3. තිකනිද්දෙසවණ්ණනා
909. අවිජ්ජාභවතණ්හාහි විය ඉස්සාමච්ඡරියදොමනස්සාදිසහායභූතෙන දොසෙනපි භවාභිසඞ්ඛරණං හොතීති ‘‘අකුසලමූලානෙව වට්ටමූලානී’’ති. තෙනාහ ‘‘තීහි…පෙ… කථිතො’’ති.
919. රූපාරූපාවචරවිපාකානං සන්තපණීතභාවෙන උළාරතමත්තා තත්ථ සාතිසයො භවරාගො වුත්තො.
920. මානෙන ඨපනාති මානෙන සෙය්‍යාදිවසෙන අත්තනො ඨපනා. ඨපනාති ච දහනා, පග්ගණ්හනා වා.
921. තංසම්පයුත්තාති දොසසම්පයුත්තා.
922. තෙසං වණ්ණභෙදන්ති තෙසං ජීවානං වණ්ණවිසෙසං, තෙසං වා තථා කථෙන්තානං සුත්වා. බ්‍යාපීති සකලලොකබ්‍යාපී, සකලසරීරබ්‍යාපී වා. පරිමණ්ඩලොති පරමාණුප්පමාණො හුත්වා පරිමණ්ඩලො. ආදි-සද්දෙන අඞ්ගුට්ඨප්පමාණො වයප්පමාණොතිආදිකං සඞ්ගණ්හාති.
923. උතුවිපරිණාමජො සීතාදිඋතුවිපරිවත්තජාතො. ඔපක්කමිකො අත්තනො, පරස්ස වා තාදිසඋපක්කමනිබ්බත්තො. විසමපරිහාරජො චිරාසනචිරට්ඨානාදිනා කායස්ස විසමපරිහරණතො ජාතො. සන්නිපාතජො සඤ්චයතො පට්ඨාය පච්චෙකං විසමාකාරතො දොසත්තයසමොධානතො ජාතො. කම්මසමුට්ඨානො උතුවිපරිණාමාදීහි විනා කම්මතො සමුට්ඨිතො. පිත්තසෙම්හවාතසමුට්ඨානා පන පිත්තාදීනං අධිකභාවෙනෙව වුත්තා. සබ්බස්සාපි හි රොගස්ස දොසත්තයං ආසන්නකාරණං දොසප්පකොපෙන විනා අභාවතො. කම්මං පධානකාරණං කතොකාසෙ එව තස්මිං උප්පජ්ජනතො, ඉතරං පන තස්ස සහකාරිකාරණං දට්ඨබ්බං. තයිදං පුබ්බෙකතහෙතුවාදිනො පටික්ඛිපන්ති. උපපජ්ජවෙදනීයඵලම්පි පුබ්බෙකතහෙතුකපක්ඛිකමෙව අතීතද්ධිකත්තා කම්මස්සාති අරුචිසූචනත්ථං කිර-සද්දග්ගහණං කරොති ‘‘උපපජ්ජවෙදනීයඤ්ච කිර පටික්ඛිපන්තී’’ති.
924. දාහකාරණතායාති රාගාදිදසවිධග්ගිදාහස්ස, නරකග්ගිදාහස්ස ච කාරණතාය.
926. පුථුනිමිත්තසභාවෙසූති පුථු නානාකිලෙසාදීනං කාරණසභාවෙසු.
931. අද්දනං අද්දා මද්දවො, අනෙකත්ථත්තා ධාතූනං තප්පටික්ඛෙපෙන අනද්දාති ආහ ‘‘අමුදුතා වා අනද්දා’’ති.
936. අයොනිසොමනසිකාරහෙතුකත්තා ආවජ්ජනාය අකුසලානුකූලකිච්චතා දට්ඨබ්බා.
තිකනිද්දෙසවණ්ණනා නිට්ඨිතා.