(1) පච්චුප්පන්නවාරො
(ක) අනුලොමපුග්ගලො
199. (ක) යස්ස චක්ඛායතනං උප්පජ්ජති තස්ස සොතායතනං නිරුජ්ඣතීති? නො.
(ඛ) යස්ස වා පන සොතායතනං නිරුජ්ඣති තස්ස චක්ඛායතනං උප්පජ්ජතීති? නො.
යස්ස චක්ඛායතනං උප්පජ්ජති තස්ස ඝානායතනං…පෙ… රූපායතනං… මනායතනං… ධම්මායතනං නිරුජ්ඣතීති? නො.
යස්ස වා පන ධම්මායතනං නිරුජ්ඣති තස්ස චක්ඛායතනං උප්පජ්ජතීති? නො …පෙ….
200. (ක) යස්ස මනායතනං උප්පජ්ජති තස්ස ධම්මායතනං නිරුජ්ඣතීති? නො.
(ඛ) යස්ස වා පන ධම්මායතනං නිරුජ්ඣති තස්ස මනායතනං උප්පජ්ජතීති? නො.
(ඛ) අනුලොමඔකාසො
201. යත්ථ චක්ඛායතනං උප්පජ්ජති…පෙ… (යත්ථකං නොති න කාතබ්බං, යත්ථකං ඉතරෙසං යත්ථකානං සදිසං කාතබ්බං, යත්ථකං තීසුපි වාරෙසු සදිසං).
(ග) අනුලොමපුග්ගලොකාසා
202. යස්ස යත්ථ චක්ඛායතනං උප්පජ්ජති තස්ස තත්ථ සොතායතනං නිරුජ්ඣතීති? නො.
යස්ස වා පන යත්ථ සොතායතනං නිරුජ්ඣති තස්ස තත්ථ චක්ඛායතනං උප්පජ්ජතීති? නො …පෙ….
203. (ක) යස්ස යත්ථ මනායතනං උප්පජ්ජති තස්ස තත්ථ ධම්මායතනං නිරුජ්ඣතීති? නො.
(ඛ) යස්ස වා පන යත්ථ ධම්මායතනං නිරුජ්ඣති තස්ස තත්ථ මනායතනං උප්පජ්ජතීති? නො.
(ඝ) පච්චනීකපුග්ගලො
204. (ක) යස්ස චක්ඛායතනං නුප්පජ්ජති තස්ස සොතායතනං න නිරුජ්ඣතීති?
සසොතකානං චවන්තානං තෙසං චක්ඛායතනං නුප්පජ්ජති, නො ච තෙසං සොතායතනං න නිරුජ්ඣති. අචක්ඛුකානං උපපජ්ජන්තානං අසොතකානං චවන්තානං තෙසං චක්ඛායතනඤ්ච නුප්පජ්ජති සොතායතනඤ්ච න නිරුජ්ඣති.
(ඛ) යස්ස වා පන සොතායතනං න නිරුජ්ඣති තස්ස චක්ඛායතනං නුප්පජ්ජතීති?
සචක්ඛුකානං උපපජ්ජන්තානං තෙසං සොතායතනං න නිරුජ්ඣති, නො ච තෙසං චක්ඛායතනං නුප්පජ්ජති. අසොතකානං චවන්තානං අචක්ඛුකානං උපපජ්ජන්තානං තෙසං සොතායතනඤ්ච න නිරුජ්ඣති චක්ඛායතනඤ්ච නුප්පජ්ජති.
(ක) යස්ස චක්ඛායතනං නුප්පජ්ජති තස්ස ඝානායතනං න නිරුජ්ඣතීති?
සඝානකානං චවන්තානං තෙසං චක්ඛායතනං නුප්පජ්ජති, නො ච තෙසං ඝානායතනං න නිරුජ්ඣති. අචක්ඛුකානං උපපජ්ජන්තානං අඝානකානං චවන්තානං තෙසං චක්ඛායතනඤ්ච නුප්පජ්ජති ඝානායතනඤ්ච න නිරුජ්ඣති.
(ඛ) යස්ස වා පන ඝානායතනං න නිරුජ්ඣති තස්ස චක්ඛායතනං නුප්පජ්ජතීති?
සචක්ඛුකානං උපපජ්ජන්තානං තෙසං ඝානායතනං න නිරුජ්ඣති, නො ච තෙසං චක්ඛායතනං නුප්පජ්ජති. අඝානකානං චවන්තානං අචක්ඛුකානං උපපජ්ජන්තානං තෙසං ඝානායතනඤ්ච න නිරුජ්ඣති චක්ඛායතනඤ්ච නුප්පජ්ජති.
(ක) යස්ස චක්ඛායතනං නුප්පජ්ජති තස්ස රූපායතනං න නිරුජ්ඣතීති?
සරූපකානං චවන්තානං තෙසං චක්ඛායතනං නුප්පජ්ජති, නො ච තෙසං රූපායතනං න නිරුජ්ඣති. අචක්ඛුකානං උපපජ්ජන්තානං අරූපකානං චවන්තානං තෙසං චක්ඛායතනඤ්ච නුප්පජ්ජති රූපායතනඤ්ච න නිරුජ්ඣති.
