1. පදසොධනවාරො

(ක) අනුලොමං

10. (ක) චක්ඛු චක්ඛායතනන්ති?

දිබ්බචක්ඛු පඤ්ඤාචක්ඛු චක්ඛු, න චක්ඛායතනං. චක්ඛායතනං චක්ඛු චෙව චක්ඛායතනඤ්ච.

(ඛ) චක්ඛායතනං චක්ඛූති? ආමන්තා.

(ක) සොතං සොතායතනන්ති?

දිබ්බසොතං තණ්හාසොතං සොතං, න සොතායතනං. සොතායතනං සොතඤ්චෙව සොතායතනඤ්ච.

(ඛ) සොතායතනං සොතන්ති? ආමන්තා.

(ක) ඝානං ඝානායතනන්ති? ආමන්තා.

(ඛ) ඝානායතනං ඝානන්ති? ආමන්තා.

(ක) ජිව්හා ජිව්හායතනන්ති? ආමන්තා.

(ඛ) ජිව්හායතනං ජිව්හාති? ආමන්තා.

(ක) කායො කායායතනන්ති?

කායායතනං ඨපෙත්වා අවසෙසො කායො, න කායායතනං. කායායතනං කායො චෙව කායායතනඤ්ච.

(ඛ) කායායතනං කායොති? ආමන්තා.

(ක) රූපං රූපායතනන්ති?

රූපායතනං ඨපෙත්වා අවසෙසං රූපං, න රූපායතනං. රූපායතනං රූපඤ්චෙව රූපායතනඤ්ච.

(ඛ) රූපායතනං රූපන්ති? ආමන්තා.

(ක) සද්දො සද්දායතනන්ති? ආමන්තා.

(ඛ) සද්දායතනං සද්දොති? ආමන්තා.

(ක) ගන්ධො ගන්ධායතනන්ති?

සීලගන්ධො සමාධිගන්ධො පඤ්ඤාගන්ධො ගන්ධො, න ගන්ධායතනං. ගන්ධායතනං ගන්ධො චෙව ගන්ධායතනඤ්ච.

(ඛ) ගන්ධායතනං ගන්ධොති? ආමන්තා.

(ක) රසො රසායතනන්ති?

අත්ථරසො ධම්මරසො විමුත්තිරසො රසො, න රසායතනං. රසායතනං රසො චෙව රසායතනඤ්ච.

(ඛ) රසායතනං රසොති? ආමන්තා.

(ක) ඵොට්ඨබ්බො ඵොට්ඨබ්බායතනන්ති? ආමන්තා.

(ඛ) ඵොට්ඨබ්බායතනං ඵොට්ඨබ්බොති? ආමන්තා.

(ක) මනො මනායතනන්ති? ආමන්තා.

(ඛ) මනායතනං මනොති? ආමන්තා.

(ක) ධම්මො ධම්මායතනන්ති?

ධම්මායතනං ඨපෙත්වා අවසෙසො ධම්මො, න ධම්මායතනං. ධම්මායතනං ධම්මො චෙව ධම්මායතනඤ්ච.

(ඛ) ධම්මායතනං ධම්මොති? ආමන්තා.

(ඛ) පච්චනීකං

11. (ක) න චක්ඛු න චක්ඛායතනන්ති? ආමන්තා.

(ඛ) න චක්ඛායතනං න චක්ඛූති?

දිබ්බචක්ඛු පඤ්ඤාචක්ඛු න චක්ඛායතනං, චක්ඛු. චක්ඛුඤ්ච චක්ඛායතනඤ්ච ඨපෙත්වා අවසෙසං [අවසෙසා (ස්‍යා. පී.)] න චෙව චක්ඛු න ච චක්ඛායතනං.

(ක) න සොතං න සොතායතනන්ති? ආමන්තා.

(ඛ) න සොතායතනං න සොතන්ති?

දිබ්බසොතං තණ්හාසොතං න සොතායතනං, සොතං. සොතඤ්ච සොතායතනඤ්ච ඨපෙත්වා අවසෙසං න චෙව සොතං න ච සොතායතනං.

(ක) න ඝානං න ඝානායතනන්ති? ආමන්තා.

(ඛ) න ඝානායතනං න ඝානන්ති? ආමන්තා.

(ක) න ජිව්හා න ජිව්හායතනන්ති? ආමන්තා.

(ඛ) න ජිව්හායතනං න ජිව්හාති? ආමන්තා.

(ක) න කායො න කායායතනන්ති? ආමන්තා.

(ඛ) න කායායතනං න කායොති?

කායායතනං ඨපෙත්වා අවසෙසො න කායායතනං, කායො. කායඤ්ච කායායතනඤ්ච ඨපෙත්වා අවසෙසං [අවසෙසො (ස්‍යා.)] න චෙව කායො න ච කායායතනං.

(ක) න රූපං න රූපායතනන්ති? ආමන්තා.

(ඛ) න රූපායතනං න රූපන්ති?

රූපායතනං ඨපෙත්වා අවසෙසං න රූපායතනං, රූපං. රූපඤ්ච රූපායතනඤ්ච ඨපෙත්වා අවසෙසං න චෙව රූපං න ච රූපායතනං.

(ක) න සද්දො න සද්දායතනන්ති? ආමන්තා.

(ඛ) න සද්දායතනං න සද්දොති? ආමන්තා.

(ක) න ගන්ධො න ගන්ධායතනන්ති? ආමන්තා.

(ඛ) න ගන්ධායතනං න ගන්ධොති?

සීලගන්ධො සමාධිගන්ධො පඤ්ඤාගන්ධො න ගන්ධායතනං, ගන්ධො. ගන්ධඤ්ච ගන්ධායතනඤ්ච ඨපෙත්වා අවසෙසං [අවසෙසා (ස්‍යා.)] න චෙව ගන්ධො න ච ගන්ධායතනං.

(ක) න රසො න රසායතනන්ති? ආමන්තා.

(ඛ) න රසායතනං න රසොති?

අත්ථරසො ධම්මරසො විමුත්තිරසො න රසායතනං, රසො. රසඤ්ච රසායතනඤ්ච ඨපෙත්වා අවසෙසං න චෙව රසො න ච රසායතනං.

(ක) න ඵොට්ඨබ්බො න ඵොට්ඨබ්බායතනන්ති? ආමන්තා.

(ඛ) න ඵොට්ඨබ්බායතනං න ඵොට්ඨබ්බොති? ආමන්තා.

(ක) න මනො න මනායතනන්ති? ආමන්තා.

(ඛ) න මනායතනං න මනොති? ආමන්තා.

(ක) න ධම්මො න ධම්මායතනන්ති? ආමන්තා.

(ඛ) න ධම්මායතනං න ධම්මොති?

ධම්මායතනං ඨපෙත්වා අවසෙසො න ධම්මායතනං, ධම්මො. ධම්මඤ්ච ධම්මායතනඤ්ච ඨපෙත්වා අවසෙසං න චෙව ධම්මො න ච ධම්මායතනං.