපවිසනාදිසික්ඛාපදවණ්ණනා නිට්ඨිතා.

3-4. ගණපරිභාසනාදිසික්ඛාපදවණ්ණනා

සෙසන්ති ‘‘අත්ථධම්මඅනුසාසනිපුරෙක්ඛාරායා’’තිආදිකං අවසෙසං. තත්ථ අනුසාසනිපුරෙක්ඛාරායාති ‘‘ඉදානිපි ත්වං බාලා අබ්‍යත්තා’’තිආදිනා (පාචි. අට්ඨ. 1036) නයෙන අනුසාසනිපක්ඛෙ ඨත්වා වදන්තියා අනාපත්ති.

චතුත්ථං උත්තානත්ථමෙව.

ගණපරිභාසනාදිසික්ඛාපදවණ්ණනා නිට්ඨිතා.

5. කුලමච්ඡරිනීසික්ඛාපදවණ්ණනා

කුලෙ මච්ඡරො කුලමච්ඡරොති පුරිමස්මිං පක්ඛෙ සකත්ථෙ ඉනීපච්චයො, තං කුලං අස්සද්ධං අප්පසන්නන්ති කුලස්ස අගුණං, අයසං වා භාසන්තියාති අත්ථො. භික්ඛුනීනං අවණ්ණං භාසන්තියාති ‘‘භික්ඛුනියො දුස්සීලා පාපධම්මා’’ති (පාචි. අට්ඨ. 1043) භික්ඛුනීනං අගුණං, අයසං වා භාසන්තියා.

සන්තංයෙව ආදීනවන්ති කුලස්ස වා භික්ඛුනීනං වා සන්තංයෙව අගුණං.

කුලමච්ඡරිනීසික්ඛාපදවණ්ණනා නිට්ඨිතා.

6-8. අභික්ඛුකාවාසාදිසික්ඛාපදවණ්ණනා

සමන්තපාසාදිකායං වුත්තොති සමන්තපාසාදිකාය ඔවාදවග්ගස්ස පඨමසික්ඛාපදෙ (පාචි. අට්ඨ. 144) වුත්තො.

සත්තමට්ඨමානි උත්තානත්ථානෙව.

අභික්ඛුකාවාසාදිසික්ඛාපදවණ්ණනා නිට්ඨිතා.

9-10. ඔවාදූපසඞ්කමනාදිසික්ඛාපදවණ්ණනා

උපොසථස්ස පුච්ඡනං උපොසථපුච්ඡා, සාවකපච්චයං, රස්සත්තඤ්ච කත්වා ‘‘උපොසථපුච්ඡක’’න්ති වුත්තාති ආහ ‘‘උපොසථපුච්ඡන’’න්ති. ඔවාදත්ථායාති ඔවාදයාචනත්ථාය.

දසමං උත්තානත්ථමෙව.

ඔවාදූපසඞ්කමනාදිසික්ඛාපදවණ්ණනා නිට්ඨිතා.

ආරාමවග්ගො ඡට්ඨො.