සොධනහාරවණ්ණනා

‘‘මමං වා…පෙ… භාසෙය්‍යු’’න්ති ආරම්භො. ‘‘ධම්මස්ස…පෙ… සඞ්ඝස්ස…පෙ… භාසෙය්‍යු’’න්ති පදසුද්ධි, නො ආරම්භසුද්ධි. ‘‘තත්‍ර තුම්හෙහි…පෙ… කරණීයා’’ති පදසුද්ධි චෙව ආරම්භසුද්ධි ච. දුතියනයාදීසුපි එසෙව නයො. තථා ‘‘අප්පමත්තකං ඛො පනෙත’’න්තිආදි ආරම්භො. ‘‘කතම’’න්තිආදි පුච්ඡා. ‘‘පාණාතිපාතං පහායා’’තිආදි පදසුද්ධි, නො ආරම්භසුද්ධි, නො ච පුච්ඡාසුද්ධි. ‘‘ඉදං ඛො’’තිආදි පුච්ඡාසුද්ධි චෙව පදසුද්ධි ච ආරම්භසුද්ධි ච.

තථා ‘‘අත්ථි භික්ඛවෙ’’තිආදි ආරම්භො. ‘‘කතමෙ ච තෙ’’තිආදි පුච්ඡා. ‘‘සන්ති භික්ඛවෙ’’තිආදි ආරම්භො. ‘‘කි’’න්තිආදි ආරම්භ පුච්ඡා. ‘‘යථාසමාහිතෙ’’තිආදි පදසුද්ධි, නො ආරම්භසුද්ධි නො ච පුච්ඡාසුද්ධි. ‘‘ඉමෙ ඛො තෙ’’තිආදි පදසුද්ධි චෙව පුච්ඡාසුද්ධි ච ආරම්භසුද්ධි ච. ඉමිනා නයෙන සබ්බත්ථ ආරම්භාදයො වෙදිතබ්බාති. අයං සොධනො හාරො.