(4) පච්චුප්පන්නාතීතවාරො
(ක) අනුලොමපුග්ගලො
199. (ක) යස්ස කුසලා ධම්මා උප්පජ්ජන්ති තස්ස අකුසලා ධම්මා නිරුජ්ඣිත්ථාති? ආමන්තා.
(ඛ) යස්ස වා පන අකුසලා ධම්මා නිරුජ්ඣිත්ථ තස්ස කුසලා ධම්මා උප්පජ්ජන්තීති?
සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං අකුසලා ධම්මා නිරුජ්ඣිත්ථ, නො ච තෙසං කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං අකුසලා ච ධම්මා නිරුජ්ඣිත්ථ කුසලා ච ධම්මා උප්පජ්ජන්ති.
(ක) යස්ස කුසලා ධම්මා උප්පජ්ජන්ති තස්ස අබ්‍යාකතා ධම්මා නිරුජ්ඣිත්ථාති? ආමන්තා.
(ඛ) යස්ස වා පන අබ්‍යාකතා ධම්මා නිරුජ්ඣිත්ථ තස්ස කුසලා ධම්මා උප්පජ්ජන්තීති?
සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං අබ්‍යාකතා ධම්මා නිරුජ්ඣිත්ථ, නො ච තෙසං කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං අබ්‍යාකතා ච ධම්මා නිරුජ්ඣිත්ථ කුසලා ච ධම්මා උප්පජ්ජන්ති.
200. (ක) යස්ස අකුසලා ධම්මා උප්පජ්ජන්ති තස්ස අබ්‍යාකතා ධම්මා නිරුජ්ඣිත්ථාති? ආමන්තා.
(ඛ) යස්ස වා පන අබ්‍යාකතා ධම්මා නිරුජ්ඣිත්ථ තස්ස අකුසලා ධම්මා උප්පජ්ජන්තීති?
සබ්බෙසං චිත්තස්ස භඞ්ගක්ඛණෙ අකුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං අබ්‍යාකතා ධම්මා නිරුජ්ඣිත්ථ, නො ච තෙසං අකුසලා ධම්මා උප්පජ්ජන්ති. අකුසලානං උප්පාදක්ඛණෙ තෙසං අබ්‍යාකතා ච ධම්මා නිරුජ්ඣිත්ථ අකුසලා ච ධම්මා උප්පජ්ජන්ති.
(ඛ) අනුලොමඔකාසො
201. යත්ථ කුසලා ධම්මා උප්පජ්ජන්ති තත්ථ අකුසලා ධම්මා නිරුජ්ඣිත්ථාති?…පෙ….
(ග) අනුලොමපුග්ගලොකාසා
202. (ක) යස්ස යත්ථ කුසලා ධම්මා උප්පජ්ජන්ති තස්ස තත්ථ අකුසලා ධම්මා නිරුජ්ඣිත්ථාති? ආමන්තා.
(ඛ) යස්ස වා පන යත්ථ අකුසලා ධම්මා නිරුජ්ඣිත්ථ තස්ස තත්ථ කුසලා ධම්මා උප්පජ්ජන්තීති?
සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ තෙසං තත්ථ අකුසලා ධම්මා නිරුජ්ඣිත්ථ, නො ච තෙසං තත්ථ කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං තත්ථ අකුසලා ච ධම්මා නිරුජ්ඣිත්ථ කුසලා ච ධම්මා උප්පජ්ජන්ති.
(ක) යස්ස යත්ථ කුසලා ධම්මා උප්පජ්ජන්ති තස්ස තත්ථ අබ්‍යාකතා ධම්මා නිරුජ්ඣිත්ථාති? ආමන්තා.
(ඛ) යස්ස වා පන යත්ථ අබ්‍යාකතා ධම්මා නිරුජ්ඣිත්ථ තස්ස තත්ථ කුසලා ධම්මා උප්පජ්ජන්තීති?
සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ අබ්‍යාකතා ධම්මා නිරුජ්ඣිත්ථ, නො ච තෙසං තත්ථ කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං තත්ථ අබ්‍යාකතා ච ධම්මා නිරුජ්ඣිත්ථ කුසලා ච ධම්මා උප්පජ්ජන්ති.
203. (ක) යස්ස යත්ථ අකුසලා ධම්මා උප්පජ්ජන්ති තස්ස තත්ථ අබ්‍යාකතා ධම්මා නිරුජ්ඣිත්ථාති? ආමන්තා.
(ඛ) යස්ස වා පන යත්ථ අබ්‍යාකතා ධම්මා නිරුජ්ඣිත්ථ තස්ස තත්ථ අකුසලා ධම්මා උප්පජ්ජන්තීති?
