1. සංවරො කම්මන්තිකථාවණ්ණනා
630-632. ඉදානි සංවරො කම්මන්තිකථා නාම හොති. තත්ථ ‘‘චක්ඛුනා රූපං දිස්වා නිමිත්තග්ගාහී හොති, න නිමිත්තග්ගාහී හොතී’’ති සුත්තං නිස්සාය ‘‘සංවරොපි අසංවරොපි කම්ම’’න්ති යෙසං ලද්ධි, සෙය්‍යථාපි මහාසංඝිකානං; තෙ සන්ධාය පුච්ඡා සකවාදිස්ස, පටිඤ්ඤා ඉතරස්ස.
අථ නං යා සකසමයෙ චෙතනා ‘‘කම්ම’’න්ති වුත්තා යථා සා කායවචීමනොද්වාරෙසු පවත්තමානා කායකම්මාදිනාමං ලභති, තථා ‘‘යදි තෙ සංවරො කම්මං, සොපි චක්ඛුන්ද්‍රියාදීසු පවත්තමානො චක්ඛුකම්මාදිනාමං ලභෙය්‍යා’’ති චොදෙතුං චක්ඛුන්ද්‍රියසංවරො චක්ඛුකම්මන්තිආදිමාහ. ඉතරො තාදිසං සුත්තපදං අපස්සන්තො චතූසු ද්වාරෙසු පටික්ඛිපිත්වා පඤ්චමෙ කායද්වාරෙ පසාදකායං සන්ධාය පටික්ඛිපති, විඤ්ඤත්තිකායං සන්ධාය පටිජානාති. සො හි පසාදකායම්පි විඤ්ඤත්තිකායම්පි කායින්ද්‍රියන්ත්වෙව ඉච්ඡති. මනොද්වාරෙපි විපාකද්වාරං සන්ධාය පටික්ඛිපති, කම්මද්වාරං සන්ධාය පටිජානාති. අසංවරෙපි එසෙව නයො. ‘‘චක්ඛුනා රූපං දිස්වා’’ති සුත්තං තෙසු ද්වාරෙසු සංවරාසංවරමෙව දීපෙති, න තස්ස කම්මභාවං, තස්මා අසාධකන්ති.
සංවරො කම්මන්තිකථාවණ්ණනා.