3. අද්ධාකථාවණ්ණනා
720-721. ඉදානි අද්ධාකථා නාම හොති. තත්ථ ‘‘තීණිමානි, භික්ඛවෙ, කථාවත්ථූනී’’ති (අ. නි. 3.68) සුත්තං නිස්සාය කාලසඞ්ඛාතො අද්ධා නාම පරිනිප්ඵන්නො අත්ථීති යෙසං ලද්ධි; තෙසං ‘‘අද්ධා නාම කොචි පරිනිප්ඵන්නො නත්ථි අඤ්ඤත්‍ර කාලපඤ්ඤත්තිමත්තා. රූපාදයො පන ඛන්ධාව පරිනිප්ඵන්නා’’ති විභාගං දස්සෙතුං අද්ධා පරිනිප්ඵන්නොති පුච්ඡා සකවාදිස්ස, පටිඤ්ඤා ඉතරස්ස. අථ නං ‘‘සචෙ සො පරිනිප්ඵන්නො, රූපාදීසු අනෙන අඤ්ඤතරෙන භවිතබ්බ’’න්ති චොදෙතුං රූපන්තිආදිමාහ. ඉතරො පටික්ඛිපති. සෙසං යථාපාළිමෙව නිය්‍යාතීති.
අද්ධාකථාවණ්ණනා.