9. න වත්තබ්බං සඞ්ඝස්ස දින්නං මහප්ඵලන්තිකථාවණ්ණනා
797-798. ඉදානි න වත්තබ්බං සඞ්ඝස්ස දින්නං මහප්ඵලන්තිකථා නාම හොති. තත්‍රාපි ‘‘මග්ගඵලානෙව සඞ්ඝො නාම, න ච සක්කා තෙසං කිඤ්චි දාතුං, න ච තෙහි පටිග්ගණ්හිතුං, නාපි තෙසං දානෙන කොචි උපකාරො ඉජ්ඣති, තස්මා න වත්තබ්බං සඞ්ඝස්ස දින්නං මහප්ඵල’’න්ති යෙසං ලද්ධි, සෙය්‍යථාපි තෙසංයෙව; තෙ සන්ධාය පුච්ඡා සකවාදිස්ස, පටිඤ්ඤා ඉතරස්ස. ආහුනෙය්‍යොතිආදි ‘‘යදි සඞ්ඝස්ස දින්නං මහප්ඵලං න භවෙය්‍ය, න නං සත්ථා එවං ථොමෙය්‍යා’’ති දස්සනත්ථං වුත්තං. සෙසං යථාපාළිමෙව නිය්‍යාතීති.
න වත්තබ්බං සඞ්ඝස්ස දින්නං මහප්ඵලන්තිකථාවණ්ණනා.