8. චූළසෙට්ඨිපෙතවත්ථු

246. ‘‘නග්ගො කිසො පබ්බජිතොසි භන්තෙ, රත්තිං කුහිං ගච්ඡසි කිස්ස හෙතු;

ආචික්ඛ මෙ තං අපි සක්කුණෙමු, සබ්බෙන විත්තං පටිපාදයෙ තුව’’න්ති.

247. ‘‘බාරාණසී නගරං දූරඝුට්ඨං, තත්ථාහං ගහපති අඩ්ඪකො අහු දීනො;

අදාතා ගෙධිතමනො ආමිසස්මිං, දුස්සීල්‍යෙන යමවිසයම්හි පත්තො.

248. ‘‘සො සූචිකාය කිලමිතො තෙහි,

තෙනෙව ඤාතීසු යාමි ආමිසකිඤ්චික්ඛහෙතු;

අදානසීලා න ච සද්දහන්ති,

දානඵලං හොති පරම්හි ලොකෙ.

249. ‘‘ධීතා ච මය්හං ලපතෙ අභික්ඛණං, ‘දස්සාමි දානං පිතූනං පිතාමහානං’;

තමුපක්ඛටං පරිවිසයන්ති බ්‍රාහ්මණා [බ්‍රාහ්මණෙ (සී.)], ‘යාමි අහං අන්ධකවින්දං භොත්තු’’’න්ති.

250. තමවොච රාජා ‘‘අනුභවියාන තම්පි,

එය්‍යාසි ඛිප්පං අහමපි කස්සං පූජං;

ආචික්ඛ මෙ තං යදි අත්ථි හෙතු,

සද්ධායිතං හෙතුවචො සුණොමා’’ති.

251. ‘තථා’ති වත්වා අගමාසි තත්ථ, භුඤ්ජිංසු භත්තං න ච දක්ඛිණාරහා;

පච්චාගමි රාජගහං පුනාපරං, පාතුරහොසි පුරතො ජනාධිපස්ස.

252. දිස්වාන පෙතං පුනදෙව ආගතං, රාජා අවොච ‘‘අහමපි කිං දදාමි;

ආචික්ඛ මෙ තං යදි අත්ථි හෙතු, යෙන තුවං චිරතරං පීණිතො සියා’’ති.

253. ‘‘බුද්ධඤ්ච සඞ්ඝං පරිවිසියාන රාජ, අන්නෙන පානෙන ච චීවරෙන;

තං දක්ඛිණං ආදිස මෙ හිතාය, එවං අහං චිරතරං පීණිතො සියා’’ති.

254. තතො ච රාජා නිපතිත්වා තාවදෙ [තාවදෙව (ස්‍යා.), තදෙව (ක.)], දානං සහත්ථා අතුලං දදිත්වා [අතුලඤ්ච දත්වා (ස්‍යා. ක.)] සඞ්ඝෙ;

ආරොචෙසි පකතං [ආරොචයී පකතිං (සී. ස්‍යා.)] තථාගතස්ස, තස්ස ච පෙතස්ස දක්ඛිණං ආදිසිත්ථ.

255. සො පූජිතො අතිවිය සොභමානො, පාතුරහොසි පුරතො ජනාධිපස්ස;

‘‘යක්ඛොහමස්මි පරමිද්ධිපත්තො, න මය්හමත්ථි සමා සදිසා [මය්හමිද්ධිසමසදිසා (සී. ස්‍යා.)] මානුසා.

256. ‘‘පස්සානුභාවං අපරිමිතං මමයිදං, තයානුදිට්ඨං අතුලං දත්වා සඞ්ඝෙ;

සන්තප්පිතො සතතං සදා බහූහි, යාමි අහං සුඛිතො මනුස්සදෙවා’’ති.

චූළසෙට්ඨිපෙතවත්ථු අට්ඨමං නිට්ඨිතං.

භාණවාරං පඨමං නිට්ඨිතං.