සබ්බෙසං චිත්තස්ස භඞ්ගක්ඛණෙ අකුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ අබ්‍යාකතා ධම්මා නිරුජ්ඣිත්ථ, නො ච තෙසං තත්ථ අකුසලා ධම්මා උප්පජ්ජන්ති. අකුසලානං උප්පාදක්ඛණෙ තෙසං තත්ථ අබ්‍යාකතා ච ධම්මා නිරුජ්ඣිත්ථ අකුසලා ච ධම්මා උප්පජ්ජන්ති.
(ඝ) පච්චනීකපුග්ගලො
204. (ක) යස්ස කුසලා ධම්මා න උප්පජ්ජන්ති තස්ස අකුසලා ධම්මා න නිරුජ්ඣිත්ථාති? නිරුජ්ඣිත්ථ.
(ඛ) යස්ස වා පන අකුසලා ධම්මා න නිරුජ්ඣිත්ථ තස්ස කුසලා ධම්මා න උප්පජ්ජන්තීති? නත්ථි.
(ක) යස්ස කුසලා ධම්මා න උප්පජ්ජන්ති තස්ස අබ්‍යාකතා ධම්මා න නිරුජ්ඣිත්ථාති? නිරුජ්ඣිත්ථ.
(ඛ) යස්ස වා පන අබ්‍යාකතා ධම්මා න නිරුජ්ඣිත්ථ තස්ස කුසලා ධම්මා න උප්පජ්ජන්තීති? නත්ථි.
205. (ක) යස්ස අකුසලා ධම්මා න උප්පජ්ජන්ති තස්ස අබ්‍යාකතා ධම්මා න නිරුජ්ඣිත්ථාති? නිරුජ්ඣිත්ථ.
(ඛ) යස්ස වා පන අබ්‍යාකතා ධම්මා න නිරුජ්ඣිත්ථ තස්ස අකුසලා ධම්මා න උප්පජ්ජන්තීති? නත්ථි.
(ඞ) පච්චනීකඔකාසො
206. යත්ථ කුසලා ධම්මා න උප්පජ්ජන්ති තත්ථ අකුසලා ධම්මා න නිරුජ්ඣිත්ථාති?…පෙ….
(ච) පච්චනීකපුග්ගලොකාසා
207. (ක) යස්ස යත්ථ කුසලා ධම්මා න උප්පජ්ජන්ති තස්ස තත්ථ අකුසලා ධම්මා න නිරුජ්ඣිත්ථාති?
සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ තෙසං තත්ථ කුසලා ධම්මා න උප්පජ්ජන්ති, නො ච තෙසං තත්ථ අකුසලා ධම්මා න නිරුජ්ඣිත්ථ. සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ කුසලා ච ධම්මා න උප්පජ්ජන්ති අකුසලා ච ධම්මා න නිරුජ්ඣිත්ථ.
(ඛ) යස්ස වා පන යත්ථ අකුසලා ධම්මා න නිරුජ්ඣිත්ථ තස්ස තත්ථ කුසලා ධම්මා න උප්පජ්ජන්තීති? ආමන්තා.
(ක) යස්ස යත්ථ කුසලා ධම්මා න උප්පජ්ජන්ති තස්ස තත්ථ අබ්‍යාකතා ධම්මා න නිරුජ්ඣිත්ථාති?
සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ කුසලා ධම්මා න උප්පජ්ජන්ති, නො ච තෙසං තත්ථ අබ්‍යාකතා ධම්මා න නිරුජ්ඣිත්ථ. සුද්ධාවාසං උපපජ්ජන්තානං තෙසං තත්ථ කුසලා ච ධම්මා න උප්පජ්ජන්ති අබ්‍යාකතා ච ධම්මා න නිරුජ්ඣිත්ථ.
(ඛ) යස්ස වා පන යත්ථ අබ්‍යාකතා ධම්මා න නිරුජ්ඣිත්ථ තස්ස තත්ථ කුසලා ධම්මා න උප්පජ්ජන්තීති? ආමන්තා.
208. (ක) යස්ස යත්ථ අකුසලා ධම්මා න උප්පජ්ජන්ති තස්ස තත්ථ අබ්‍යාකතා ධම්මා න නිරුජ්ඣිත්ථාති?
සබ්බෙසං චිත්තස්ස භඞ්ගක්ඛණෙ අකුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ අකුසලා ධම්මා න උප්පජ්ජන්ති, නො ච තෙසං තත්ථ අබ්‍යාකතා ධම්මා න නිරුජ්ඣිත්ථ. සුද්ධාවාසං උපපජ්ජන්තානං තෙසං තත්ථ අකුසලා ච ධම්මා න උප්පජ්ජන්ති අබ්‍යාකතා ච ධම්මා න නිරුජ්ඣිත්ථ.
(ඛ) යස්ස වා පන යත්ථ අබ්‍යාකතා ධම්මා න නිරුජ්ඣිත්ථ තස්ස තත්ථ අකුසලා ධම්මා න උප්පජ්ජන්තීති? ආමන්තා.