(6) අතීතානාගතවාරො

(ක) අනුලොමපුග්ගලො

78. (ක) යස්ස දුක්ඛසච්චං උප්පජ්ජිත්ථ තස්ස සමුදයසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති තෙසං දුක්ඛසච්චං උප්පජ්ජිත්ථ, නො ච තෙසං සමුදයසච්චං උප්පජ්ජිස්සති. ඉතරෙසං තෙසං දුක්ඛසච්චඤ්ච උප්පජ්ජිත්ථ සමුදයසච්චඤ්ච උප්පජ්ජිස්සති.

(ඛ) යස්ස වා පන සමුදයසච්චං උප්පජ්ජිස්සති තස්ස දුක්ඛසච්චං උප්පජ්ජිත්ථාති? ආමන්තා.

(ක) යස්ස දුක්ඛසච්චං උප්පජ්ජිත්ථ තස්ස මග්ගසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති තෙසං දුක්ඛසච්චං උප්පජ්ජිත්ථ, නො ච තෙසං මග්ගසච්චං උප්පජ්ජිස්සති. යස්ස චිත්තස්ස අනන්තරා අග්ගමග්ගං පටිලභිස්සන්ති යෙ චඤ්ඤෙ මග්ගං පටිලභිස්සන්ති තෙසං දුක්ඛසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිස්සති.

(ඛ) යස්ස වා පන…පෙ…? ආමන්තා.

79. (ක) යස්ස සමුදයසච්චං උප්පජ්ජිත්ථ තස්ස මග්ගසච්චං උප්පජ්ජිස්සතීති? අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති තෙසං සමුදයසච්චං උප්පජ්ජිත්ථ, නො ච තෙසං මග්ගසච්චං උප්පජ්ජිස්සති. යස්ස චිත්තස්ස අනන්තරා අග්ගමග්ගං පටිලභිස්සන්ති, යෙ චඤ්ඤෙ මග්ගං පටිලභිස්සන්ති තෙසං සමුදයසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිස්සති.

(ඛ) යස්ස වා පන…පෙ…? ආමන්තා.

(ඛ) අනුලොමඔකාසො

80. යත්ථ දුක්ඛසච්චං උප්පජ්ජිත්ථ…පෙ….

(ග) අනුලොමපුග්ගලොකාසා

81. (ක) යස්ස යත්ථ දුක්ඛසච්චං උප්පජ්ජිත්ථ තස්ස තත්ථ සමුදයසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති අසඤ්ඤසත්තානං තෙසං තත්ථ දුක්ඛසච්චං උප්පජ්ජිත්ථ, නො ච තෙසං තත්ථ සමුදයසච්චං උප්පජ්ජිස්සති. ඉතරෙසං චතුවොකාරානං පඤ්චවොකාරානං තෙසං තත්ථ දුක්ඛසච්චඤ්ච උප්පජ්ජිත්ථ සමුදයසච්චඤ්ච උප්පජ්ජිස්සති.

(ඛ) යස්ස වා පන යත්ථ සමුදයසච්චං උප්පජ්ජිස්සති තස්ස තත්ථ දුක්ඛසච්චං උප්පජ්ජිත්ථාති?

සුද්ධාවාසං උපපජ්ජන්තානං තෙසං තත්ථ සමුදයසච්චං උප්පජ්ජිස්සති, නො ච තෙසං තත්ථ දුක්ඛසච්චං උප්පජ්ජිත්ථ. ඉතරෙසං චතුවොකාරානං පඤ්චවොකාරානං තෙසං තත්ථ සමුදයසච්චඤ්ච උප්පජ්ජිස්සති දුක්ඛසච්චඤ්ච උප්පජ්ජිත්ථ.

(ක) යස්ස යත්ථ දුක්ඛසච්චං උප්පජ්ජිත්ථ තස්ස තත්ථ මග්ගසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති ආපායිකානං අසඤ්ඤසත්තානං තෙසං තත්ථ දුක්ඛසච්චං උප්පජ්ජිත්ථ, නො ච තෙසං තත්ථ මග්ගසච්චං උප්පජ්ජිස්සති. යස්ස චිත්තස්ස අනන්තරා අග්ගමග්ගං පටිලභිස්සන්ති යෙ චඤ්ඤෙ මග්ගං පටිලභිස්සන්ති තෙසං තත්ථ දුක්ඛසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිස්සති.

(ඛ) යස්ස වා පන යත්ථ මග්ගසච්චං උප්පජ්ජිස්සති තස්ස තත්ථ දුක්ඛසච්චං උප්පජ්ජිත්ථාති?

සුද්ධාවාසං උපපජ්ජන්තානං තෙසං තත්ථ මග්ගසච්චං උප්පජ්ජිස්සති, නො ච තෙසං තත්ථ දුක්ඛසච්චං උප්පජ්ජිත්ථ. යස්ස චිත්තස්ස අනන්තරා අග්ගමග්ගං පටිලභිස්සන්ති යෙ චඤ්ඤෙ මග්ගං පටිලභිස්සන්ති තෙසං තත්ථ මග්ගසච්චඤ්ච උප්පජ්ජිස්සති දුක්ඛසච්චඤ්ච උප්පජ්ජිත්ථ.

