10. දුතියඋප්පාදසුත්තං
530. ‘‘පඤ්චිමානි, භික්ඛවෙ, ඉන්ද්‍රියානි භාවිතානි බහුලීකතානි අනුප්පන්නානි උප්පජ්ජන්ති, නාඤ්ඤත්‍ර සුගතවිනයා. කතමානි පඤ්ච? සද්ධින්ද්‍රියං, වීරියින්ද්‍රියං, සතින්ද්‍රියං, සමාධින්ද්‍රියං, පඤ්ඤින්ද්‍රියං – ඉමානි ඛො, භික්ඛවෙ, පඤ්චින්ද්‍රියානි භාවිතානි බහුලීකතානි අනුප්පන්නානි උප්පජ්ජන්ති, නාඤ්ඤත්‍ර සුගතවිනයා’’ති. දසමං.
සූකරඛතවග්ගො ඡට්ඨො.
තස්සුද්දානං –
සාලං මල්ලිකං සෙඛො ච, පදං සාරං පතිට්ඨිතං;
බ්‍රහ්මසූකරඛතායො, උප්පාදා අපරෙ දුවෙති.