3. පඤ්හපුච්ඡකවණ්ණනා

සයං ජෙට්ඨකභාවෙන පවත්තනතො චත්තාරො අධිපතයො අඤ්ඤමඤ්ඤං ගරුං න කරොන්ති. තස්මා ‘‘චත්තාරො ඉද්ධිපාදා න මග්ගාධිපතිනො’’ති වුත්තා. තෙනාහ ‘‘අඤ්ඤමඤ්ඤස්ස පන අධිපතයො න භවන්තී’’ති. එතමත්ථන්ති ‘‘අධිපතයො අඤ්ඤමඤ්ඤස්ස අධිපතී න භවන්තී’’ති එතමත්ථං. අධිපතිනොති අධිපති භවිතුං සමත්ථස්ස. අධිපතිං න කරොන්තීති අධිපතිං කත්වා ගරුං කත්වා නප්පවත්තන්ති. අධිපතීනං සහභාවෙති අධිපතිකිච්චකරණෙන සහපවත්තියං. ‘‘අවීමංසාධිපතිකස්ස මග්ගස්ස අභාවා’’ති ඉදං ‘‘අධිපතිතාසමත්ථා ධම්මා අධිපතිභාවෙනෙව පවත්තෙය්‍යු’’න්ති දොසාරොපනවසෙනාහ, න යථාධිගතවසෙන. අධිපතිධම්මානඤ්හි පුබ්බාභිසඞ්ඛාරෙ සති අධිපතිභාවෙන පවත්ති, න අඤ්ඤථාති සහභාවෙපි තදභාවං සන්ධාය විසෙසනං න කත්තබ්බං සියාති සක්කා වත්තුං. අඤ්ඤමඤ්ඤාධිපතිකරණභාවෙති අඤ්ඤමඤ්ඤං අධිපතිං කත්වා පවත්තියං. වීමංසාධිපතිකත්තවචනන්ති වීමංසාධිපතිකභාවස්ස වචනං. න වත්තබ්බං සියා සබ්බෙසම්පි අධිපතීනං සාධිපතිකත්තාති අධිප්පායො. සහභාවො පටික්ඛිත්තො එව සාධිපතිභාවස්ස අනෙකංසිකතාවචනතො.

පඤ්හපුච්ඡකවණ්ණනා නිට්ඨිතා.

ඉද්ධිපාදවිභඞ්ගවණ්ණනා නිට්ඨිතා.