12. පාපසමාචාරපඨමසික්ඛාපදවණ්ණනා

ද්වාදසමෙ සංසට්ඨාති පබ්බජිතානං අනනුලොමෙන ගිහීනං කොට්ටනපචනසාසනහරණාදිනා කායිකවාචසිකෙන මිස්සීභූතා. පාපො කායිකවාචසිකො ආචාරො එතාසන්ති පාපාචාරා. පාපො කිත්තිසද්දො එතාසන්ති පාපසද්දා. පාපො ආජීවසඞ්ඛාතො සිලොකො එතාසන්ති පාපසිලොකා. භික්ඛුනිසඞ්ඝස්ස විහෙසිකාති අඤ්ඤමඤ්ඤිස්සා කම්මෙ කරියමානෙ පටික්කොසනෙන විහෙසිකා. වජ්ජප්පටිච්ඡාදිකාති ඛුද්දානුඛුද්දකස්ස වජ්ජස්ස පටිච්ඡාදිකා.

සාවත්ථියං සම්බහුලා භික්ඛුනියො ආරබ්භ සංසට්ඨවිහාරවත්ථුස්මිං පඤ්ඤත්තං, සෙසමෙත්ථාපි දසමෙ වුත්තනයෙනෙව වෙදිතබ්බං, සමනුභාසනකම්මකාලෙ පන ද්වෙතිස්සො එකතො සමනුභාසිතබ්බාති.

පාපසමාචාරපඨමසික්ඛාපදවණ්ණනා නිට්ඨිතා.