7. පඨමආමකධඤ්ඤපෙය්‍යාලවග්ගො

1. අඤ්ඤත්‍රසුත්තං

1131. අථ ඛො භගවා පරිත්තං නඛසිඛායං පංසුං ආරොපෙත්වා භික්ඛූ ආමන්තෙසි – ‘‘තං කිං මඤ්ඤථ, භික්ඛවෙ, කතමං නු ඛො බහුතරං – යො වායං මයා පරිත්තො නඛසිඛායං පංසු ආරොපිතො, අයං වා මහාපථවී’’ති? ‘‘එතදෙව, භන්තෙ, බහුතරං, යදිදං – මහාපථවී; අප්පමත්තකායං භගවතා පරිත්තො නඛසිඛායං පංසු ආරොපිතො. සඞ්ඛම්පි න උපෙති, උපනිධම්පි න උපෙති, කලභාගම්පි න උපෙති මහාපථවිං උපනිධාය භගවතා පරිත්තො නඛසිඛායං පංසු ආරොපිතො’’ති.

‘‘එවමෙව ඛො, භික්ඛවෙ, අප්පමත්තකා තෙ සත්තා යෙ මනුස්සෙසු පච්චාජායන්ති; අථ ඛො එතෙව බහුතරා සත්තා යෙ අඤ්ඤත්‍ර මනුස්සෙහි [මනුස්සෙසු (පී. ක.)] පච්චාජායන්ති. තං කිස්ස හෙතු? අදිට්ඨත්තා, භික්ඛවෙ, චතුන්නං අරියසච්චානං. කතමෙසං චතුන්නං? දුක්ඛස්ස අරියසච්චස්ස…පෙ… දුක්ඛනිරොධගාමිනියා පටිපදාය අරියසච්චස්ස’’.

‘‘තස්මාතිහ, භික්ඛවෙ, ‘ඉදං දුක්ඛ’න්ති යොගො කරණීයො…පෙ… ‘අයං දුක්ඛනිරොධගාමිනී පටිපදා’ති යොගො කරණීයො’’ති. පඨමං.

2. පච්චන්තසුත්තං

1132. අථ ඛො භගවා පරිත්තං නඛසිඛායං පංසුං ආරොපෙත්වා භික්ඛූ ආමන්තෙසි – ‘‘තං කිං මඤ්ඤථ, භික්ඛවෙ, කතමං නු ඛො බහුතරං – යො වායං මයා පරිත්තො නඛසිඛායං පංසු ආරොපිතො, අයං වා මහාපථවී’’ති? ‘‘එතදෙව, භන්තෙ, බහුතරං, යදිදං – මහාපථවී; අප්පමත්තකායං භගවතා පරිත්තො නඛසිඛායං පංසු ආරොපිතො. සඞ්ඛම්පි න උපෙති, උපනිධම්පි න උපෙති, කලභාගම්පි න උපෙති මහාපථවිං උපනිධාය භගවතා පරිත්තො නඛසිඛායං පංසු ආරොපිතො’’ති.

‘‘එවමෙව ඛො, භික්ඛවෙ, අප්පමත්තකා තෙ සත්තා යෙ මජ්ඣිමෙසු ජනපදෙසු පච්චාජායන්ති; අථ ඛො එතෙව බහුතරා සත්තා යෙ පච්චන්තිමෙසු ජනපදෙසු පච්චාජායන්ති අවිඤ්ඤාතාරෙසු මිලක්ඛෙසු [මිලක්ඛූසු (ස්‍යා. කං. ක.)] …පෙ…. දුතියං.

3. පඤ්ඤාසුත්තං

1133. … ‘‘එවමෙව ඛො, භික්ඛවෙ, අප්පකා තෙ සත්තා යෙ පන අරියෙන පඤ්ඤාචක්ඛුනා සමන්නාගතා; අථ ඛො එතෙව බහුතරා සත්තා යෙ අවිජ්ජාගතා සම්මුළ්හා…පෙ…. තතියං.

4. සුරාමෙරයසුත්තං

1134. … ‘‘එවමෙව ඛො, භික්ඛවෙ, අප්පකා තෙ සත්තා යෙ සුරාමෙරයමජ්ජප්පමාදට්ඨානා පටිවිරතා; අථ ඛො එතෙව බහුතරා සත්තා යෙ සුරාමෙරයමජ්ජප්පමාදට්ඨානා අපටිවිරතා…පෙ…. චතුත්ථං.

5. ඔදකසුත්තං

1135. … ‘‘එවමෙව ඛො, භික්ඛවෙ, අප්පකා තෙ සත්තා යෙ ථලජා; අථ ඛො එතෙව බහුතරා සත්තා යෙ උදකජා. තං කිස්ස හෙතු…පෙ…. පඤ්චමං.

6. මත්තෙය්‍යසුත්තං

1136. … ‘‘එවමෙව ඛො, භික්ඛවෙ, අප්පකා තෙ සත්තා යෙ මත්තෙය්‍යා; අථ ඛො එතෙව බහුතරා සත්තා යෙ අමත්තෙය්‍යා…පෙ…. ඡට්ඨං.

7. පෙත්තෙය්‍යසුත්තං

1137. … ‘‘එවමෙව ඛො, භික්ඛවෙ, අප්පකා තෙ සත්තා යෙ පෙත්තෙය්‍යා; අථ ඛො එතෙව බහුතරා සත්තා යෙ අපෙත්තෙය්‍යා…පෙ…. සත්තමං.

8. සාමඤ්ඤසුත්තං

1138. … ‘‘එවමෙව ඛො, භික්ඛවෙ, අප්පකා තෙ සත්තා යෙ සාමඤ්ඤා; අථ ඛො එතෙව බහුතරා සත්තා යෙ අසාමඤ්ඤා…පෙ…. අට්ඨමං.

9. බ්‍රහ්මඤ්ඤසුත්තං

1139. … ‘‘එවමෙව ඛො, භික්ඛවෙ, අප්පකා තෙ සත්තා යෙ බ්‍රහ්මඤ්ඤා; අථ ඛො එතෙව බහුතරා සත්තා යෙ අබ්‍රහ්මඤ්ඤා…පෙ…. නවමං.

10. පචායිකසුත්තං

1140. … ‘‘එවමෙව ඛො, භික්ඛවෙ, අප්පකා තෙ සත්තා යෙ කුලෙ ජෙට්ඨාපචායිනො; අථ ඛො එතෙව බහුතරා සත්තා යෙ කුලෙ අජෙට්ඨාපචායිනොති [අකුලෙ ජෙට්ඨාපචායිනොති (ස්‍යා. කං.)] …පෙ…. දසමං.

පඨමආමකධඤ්ඤපෙය්‍යාලවග්ගො සත්තමො.

තස්සුද්දානං –

අඤ්ඤත්‍ර පච්චන්තං පඤ්ඤා, සුරාමෙරයඔදකා;

මත්තෙය්‍ය පෙත්තෙය්‍යා චාපි, සාමඤ්ඤං බ්‍රහ්මපචායිකන්ති.