2. රූපංමග්ගොතිකථාවණ්ණනා

573-575. ඉදානි රූපං මග්ගොතිකථා නාම හොති. තත්ථ යෙසං ‘‘සම්මාවාචාකම්මන්තාජීවා රූප’’න්ති ලද්ධි, සෙය්‍යථාපි මහිසාසකසම්මිතියමහාසංඝිකානං; තෙ සන්ධාය මග්ගසමඞ්ගිස්සාති පුච්ඡා සකවාදිස්ස, පටිඤ්ඤා ඉතරස්ස. අථ නං ‘‘යදි තෙ සම්මාවාචාදයො රූපං, න විරතියො, යථා සම්මාදිට්ඨාදිමග්ගො සාරම්මණාදිසභාවො, එවං තම්පි රූපං සියා’’ති චොදෙතුං සාරම්මණොතිආදිමාහ. තත්ථ පටික්ඛෙපො ච පටිඤ්ඤා ච පරවාදිනො ලද්ධිඅනුරූපෙන වෙදිතබ්බා. සෙසමෙත්ථ උත්තානත්ථමෙවාති.

රූපං මග්ගොතිකථාවණ්ණනා.