4. ධම්මදස්සනවාරවණ්ණනා
1007. චතුත්ථවාරෙ එකාදසායතනානීති සද්දායතනවජ්ජානි. තඤ්හි එකන්තෙන පටිසන්ධියං නුප්පජ්ජති. ඉමිනා නයෙන සබ්බත්ථ අත්ථො වෙදිතබ්බො. සත්තකෙ ‘‘දෙවානං අසුරාන’’න්ති ගතිවසෙන අවත්වා අවිසෙසෙන ගබ්භසෙය්‍යකානන්ති වුත්තං. තස්මා යත්ථ යත්ථ ගබ්භසෙය්‍යකා සම්භවන්ති තත්ථ තත්ථ තෙසං සත්තායතනානි වෙදිතබ්බානි. තථා ධාතුයො. සෙසමෙත්ථ උත්තානත්ථමෙව. පඤ්චමවාරෙ යං වත්තබ්බං තං ධම්මසඞ්ගහට්ඨකථායං වුත්තමෙව.