(6.) ඡක්කනිද්දෙසවණ්ණනා

944. ‘‘කොධනො හොති උපනාහී’’තිආදිනා කොධාදිහෙතුකා උපනාහාදයො කොධාදීනං සහායකාරණභාවෙන සුත්තන්තෙ වුත්තාති කොධාදයො එව විවාදමූලානි, තෙනෙත්ථ තෙ එව වුත්තා. සන්දිට්ඨිපරාමසිතා අත්තනො දිට්ඨියං අභිනිවිට්ඨතා.

945. අප්පතිස්සයොති පතිස්සයභූතෙහි ගරූහි විරහිතො. අප්පමාදලක්ඛණන්ති සතිඅවිප්පවාසං කුසලානුයොගසාතච්චං වා.

යුත්තපයුත්තතාති තන්නින්නතාවසෙන සුට්ඨු යුත්තතා. ගණසඞ්ගණිකා කිලෙසවසෙන පවත්තා සඞ්ගණිකා. ඉත්ථිපටිසංයුත්තකථාසවනෙ ඉත්ථිසද්දසවනෙ ච අස්සාදො සවනසංසග්ගො. ඉත්ථියා කස්සචි දානග්ගහණස්සාදො පරිභොගසංසග්ගො.

946. සොමනස්සෙන සද්ධිං උපවිචරන්තීති සොමනස්සුපවිචාරාති අකුසලසොමනස්සසහගතා රූපවිචාරාදයො ඉධාධිප්පෙතාති වෙදිතබ්බා, තථා උපෙක්ඛුපවිචාරා ච. තංසම්පයුත්තො වාති එතෙන විචාරග්ගහණෙන විතක්කොපි ගහිතොති විතක්කප්පවත්තනෙන ‘‘උපවිතක්කෙතී’’ති ඉදම්පි වුත්තං හොතීති දස්සෙති.

947. අඤ්ඤාණසම්පයුත්තාති විචිකිච්ඡුද්ධච්චසහගතචිත්තෙසු උපෙක්ඛා මොහොති වදන්ති, ලොභසම්පයුත්තුපෙක්ඛාපි පන ගෙහස්සිතා න න හොති.

948. අධිච්චසමුප්පන්නිකො ‘‘අධිච්ච සමුප්පන්නො අත්තා උප්පන්නො භවිස්සතී’’ති ගණ්හන්තො සස්සතදිට්ඨිකො හොතීති එවරූපස්ස දිට්ඨි වියාති දස්සෙන්තො ‘‘අධිච්චසමුප්පන්නිකස්සෙවා’’ති ආහ. න සො ජාතොති එත්ථ ‘‘ජාතූ’’ති අයං නිපාතො උ-කාරස්ස ඔ-කාරං කත්වා ජාතොති වුත්තො, තෙන වා සමානත්ථං නිපාතන්තරං එතං දට්ඨබ්බං. සබ්බාසවදිට්ඨීති සබ්බාසවපරියායෙන ආගතා දිට්ඨි.

ඡක්කනිද්දෙසවණ්ණනා නිට්ඨිතා.