6. දුක්ඛාහාරකථාවණ්ණනා

334. ඉදානි දුක්ඛාහාරකථා නාම හොති. තත්ථ ‘‘දුක්ඛං දුක්ඛන්ති වාචං භාසන්තො දුක්ඛෙ ඤාණං ආහරති, තං දුක්ඛාහාරො නාම වුච්චති. තඤ්ච පනෙතං මග්ගඞ්ගං මග්ගපරියාපන්න’’න්ති යෙසං ලද්ධි, සෙය්‍යථාපි එතරහි පුබ්බසෙලියානං; තෙ සන්ධාය දුක්ඛාහාරොති පුච්ඡා සකවාදිස්ස, පටිඤ්ඤා පරවාදිස්ස. යෙ කෙචීති පඨමපඤ්හෙ අවිපස්සකෙ සන්ධාය පටික්ඛිපති, දුතියපඤ්හෙ විපස්සකෙ සන්ධාය පටිජානාති, තං පනස්ස ලද්ධිමත්තමෙව. තස්මා ‘‘සබ්බෙ තෙ’’ති වාදස්ස භින්දනත්ථං බාලපුථුජ්ජනාතිආදිමාහ. තං උත්තානත්ථමෙවාති.

දුක්ඛාහාරකථාවණ්ණනා.