2. අබ්භන්තරමාතිකාවණ්ණනා

2. පඤ්චක්ඛන්ධා …පෙ… මනසිකාරොති අයං පඤ්චවීසාධිකෙන පදසතෙන නික්ඛිත්තා අබ්භන්තරමාතිකා නාම. අයඤ්හි ‘‘සබ්බාපි ධම්මසඞ්ගණී ධාතුකථාය මාතිකා’’ති එවං අවත්වා සඞ්ගහාදිනා නයෙන විභජිතබ්බෙ ඛන්ධාදිධම්මෙ සරූපතො දස්සෙත්වා ධාතුකථාය අබ්භන්තරෙයෙව ඨපිතත්තා අබ්භන්තරමාතිකාති වුච්චති. ඛන්ධාදිපදානං ධම්මසඞ්ගණීමාතිකාය අසඞ්ගහිතත්තා පකිණ්ණකමාතිකාතිපි වත්තුං වට්ටති.