1. පදසොධනවාරො

(ක) අනුලොමං

10. (ක) දුක්ඛං දුක්ඛසච්චන්ති? ආමන්තා.

(ඛ) දුක්ඛසච්චං දුක්ඛන්ති?

කායිකං දුක්ඛං චෙතසිකං දුක්ඛං ඨපෙත්වා අවසෙසං දුක්ඛසච්චං [අවසෙසං දුක්ඛසච්චං දුක්ඛසච්චං (ස්‍යා.) එවමුපරිපි], න දුක්ඛං. කායිකං දුක්ඛං චෙතසිකං දුක්ඛං දුක්ඛඤ්චෙව දුක්ඛසච්චඤ්ච.

(ක) සමුදයො සමුදයසච්චන්ති?

සමුදයසච්චං ඨපෙත්වා අවසෙසො සමුදයො, න සමුදයසච්චං. සමුදයසච්චං සමුදයො චෙව සමුදයසච්චඤ්ච.

(ඛ) සමුදයසච්චං සමුදයොති? ආමන්තා.

(ක) නිරොධො නිරොධසච්චන්ති?

නිරොධසච්චං ඨපෙත්වා අවසෙසො නිරොධො, න නිරොධසච්චං. නිරොධසච්චං නිරොධො චෙව නිරොධසච්චඤ්ච.

(ඛ) නිරොධසච්චං නිරොධොති? ආමන්තා.

(ක) මග්ගො මග්ගසච්චන්ති?

මග්ගසච්චං ඨපෙත්වා අවසෙසො මග්ගො, න මග්ගසච්චං. මග්ගසච්චං මග්ගො චෙව මග්ගසච්චඤ්ච.

(ඛ) මග්ගසච්චං මග්ගොති? ආමන්තා.

(ඛ) පච්චනීකං

11. (ක) න දුක්ඛං න දුක්ඛසච්චන්ති?

කායිකං දුක්ඛං චෙතසිකං දුක්ඛං ඨපෙත්වා අවසෙසං න දුක්ඛං [අවසෙසං දුක්ඛසච්චං න දුක්ඛං (සී. ස්‍යා. ක.) එවං අවසෙසෙසු තීසු සච්චෙසු] දුක්ඛසච්චං. දුක්ඛඤ්ච දුක්ඛසච්චඤ්ච ඨපෙත්වා අවසෙසං න චෙව දුක්ඛං න ච දුක්ඛසච්චං.

(ඛ) න දුක්ඛසච්චං න දුක්ඛන්ති? ආමන්තා.

(ක) න සමුදයො න සමුදයසච්චන්ති? ආමන්තා.

(ඛ) න සමුදයසච්චං න සමුදයොති?

සමුදයසච්චං ඨපෙත්වා අවසෙසො න සමුදයසච්චං, සමුදයො. සමුදයඤ්ච සමුදයසච්චඤ්ච ඨපෙත්වා අවසෙසො න චෙව සමුදයො න ච සමුදයසච්චං.

(ක) න නිරොධො න නිරොධසච්චන්ති? ආමන්තා.

(ඛ) න නිරොධසච්චං න නිරොධොති?

නිරොධසච්චං ඨපෙත්වා අවසෙසො න නිරොධසච්චං, නිරොධො. නිරොධඤ්ච නිරොධසච්චඤ්ච ඨපෙත්වා අවසෙසො න චෙව නිරොධො න ච නිරොධසච්චං.

(ක) න මග්ගො න මග්ගසච්චන්ති? ආමන්තා.

(ඛ) න මග්ගසච්චං න මග්ගොති?

මග්ගසච්චං ඨපෙත්වා අවසෙසො න මග්ගසච්චං, මග්ගො. මග්ගඤ්ච මග්ගසච්චඤ්ච ඨපෙත්වා අවසෙසො න චෙව මග්ගො න ච මග්ගසච්චං.