(5) පච්චුප්පන්නානාගතවාරො

(ක) අනුලොමපුග්ගලො

79. (ක) යස්ස කුසලා ධම්මා උප්පජ්ජන්ති තස්ස අකුසලා ධම්මා උප්පජ්ජිස්සන්තීති?

අග්ගමග්ගස්ස උප්පාදක්ඛණෙ යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස උප්පාදක්ඛණෙ තෙසං කුසලා ධම්මා උප්පජ්ජන්ති, නො ච තෙසං අකුසලා ධම්මා උප්පජ්ජිස්සන්ති. ඉතරෙසං කුසලානං උප්පාදක්ඛණෙ තෙසං කුසලා ච ධම්මා උප්පජ්ජන්ති අකුසලා ච ධම්මා උප්පජ්ජිස්සන්ති.

(ඛ) යස්ස වා පන අකුසලා ධම්මා උප්පජ්ජිස්සන්ති තස්ස කුසලා ධම්මා උප්පජ්ජන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං අකුසලා ධම්මා උප්පජ්ජිස්සන්ති, නො ච තෙසං කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං අකුසලා ච ධම්මා උප්පජ්ජිස්සන්ති කුසලා ච ධම්මා උප්පජ්ජන්ති.

(ක) යස්ස කුසලා ධම්මා උප්පජ්ජන්ති තස්ස අබ්‍යාකතා ධම්මා උප්පජ්ජිස්සන්තීති? ආමන්තා.

(ඛ) යස්ස වා පන අබ්‍යාකතා ධම්මා උප්පජ්ජිස්සන්ති තස්ස කුසලා ධම්මා උප්පජ්ජන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං අබ්‍යාකතා ධම්මා උප්පජ්ජිස්සන්ති, නො ච තෙසං කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං අබ්‍යාකතා ච ධම්මා උප්පජ්ජිස්සන්ති කුසලා ච ධම්මා උප්පජ්ජන්ති.

80. (ක) යස්ස අකුසලා ධම්මා උප්පජ්ජන්ති තස්ස අබ්‍යාකතා ධම්මා උප්පජ්ජිස්සන්තීති? ආමන්තා.

(ඛ) යස්ස වා පන අබ්‍යාකතා ධම්මා උප්පජ්ජිස්සන්ති තස්ස අකුසලා ධම්මා උප්පජ්ජන්තීති?

සබ්බෙසං චිත්තස්ස භඞ්ගක්ඛණෙ අකුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං අබ්‍යාකතා ධම්මා උප්පජ්ජිස්සන්ති, නො ච තෙසං අකුසලා ධම්මා උප්පජ්ජන්ති. අකුසලානං උප්පාදක්ඛණෙ තෙසං අබ්‍යාකතා ච ධම්මා උප්පජ්ජිස්සන්ති අකුසලා ච ධම්මා උප්පජ්ජන්ති.

(ඛ) අනුලොමඔකාසො

81. යත්ථ කුසලා ධම්මා උප්පජ්ජන්ති තත්ථ අකුසලා ධම්මා උප්පජ්ජිස්සන්තීති?…පෙ….

(ග) අනුලොමපුග්ගලොකාසා

82. (ක) යස්ස යත්ථ කුසලා ධම්මා උප්පජ්ජන්ති තස්ස තත්ථ අකුසලා ධම්මා උප්පජ්ජිස්සන්තීති?

අග්ගමග්ගස්ස උප්පාදක්ඛණෙ යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස උප්පාදක්ඛණෙ තෙසං තත්ථ කුසලා ධම්මා උප්පජ්ජන්ති, නො ච තෙසං තත්ථ අකුසලා ධම්මා උප්පජ්ජිස්සන්ති. ඉතරෙසං කුසලානං උප්පාදක්ඛණෙ තෙසං තත්ථ කුසලා ච ධම්මා උප්පජ්ජන්ති අකුසලා ච ධම්මා උප්පජ්ජිස්සන්ති.

(ඛ) යස්ස වා පන යත්ථ අකුසලා ධම්මා උප්පජ්ජිස්සන්ති තස්ස තත්ථ කුසලා ධම්මා උප්පජ්ජන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ තෙසං තත්ථ අකුසලා ධම්මා උප්පජ්ජිස්සන්ති, නො ච තෙසං තත්ථ කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං තත්ථ අකුසලා ච ධම්මා උප්පජ්ජිස්සන්ති කුසලා ච ධම්මා උප්පජ්ජන්ති.