(ඛ) යස්ස වා පන රූපායතනං න නිරුජ්ඣති තස්ස චක්ඛායතනං නුප්පජ්ජතීති?
සචක්ඛුකානං උපපජ්ජන්තානං තෙසං රූපායතනං න නිරුජ්ඣති, නො ච තෙසං චක්ඛායතනං නුප්පජ්ජති. අරූපකානං චවන්තානං අචක්ඛුකානං උපපජ්ජන්තානං තෙසං රූපායතනඤ්ච න නිරුජ්ඣති චක්ඛායතනඤ්ච නුප්පජ්ජති.
(ක) යස්ස චක්ඛායතනං නුප්පජ්ජති තස්ස මනායතනං න නිරුජ්ඣතීති?
සචිත්තකානං චවන්තානං තෙසං චක්ඛායතනං නුප්පජ්ජති, නො ච තෙසං මනායතනං න නිරුජ්ඣති. අචක්ඛුකානං උපපජ්ජන්තානං අචිත්තකානං චවන්තානං තෙසං චක්ඛායතනඤ්ච නුප්පජ්ජති මනායතනඤ්ච න නිරුජ්ඣති.
(ඛ) යස්ස වා පන මනායතනං න නිරුජ්ඣති තස්ස චක්ඛායතනං නුප්පජ්ජතීති?
සචක්ඛුකානං උපපජ්ජන්තානං තෙසං මනායතනං න නිරුජ්ඣති, නො ච තෙසං චක්ඛායතනං නුප්පජ්ජති. අචිත්තකානං චවන්තානං අචක්ඛුකානං උපපජ්ජන්තානං තෙසං මනායතනඤ්ච න නිරුජ්ඣති චක්ඛායතනඤ්ච නුප්පජ්ජති.
(ක) යස්ස චක්ඛායතනං නුප්පජ්ජති තස්ස ධම්මායතනං න නිරුජ්ඣතීති?
සබ්බෙසං චවන්තානං තෙසං චක්ඛායතනං නුප්පජ්ජති, නො ච තෙසං ධම්මායතනං න නිරුජ්ඣති. අචක්ඛුකානං උපපජ්ජන්තානං තෙසං චක්ඛායතනඤ්ච නුප්පජ්ජති ධම්මායතනඤ්ච න නිරුජ්ඣති.
(ඛ) යස්ස වා පන ධම්මායතනං න නිරුජ්ඣති තස්ස චක්ඛායතනං නුප්පජ්ජතීති?
සචක්ඛුකානං උපපජ්ජන්තානං තෙසං ධම්මායතනං න නිරුජ්ඣති, නො ච තෙසං චක්ඛායතනං නුප්පජ්ජති. අචක්ඛුකානං උපපජ්ජන්තානං තෙසං ධම්මායතනඤ්ච න නිරුජ්ඣති චක්ඛායතනඤ්ච නුප්පජ්ජති. (චක්ඛායතනමූලකං)
205. (ක) යස්ස ඝානායතනං නුප්පජ්ජති තස්ස රූපායතනං න නිරුජ්ඣතීති?
සරූපකානං චවන්තානං තෙසං ඝානායතනං නුප්පජ්ජති, නො ච තෙසං රූපායතනං න නිරුජ්ඣති. අඝානකානං උපපජ්ජන්තානං අරූපකානං චවන්තානං තෙසං ඝානායතනඤ්ච නුප්පජ්ජති රූපායතනඤ්ච න නිරුජ්ඣති.
(ඛ) යස්ස වා පන රූපායතනං න නිරුජ්ඣති තස්ස ඝානායතනං නුප්පජ්ජතීති?
සඝානකානං උපපජ්ජන්තානං තෙසං රූපායතනං න නිරුජ්ඣති, නො ච තෙසං ඝානායතනං නුප්පජ්ජති. අරූපකානං චවන්තානං අඝානකානං උපපජ්ජන්තානං තෙසං රූපායතනඤ්ච න නිරුජ්ඣති ඝානායතනඤ්ච නුප්පජ්ජති.
(ක) යස්ස ඝානායතනං නුප්පජ්ජති තස්ස මනායතනං න නිරුජ්ඣතීති?
සචිත්තකානං චවන්තානං තෙසං ඝානායතනං නුප්පජ්ජති, නො ච තෙසං මනායතනං න නිරුජ්ඣති. අඝානකානං උපපජ්ජන්තානං අචිත්තකානං චවන්තානං තෙසං ඝානායතනඤ්ච නුප්පජ්ජති මනායතනඤ්ච න නිරුජ්ඣති.
(ඛ) යස්ස වා පන මනායතනං න නිරුජ්ඣති තස්ස ඝානායතනං නුප්පජ්ජතීති?
