(6) අතීතානාගතවාරො

(ක) අනුලොමපුග්ගලො

248. (ක) යස්ස චක්ඛායතනං උප්පජ්ජිත්ථ තස්ස සොතායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං අරූපෙ පච්ඡිමභවිකානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං චක්ඛායතනං උප්පජ්ජිත්ථ, නො ච තෙසං සොතායතනං නිරුජ්ඣිස්සති. ඉතරෙසං තෙසං චක්ඛායතනඤ්ච උප්පජ්ජිත්ථ සොතායතනඤ්ච නිරුජ්ඣිස්සති.

(ඛ) යස්ස වා පන සොතායතනං නිරුජ්ඣිස්සති තස්ස චක්ඛායතනං උප්පජ්ජිත්ථාති? ආමන්තා.

(යථා නිරොධවාරෙ අතීතානාගතා [අතීතෙනානාගතා (ස්‍යා.)] පුච්ඡා යස්සකම්පි යත්ථකම්පි යස්සයත්ථකම්පි අනුලොමම්පි පච්චනීකම්පි විභත්තං, එවං උප්පාදනිරොධෙපි අතීතානාගතා පුච්ඡා විභජිතබ්බා.)

උප්පාදනිරොධවාරො.

පවත්තිවාරො නිට්ඨිතො.