(ක) යස්ස යත්ථ කුසලා ධම්මා උප්පජ්ජන්ති තස්ස තත්ථ අබ්‍යාකතා ධම්මා උප්පජ්ජිස්සන්තීති? ආමන්තා.

(ඛ) යස්ස වා පන යත්ථ අබ්‍යාකතා ධම්මා උප්පජ්ජිස්සන්ති තස්ස තත්ථ කුසලා ධම්මා උප්පජ්ජන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ අබ්‍යාකතා ධම්මා උප්පජ්ජිස්සන්ති, නො ච තෙසං තත්ථ කුසලා ධම්මා උප්පජ්ජන්ති. කුසලානං උප්පාදක්ඛණෙ තෙසං තත්ථ අබ්‍යාකතා ච ධම්මා උප්පජ්ජිස්සන්ති කුසලා ච ධම්මා උප්පජ්ජන්ති.

83. (ක) යස්ස යත්ථ අකුසලා ධම්මා උප්පජ්ජන්ති තස්ස තත්ථ අබ්‍යාකතා ධම්මා උප්පජ්ජිස්සන්තීති? ආමන්තා.

(ඛ) යස්ස වා පන යත්ථ අබ්‍යාකතා ධම්මා උප්පජ්ජිස්සන්ති තස්ස තත්ථ අකුසලා ධම්මා උප්පජ්ජන්තීති?

සබ්බෙසං චිත්තස්ස භඞ්ගක්ඛණෙ අකුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ අබ්‍යාකතා ධම්මා උප්පජ්ජිස්සන්ති, නො ච තෙසං තත්ථ අකුසලා ධම්මා උප්පජ්ජන්ති. අකුසලානං උප්පාදක්ඛණෙ තෙසං තත්ථ අබ්‍යාකතා ච ධම්මා උප්පජ්ජිස්සන්ති අකුසලා ච ධම්මා උප්පජ්ජන්ති.

(ඝ) පච්චනීකපුග්ගලො

84. (ක) යස්ස කුසලා ධම්මා න උප්පජ්ජන්ති තස්ස අකුසලා ධම්මා න උප්පජ්ජිස්සන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං කුසලා ධම්මා න උප්පජ්ජන්ති, නො ච තෙසං අකුසලා ධම්මා න උප්පජ්ජිස්සන්ති. අග්ගමග්ගස්ස භඞ්ගක්ඛණෙ අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස භඞ්ගක්ඛණෙ තෙසං කුසලා ච ධම්මා න උප්පජ්ජන්ති අකුසලා ච ධම්මා න උප්පජ්ජිස්සන්ති.

(ඛ) යස්ස වා පන අකුසලා ධම්මා න උප්පජ්ජිස්සන්ති තස්ස කුසලා ධම්මා න උප්පජ්ජන්තීති?

අග්ගමග්ගස්ස උප්පාදක්ඛණෙ යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස උප්පාදක්ඛණෙ තෙසං අකුසලා ධම්මා න උප්පජ්ජිස්සන්ති, නො ච තෙසං කුසලා ධම්මා න උප්පජ්ජන්ති. අග්ගමග්ගස්ස භඞ්ගක්ඛණෙ අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස භඞ්ගක්ඛණෙ තෙසං අකුසලා ච ධම්මා න උප්පජ්ජිස්සන්ති කුසලා ච ධම්මා න උප්පජ්ජන්ති.

(ක) යස්ස කුසලා ධම්මා න උප්පජ්ජන්ති තස්ස අබ්‍යාකතා ධම්මා න උප්පජ්ජිස්සන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං කුසලා ධම්මා න උප්පජ්ජන්ති, නො ච තෙසං අබ්‍යාකතා ධම්මා න උප්පජ්ජිස්සන්ති. පච්ඡිමචිත්තසමඞ්ගීනං තෙසං කුසලා ච ධම්මා න උප්පජ්ජන්ති අබ්‍යාකතා ච ධම්මා න උප්පජ්ජිස්සන්ති.

(ඛ) යස්ස වා පන අබ්‍යාකතා ධම්මා න උප්පජ්ජිස්සන්ති තස්ස කුසලා ධම්මා න උප්පජ්ජන්තීති? ආමන්තා.

85. (ක) යස්ස අකුසලා ධම්මා න උප්පජ්ජන්ති තස්ස අබ්‍යාකතා ධම්මා න උප්පජ්ජිස්සන්තීති?

