1. මෙථුනධම්මසික්ඛාපදවණ්ණනා

අභිලාපමත්තන්ති වචනමත්තං, න අත්ථොති අධිප්පායො. ලිඞ්ගභෙදමත්තන්ති පුරිසලිඞ්ගං ඉත්ථිලිඞ්ගන්ති විසෙසමත්තං. විසෙසොති නානාත්තං. ඡන්දෙන චෙවාති පෙමෙන චෙව, සිනෙහෙන චෙවාති අත්ථො. රුචියා චාති ඉච්ඡාය ච. පධංසිතායාති දූසිතාය. පරිපුණ්ණා උපසම්පදා යස්සා සා පරිපුණ්ණූපසම්පදා, උභතොසඞ්ඝෙන උපසම්පන්නාති අත්ථො.

මෙථුනධම්මසික්ඛාපදවණ්ණනා නිට්ඨිතා.