සඝානකානං උපපජ්ජන්තානං තෙසං මනායතනං න නිරුජ්ඣති, නො ච තෙසං ඝානායතනං නුප්පජ්ජති. අචිත්තකානං චවන්තානං අඝානකානං උපපජ්ජන්තානං තෙසං මනායතනඤ්ච න නිරුජ්ඣති ඝානායතනඤ්ච නුප්පජ්ජති.
(ක) යස්ස ඝානායතනං නුප්පජ්ජති තස්ස ධම්මායතනං න නිරුජ්ඣතීති?
සබ්බෙසං චවන්තානං තෙසං ඝානායතනං නුප්පජ්ජති, නො ච තෙසං ධම්මායතනං න නිරුජ්ඣති. අඝානකානං උපපජ්ජන්තානං තෙසං ඝානායතනඤ්ච නුප්පජ්ජති ධම්මායතනඤ්ච න නිරුජ්ඣති.
(ඛ) යස්ස වා පන ධම්මායතනං න නිරුජ්ඣති තස්ස ඝානායතනං නුප්පජ්ජතීති?
සඝානකානං උපපජ්ජන්තානං තෙසං ධම්මායතනං න නිරුජ්ඣති, නො ච තෙසං ඝානායතනං නුප්පජ්ජති. අඝානකානං උපපජ්ජන්තානං තෙසං ධම්මායතනඤ්ච න නිරුජ්ඣති ඝානායතනඤ්ච නුප්පජ්ජති. (ඝානායතනමූලකං)
206. (ක) යස්ස රූපායතනං නුප්පජ්ජති තස්ස මනායතනං න නිරුජ්ඣතීති?
සචිත්තකානං චවන්තානං තෙසං රූපායතනං නුප්පජ්ජති, නො ච තෙසං මනායතනං න නිරුජ්ඣති. අරූපකානං උපපජ්ජන්තානං අචිත්තකානං චවන්තානං තෙසං රූපායතනඤ්ච නුප්පජ්ජති මනායතනඤ්ච න නිරුජ්ඣති.
(ඛ) යස්ස වා පන මනායතනං න නිරුජ්ඣති තස්ස රූපායතනං නුප්පජ්ජතීති?
සරූපකානං උපපජ්ජන්තානං තෙසං මනායතනං න නිරුජ්ඣති, නො ච තෙසං රූපායතනං නුප්පජ්ජති. අචිත්තකානං චවන්තානං අරූපකානං උපපජ්ජන්තානං තෙසං මනායතනඤ්ච න නිරුජ්ඣති රූපායතනඤ්ච නුප්පජ්ජති.
(ක) යස්ස රූපායතනං නුප්පජ්ජති තස්ස ධම්මායතනං න නිරුජ්ඣතීති?
සබ්බෙසං චවන්තානං තෙසං රූපායතනං නුප්පජ්ජති, නො ච තෙසං ධම්මායතනං න නිරුජ්ඣති. අරූපකානං උපපජ්ජන්තානං තෙසං රූපායතනඤ්ච නුප්පජ්ජති ධම්මායතනඤ්ච න නිරුජ්ඣති.
(ඛ) යස්ස වා පන ධම්මායතනං න නිරුජ්ඣති තස්ස රූපායතනං නුප්පජ්ජතීති?
සරූපකානං උපපජ්ජන්තානං තෙසං ධම්මායතනං න නිරුජ්ඣති, නො ච තෙසං රූපායතනං නුප්පජ්ජති. අරූපකානං උපපජ්ජන්තානං තෙසං ධම්මායතනඤ්ච න නිරුජ්ඣති රූපායතනඤ්ච නුප්පජ්ජති. (රූපායතනමූලකං)
207. (ක) යස්ස මනායතනං නුප්පජ්ජති තස්ස ධම්මායතනං න නිරුජ්ඣතීති?
සබ්බෙසං චවන්තානං තෙසං මනායතනං නුප්පජ්ජති, නො ච තෙසං ධම්මායතනං න නිරුජ්ඣති. අචිත්තකානං උපපජ්ජන්තානං තෙසං මනායතනඤ්ච නුප්පජ්ජති ධම්මායතනඤ්ච න නිරුජ්ඣති.
(ඛ) යස්ස වා පන ධම්මායතනං න නිරුජ්ඣති තස්ස මනායතනං නුප්පජ්ජතීති?
සචිත්තකානං උපපජ්ජන්තානං තෙසං ධම්මායතනං න නිරුජ්ඣති, නො ච තෙසං මනායතනං නුප්පජ්ජති. අචිත්තකානං උපපජ්ජන්තානං තෙසං ධම්මායතනඤ්ච න නිරුජ්ඣති මනායතනඤ්ච නුප්පජ්ජති.
(ඞ) පච්චනීකඔකාසො
208. යත්ථ චක්ඛායතනං නුප්පජ්ජති…පෙ….
(ච) පච්චනීකපුග්ගලොකාසා
209. යස්ස යත්ථ චක්ඛායතනං නුප්පජ්ජති…පෙ….
(යස්සකම්පි යස්සයත්ථකම්පි සදිසං).