ධාතුථූපපූජා
239. අථ ඛො රාජා මාගධො අජාතසත්තු වෙදෙහිපුත්තො රාජගහෙ භගවතො සරීරානං ථූපඤ්ච මහඤ්ච අකාසි. වෙසාලිකාපි ලිච්ඡවී වෙසාලියං භගවතො සරීරානං ථූපඤ්ච මහඤ්ච අකංසු. කපිලවත්ථුවාසීපි සක්යා කපිලවත්ථුස්මිං භගවතො සරීරානං ථූපඤ්ච මහඤ්ච අකංසු. අල්ලකප්පකාපි බුලයො අල්ලකප්පෙ භගවතො සරීරානං ථූපඤ්ච මහඤ්ච අකංසු. රාමගාමකාපි කොළියා රාමගාමෙ භගවතො සරීරානං ථූපඤ්ච මහඤ්ච අකංසු. වෙට්ඨදීපකොපි බ්රාහ්මණො වෙට්ඨදීපෙ භගවතො සරීරානං ථූපඤ්ච මහඤ්ච අකාසි. පාවෙය්යකාපි මල්ලා පාවායං භගවතො සරීරානං ථූපඤ්ච මහඤ්ච අකංසු. කොසිනාරකාපි මල්ලා කුසිනාරායං භගවතො සරීරානං ථූපඤ්ච මහඤ්ච අකංසු. දොණොපි බ්රාහ්මණො තුම්බස්ස ථූපඤ්ච මහඤ්ච අකාසි. පිප්පලිවනියාපි මොරියා පිප්පලිවනෙ අඞ්ගාරානං ථූපඤ්ච මහඤ්ච අකංසු. ඉති අට්ඨ සරීරථූපා නවමො තුම්බථූපො දසමො අඞ්ගාරථූපො. එවමෙතං භූතපුබ්බන්ති.
240. අට්ඨදොණං චක්ඛුමතො සරීරං, සත්තදොණං ජම්බුදීපෙ මහෙන්ති.
එකඤ්ච දොණං පුරිසවරුත්තමස්ස, රාමගාමෙ නාගරාජා මහෙති.
එකාහි දාඨා තිදිවෙහි පූජිතා, එකා පන ගන්ධාරපුරෙ මහීයති;
කාලිඞ්ගරඤ්ඤො විජිතෙ පුනෙකං, එකං පන නාගරාජා මහෙති.
තස්සෙව තෙජෙන අයං වසුන්ධරා,
ආයාගසෙට්ඨෙහි මහී අලඞ්කතා;
එවං ඉමං චක්ඛුමතො සරීරං,
සුසක්කතං සක්කතසක්කතෙහි.
දෙවින්දනාගින්දනරින්දපූජිතො,
මනුස්සින්දසෙට්ඨෙහි තථෙව පූජිතො;
තං වන්දථ [තං තං වන්දථ (ස්යා.)] පඤ්ජලිකා ලභිත්වා,
බුද්ධො හවෙ කප්පසතෙහි දුල්ලභොති.
චත්තාලීස සමා දන්තා, කෙසා ලොමා ච සබ්බසො;
දෙවා හරිංසු එකෙකං, චක්කවාළපරම්පරාති.
මහාපරිනිබ්බානසුත්තං නිට්ඨිතං තතියං.