11. අවිඤ්ඤත්ති දුස්සීල්‍යන්තිකථාවණ්ණනා
603-604. ඉදානි අවිඤ්ඤත්ති දුස්සීල්‍යන්තිකථා නාම හොති. තත්ථ චිත්තවිප්පයුත්තං අපුඤ්ඤූපචයඤ්චෙව ආණත්තියා ච පාණාතිපාතාදීසු අඞ්ගපාරිපූරිං සන්ධාය ‘‘අවිඤ්ඤත්ති දුස්සීල්‍ය’’න්ති යෙසං ලද්ධි, සෙය්‍යථාපි මහාසංඝිකානං, තෙ සන්ධාය පුච්ඡා සකවාදිස්ස, පටිඤ්ඤා ඉතරස්ස. අථ නං ‘‘සචෙ සා දුස්සීල්‍යං, පාණාතිපාතාදීසු අඤ්ඤතරා සියා’’ති චොදෙතුං පාණාතිපාතොතිආදිමාහ. පාපකම්මං සමාදියිත්වාති ‘‘අසුකං නාම ඝාතෙස්සාමි, අසුකං භණ්ඩං අවහරිස්සාමී’’ති එවං පාපසමාදානං කත්වා. උභො වඩ්ඪන්තීති පුට්ඨො දානක්ඛණෙ පාපස්ස අනුප්පත්තිං සන්ධාය පටික්ඛිපති. දුතියං පුට්ඨො චිත්තවිප්පයුත්තං පාපූපචයං සන්ධාය පටිජානාති. සෙසමෙත්ථ පරිභොගමයකථායං වුත්තනයෙනෙව වෙදිතබ්බං. ලද්ධිපතිට්ඨාපනම්පිස්ස පාපසමාදින්නපුබ්බභාගමෙව සාධෙති; න අවිඤ්ඤත්තියා දුස්සීලභාවන්ති.
අවිඤ්ඤත්ති දුස්සීල්‍යන්තිකථාවණ්ණනා.
දසමො වග්ගො.
දුතියපණ්ණාසකො සමත්තො.