(4) පච්චුප්පන්නාතීතවාරො
(ක) අනුලොමපුග්ගලො
229. (ක) යස්ස චක්ඛායතනං උප්පජ්ජති තස්ස සොතායතනං නිරුජ්ඣිත්ථාති? ආමන්තා.
(ඛ) යස්ස වා පන සොතායතනං නිරුජ්ඣිත්ථ තස්ස චක්ඛායතනං උප්පජ්ජතීති?
සබ්බෙසං චවන්තානං අචක්ඛුකානං උපපජ්ජන්තානං තෙසං සොතායතනං නිරුජ්ඣිත්ථ, නො ච තෙසං චක්ඛායතනං උප්පජ්ජති. සචක්ඛුකානං උපපජ්ජන්තානං තෙසං සොතායතනඤ්ච නිරුජ්ඣිත්ථ චක්ඛායතනඤ්ච උප්පජ්ජති.
(යථා උප්පාදවාරෙ පච්චුප්පන්නාතීතා පුච්ඡා විභත්තා එවං උප්පාදනිරොධෙපි පච්චුප්පන්නාතීතා පුච්ඡා අනුලොමම්පි පච්චනීකම්පි විභජිතබ්බා [විභජිතබ්බං (සී ස්‍යා. ක.)] ).