15. සෙට්ඨිපුත්තපෙතවත්ථු

802. [ජා. 1.4.54 ජාතකෙපි] ‘‘සට්ඨිවස්සසහස්සානි, පරිපුණ්ණානි සබ්බසො;

නිරයෙ පච්චමානානං, කදා අන්තො භවිස්සති’’.

803. [ජා. 1.4.55 ජාතකෙපි] ‘‘නත්ථි අන්තො කුතො අන්තො, න අන්තො පටිදිස්සති;

තථා හි පකතං පාපං, තුය්හං මය්හඤ්ච මාරිසා [මම තුය්හඤ්ච මාරිස (සී. ස්‍යා. පී.)].

804. [ජා. 1.4.53 ජාතකෙපි] ‘‘දුජ්ජීවිතමජීවම්හ, යෙ සන්තෙ න දදම්හසෙ;

සන්තෙසු දෙය්‍යධම්මෙසු, දීපං නාකම්හ අත්තනො.

805. [ජා. 1.4.56 ජාතකෙපි] ‘‘සොහං නූන ඉතො ගන්ත්වා, යොනිං ලද්ධාන මානුසිං;

වදඤ්ඤූ සීලසම්පන්නො, කාහාමි කුසලං බහු’’න්ති.

සෙට්ඨිපුත්තපෙතවත්ථු පන්නරසමං.