1. පණ්ණත්තිනිද්දෙසවාරවණ්ණනා
10-17. නිද්දෙසවාරෙ පන හෙට්ඨා ඛන්ධයමකස්ස පණ්ණත්තිවාරනිද්දෙසෙ වුත්තනයෙනෙව අත්ථො වෙදිතබ්බො. අඤ්ඤත්‍ර විසෙසා. තත්‍රායං විසෙසො – දිබ්බචක්ඛූති දුතියවිජ්ජාඤාණං. පඤ්ඤාචක්ඛූති තතියවිජ්ජාඤාණං. දිබ්බසොතන්ති දුතියඅභිඤ්ඤාඤාණං. තණ්හාසොතන්ති තණ්හාව. අවසෙසො කායොති නාමකායො, රූපකායො, හත්ථිකායො, අස්සකායොති එවමාදි. අවසෙසං රූපන්ති රූපායතනතො සෙසං භූතුපාදායරූපඤ්චෙව පියරූපසාතරූපඤ්ච. සීලගන්ධොතිආදීනි වායනට්ඨෙන සීලාදීනංයෙව නාමානි. අත්ථරසොතිආදීනිපි සාධුමධුරට්ඨෙන අත්ථාදීනඤ්ඤෙව නාමානි. අවසෙසො ධම්මොති පරියත්තිධම්මාදිඅනෙකප්පභෙදොති අයමෙත්ථ විසෙසො.
පණ්ණත්තිනිද්දෙසවාරවණ්ණනා.