82. (ක) යස්ස යත්ථ සමුදයසච්චං උප්පජ්ජිත්ථ තස්ස තත්ථ මග්ගසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති ආපායිකානං තෙසං තත්ථ සමුදයසච්චං උප්පජ්ජිත්ථ, නො ච තෙසං තත්ථ මග්ගසච්චං උප්පජ්ජිස්සති. යස්ස චිත්තස්ස අනන්තරා අග්ගමග්ගං පටිලභිස්සන්ති යෙ චඤ්ඤෙ මග්ගං පටිලභිස්සන්ති තෙසං තත්ථ සමුදයසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිස්සති.

(ඛ) යස්ස වා පන යත්ථ මග්ගසච්චං උප්පජ්ජිස්සති තස්ස තත්ථ සමුදයසච්චං උප්පජ්ජිත්ථාති?

සුද්ධාවාසානං දුතියෙ චිත්තෙ වත්තමානෙ තෙසං තත්ථ මග්ගසච්චං උප්පජ්ජිස්සති, නො ච තෙසං තත්ථ සමුදයසච්චං උප්පජ්ජිත්ථ. යස්ස චිත්තස්ස අනන්තරා අග්ගමග්ගං පටිලභිස්සන්ති යෙ චඤ්ඤෙ මග්ගං පටිලභිස්සන්ති තෙසං තත්ථ මග්ගසච්චඤ්ච උප්පජ්ජිස්සති සමුදයසච්චඤ්ච උප්පජ්ජිත්ථ.

(ඝ) පච්චනීකපුග්ගලො

83. (ක) යස්ස දුක්ඛසච්චං නුප්පජ්ජිත්ථ තස්ස සමුදයසච්චං නුප්පජ්ජිස්සතීති? නත්ථි.

(ඛ) යස්ස වා පන සමුදයසච්චං නුප්පජ්ජිස්සති තස්ස දුක්ඛසච්චං නුප්පජ්ජිත්ථාති? උප්පජ්ජිත්ථ.

(ක) යස්ස දුක්ඛසච්චං නුප්පජ්ජිත්ථ තස්ස මග්ගසච්චං නුප්පජ්ජිස්සතීති? නත්ථි.

(ඛ) යස්ස වා පන මග්ගසච්චං නුප්පජ්ජිස්සති තස්ස දුක්ඛසච්චං නුප්පජ්ජිත්ථාති? උප්පජ්ජිත්ථ.

84. (ක) යස්ස සමුදයසච්චං නුප්පජ්ජිත්ථ තස්ස මග්ගසච්චං නුප්පජ්ජිස්සතීති? නත්ථි.

(ඛ) යස්ස වා පන මග්ගසච්චං නුප්පජ්ජිස්සති තස්ස සමුදයසච්චං නුප්පජ්ජිත්ථාති? උප්පජ්ජිත්ථ.

(ඞ) පච්චනීකඔකාසො

85. යත්ථ දුක්ඛසච්චං නුප්පජ්ජිත්ථ…පෙ….

(ච) පච්චනීකපුග්ගලොකාසා

86. (ක) යස්ස යත්ථ දුක්ඛසච්චං නුප්පජ්ජිත්ථ තස්ස තත්ථ සමුදයසච්චං නුප්පජ්ජිස්සතීති? උප්පජ්ජිස්සති.

(ඛ) යස්ස වා පන යත්ථ සමුදයසච්චං නුප්පජ්ජිස්සති තස්ස තත්ථ දුක්ඛසච්චං නුප්පජ්ජිත්ථාති? උප්පජ්ජිත්ථ.

(ක) යස්ස යත්ථ දුක්ඛසච්චං නුප්පජ්ජිත්ථ තස්ස තත්ථ මග්ගසච්චං නුප්පජ්ජිස්සතීති? උප්පජ්ජිස්සති.

(ඛ) යස්ස වා පන යත්ථ මග්ගසච්චං නුප්පජ්ජිස්සති තස්ස තත්ථ දුක්ඛසච්චං නුප්පජ්ජිත්ථාති? උප්පජ්ජිත්ථ.

87. (ක) යස්ස යත්ථ සමුදයසච්චං නුප්පජ්ජිත්ථ තස්ස තත්ථ මග්ගසච්චං නුප්පජ්ජිස්සතීති?

සුද්ධාවාසානං දුතියෙ චිත්තෙ වත්තමානෙ තෙසං තත්ථ සමුදයසච්චං නුප්පජ්ජිත්ථ, නො ච තෙසං තත්ථ මග්ගසච්චං නුප්පජ්ජිස්සති. අසඤ්ඤසත්තානං තෙසං තත්ථ සමුදයසච්චඤ්ච නුප්පජ්ජිත්ථ මග්ගසච්චඤ්ච නුප්පජ්ජිස්සති.

(ඛ) යස්ස වා පන යත්ථ මග්ගසච්චං නුප්පජ්ජිස්සති තස්ස තත්ථ සමුදයසච්චං නුප්පජ්ජිත්ථාති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති ආපායිකානං තෙසං තත්ථ මග්ගසච්චං නුප්පජ්ජිස්සති, නො ච තෙසං තත්ථ සමුදයසච්චං නුප්පජ්ජිත්ථ. අසඤ්ඤසත්තානං තෙසං තත්ථ මග්ගසච්චඤ්ච නුප්පජ්ජිස්සති සමුදයසච්චඤ්ච නුප්පජ්ජිත්ථ.

උප්පාදවාරො.