සබ්බෙසං චිත්තස්ස භඞ්ගක්ඛණෙ අකුසලවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං අකුසලා ධම්මා න උප්පජ්ජන්ති, නො ච තෙසං අබ්‍යාකතා ධම්මා න උප්පජ්ජිස්සන්ති. පච්ඡිමචිත්තසමඞ්ගීනං තෙසං අකුසලා ච ධම්මා න උප්පජ්ජන්ති අබ්‍යාකතා ච ධම්මා න උප්පජ්ජිස්සන්ති.

(ඛ) යස්ස වා පන අබ්‍යාකතා ධම්මා න උප්පජ්ජිස්සන්ති තස්ස අකුසලා ධම්මා න උප්පජ්ජන්තීති? ආමන්තා.

(ඞ) පච්චනීකඔකාසො

86. යත්ථ කුසලා ධම්මා න උප්පජ්ජන්ති තත්ථ අකුසලා ධම්මා න උප්පජ්ජිස්සන්තීති?…පෙ….

(ච) පච්චනීකපුග්ගලොකාසා

87. (ක) යස්ස යත්ථ කුසලා ධම්මා න උප්පජ්ජන්ති තස්ස තත්ථ අකුසලා ධම්මා න උප්පජ්ජිස්සන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ තෙසං තත්ථ කුසලා ධම්මා න උප්පජ්ජන්ති, නො ච තෙසං තත්ථ අකුසලා ධම්මා න උප්පජ්ජිස්සන්ති. අග්ගමග්ගස්ස භඞ්ගක්ඛණෙ අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස භඞ්ගක්ඛණෙ අසඤ්ඤසත්තානං තෙසං තත්ථ කුසලා ච ධම්මා න උප්පජ්ජන්ති අකුසලා ච ධම්මා න උප්පජ්ජිස්සන්ති.

(ඛ) යස්ස වා පන යත්ථ අකුසලා ධම්මා න උප්පජ්ජිස්සන්ති තස්ස තත්ථ කුසලා ධම්මා න උප්පජ්ජන්තීති?

අග්ගමග්ගස්ස උප්පාදක්ඛණෙ යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස උප්පාදක්ඛණෙ තෙසං තත්ථ අකුසලා ධම්මා න උප්පජ්ජිස්සන්ති, නො ච තෙසං තත්ථ කුසලා ධම්මා න උප්පජ්ජන්ති. අග්ගමග්ගස්ස භඞ්ගක්ඛණෙ අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති තස්ස චිත්තස්ස භඞ්ගක්ඛණෙ අසඤ්ඤසත්තානං තෙසං තත්ථ අකුසලා ච ධම්මා න උප්පජ්ජිස්සන්ති කුසලා ච ධම්මා න උප්පජ්ජන්ති.

(ක) යස්ස යත්ථ කුසලා ධම්මා න උප්පජ්ජන්ති තස්ස තත්ථ අබ්‍යාකතා ධම්මා න උප්පජ්ජිස්සන්තීති?

සබ්බෙසං චිත්තස්ස භඞ්ගක්ඛණෙ කුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ කුසලා ධම්මා න උප්පජ්ජන්ති, නො ච තෙසං තත්ථ අබ්‍යාකතා ධම්මා න උප්පජ්ජිස්සන්ති. පච්ඡිමචිත්තසමඞ්ගීනං තෙසං තත්ථ කුසලා ච ධම්මා න උප්පජ්ජන්ති අබ්‍යාකතා ච ධම්මා න උප්පජ්ජිස්සන්ති.

(ඛ) යස්ස වා පන යත්ථ අබ්‍යාකතා ධම්මා න උප්පජ්ජිස්සන්ති තස්ස තත්ථ කුසලා ධම්මා න උප්පජ්ජන්තීති? ආමන්තා.

88. (ක) යස්ස යත්ථ අකුසලා ධම්මා න උප්පජ්ජන්ති තස්ස තත්ථ අබ්‍යාකතා ධම්මා න උප්පජ්ජිස්සන්තීති?

සබ්බෙසං චිත්තස්ස භඞ්ගක්ඛණෙ අකුසලවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ අකුසලා ධම්මා න උප්පජ්ජන්ති, නො ච තෙසං තත්ථ අබ්‍යාකතා ධම්මා න උප්පජ්ජිස්සන්ති. පච්ඡිමචිත්තසමඞ්ගීනං තෙසං තත්ථ අකුසලා ච ධම්මා න උප්පජ්ජන්ති අබ්‍යාකතා ච ධම්මා න උප්පජ්ජිස්සන්ති.

(ඛ) යස්ස වා පන යත්ථ අබ්‍යාකතා ධම්මා න උප්පජ්ජිස්සන්ති තස්ස තත්ථ අකුසලා ධම්මා න උප්පජ්ජන්තීති? ආමන්තා.