(5) පච්චුප්පන්නානාගතවාරො

(ක) අනුලොමපුග්ගලො

166. (ක) යස්ස චක්ඛායතනං නිරුජ්ඣති තස්ස සොතායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං චක්ඛායතනං නිරුජ්ඣති, නො ච තෙසං සොතායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං චක්ඛායතනඤ්ච නිරුජ්ඣති සොතායතනඤ්ච නිරුජ්ඣිස්සති.

(ඛ) යස්ස වා පන සොතායතනං නිරුජ්ඣිස්සති තස්ස චක්ඛායතනං නිරුජ්ඣතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං සොතායතනං නිරුජ්ඣිස්සති, නො ච තෙසං චක්ඛායතනං නිරුජ්ඣති. සචක්ඛුකානං චවන්තානං තෙසං සොතායතනඤ්ච නිරුජ්ඣිස්සති චක්ඛායතනඤ්ච නිරුජ්ඣති.

(ක) යස්ස චක්ඛායතනං නිරුජ්ඣති තස්ස ඝානායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං යෙ ච රූපාවචරං අරූපාවචරං උපපජ්ජිත්වා පරිනිබ්බායිස්සන්ති තෙසං චවන්තානං තෙසං චක්ඛායතනං නිරුජ්ඣති, නො ච තෙසං ඝානායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං චක්ඛායතනඤ්ච නිරුජ්ඣති ඝානායතනඤ්ච නිරුජ්ඣිස්සති.

(ඛ) යස්ස වා පන ඝානායතනං…පෙ….

(ක) යස්ස චක්ඛායතනං නිරුජ්ඣති තස්ස රූපායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං චක්ඛායතනං නිරුජ්ඣති, නො ච තෙසං රූපායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං චක්ඛායතනඤ්ච නිරුජ්ඣති රූපායතනඤ්ච නිරුජ්ඣිස්සති.

(ඛ) යස්ස වා පන රූපායතනං…පෙ….

යස්ස චක්ඛායතනං නිරුජ්ඣති තස්ස මනායතනං…පෙ… ධම්මායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං චක්ඛායතනං නිරුජ්ඣති, නො ච තෙසං ධම්මායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං චක්ඛායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

යස්ස වා පන ධම්මායතනං නිරුජ්ඣිස්සති තස්ස චක්ඛායතනං නිරුජ්ඣතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං…පෙ… සචක්ඛුකානං චවන්තානං තෙසං…පෙ….

167. (ක) යස්ස ඝානායතනං නිරුජ්ඣති තස්ස රූපායතනං නිරුජ්ඣිස්සතීති?

කාමාවචරෙ පරිනිබ්බන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං ඝානායතනං නිරුජ්ඣති, නො ච තෙසං රූපායතනං නිරුජ්ඣිස්සති. ඉතරෙසං සඝානකානං චවන්තානං තෙසං ඝානායතනඤ්ච නිරුජ්ඣති රූපායතනඤ්ච නිරුජ්ඣිස්සති.

(ඛ) යස්ස වා පන රූපායතනං නිරුජ්ඣිස්සති තස්ස ඝානායතනං නිරුජ්ඣතීති?

සබ්බෙසං උපපජ්ජන්තානං අඝානකානං චවන්තානං තෙසං රූපායතනං නිරුජ්ඣිස්සති, නො ච තෙසං ඝානායතනං නිරුජ්ඣති. සඝානකානං චවන්තානං තෙසං රූපායතනඤ්ච නිරුජ්ඣිස්සති ඝානායතනඤ්ච නිරුජ්ඣති.

යස්ස ඝානායතනං නිරුජ්ඣති තස්ස මනායතනං…පෙ… ධම්මායතනං නිරුජ්ඣිස්සතීති?

කාමාවචරෙ පරිනිබ්බන්තානං තෙසං ඝානායතනං නිරුජ්ඣති, නො ච තෙසං ධම්මායතනං නිරුජ්ඣිස්සති. ඉතරෙසං සඝානකානං චවන්තානං තෙසං ඝානායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

යස්ස වා පන ධම්මායතනං…පෙ….

168. යස්ස රූපායතනං නිරුජ්ඣති තස්ස මනායතනං…පෙ… ධම්මායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං රූපායතනං නිරුජ්ඣති, නො ච තෙසං ධම්මායතනං නිරුජ්ඣිස්සති. ඉතරෙසං සරූපකානං චවන්තානං තෙසං රූපායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

යස්ස වා පන ධම්මායතනං නිරුජ්ඣිස්සති තස්ස රූපායතනං නිරුජ්ඣතීති?

සබ්බෙසං උපපජ්ජන්තානං අරූපකානං චවන්තානං තෙසං ධම්මායතනං නිරුජ්ඣිස්සති, නො ච තෙසං රූපායතනං නිරුජ්ඣති. සරූපකානං චවන්තානං තෙසං ධම්මායතනඤ්ච නිරුජ්ඣිස්සති රූපායතනඤ්ච නිරුජ්ඣති.

169. (ක) යස්ස මනායතනං නිරුජ්ඣති තස්ස ධම්මායතනං නිරුජ්ඣිස්සතීති?

පරිනිබ්බන්තානං තෙසං මනායතනං නිරුජ්ඣති, නො ච තෙසං ධම්මායතනං නිරුජ්ඣිස්සති. ඉතරෙසං සචිත්තකානං චවන්තානං තෙසං මනායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

(ඛ) යස්ස වා පන ධම්මායතනං නිරුජ්ඣිස්සති තස්ස මනායතනං නිරුජ්ඣතීති?

සබ්බෙසං උපපජ්ජන්තානං අචිත්තකානං චවන්තානං තෙසං ධම්මායතනං නිරුජ්ඣිස්සති, නො ච තෙසං මනායතනං නිරුජ්ඣති. සචිත්තකානං චවන්තානං තෙසං ධම්මායතනඤ්ච නිරුජ්ඣිස්සති මනායතනඤ්ච නිරුජ්ඣති.

(ඛ) අනුලොමඔකාසො

170. යත්ථ චක්ඛායතනං නිරුජ්ඣති…පෙ….

(ග) අනුලොමපුග්ගලොකාසා

171. (ක) යස්ස යත්ථ චක්ඛායතනං නිරුජ්ඣති තස්ස තත්ථ සොතායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං තත්ථ චක්ඛායතනං නිරුජ්ඣති, නො ච තෙසං තත්ථ සොතායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං තත්ථ චක්ඛායතනඤ්ච නිරුජ්ඣති සොතායතනඤ්ච නිරුජ්ඣිස්සති.

(ඛ) යස්ස වා පන යත්ථ සොතායතනං නිරුජ්ඣිස්සති තස්ස තත්ථ චක්ඛායතනං නිරුජ්ඣතීති?

පඤ්චවොකාරං උපපජ්ජන්තානං අචක්ඛුකානං කාමාවචරා චවන්තානං තෙසං තත්ථ සොතායතනං නිරුජ්ඣිස්සති, නො ච තෙසං තත්ථ චක්ඛායතනං නිරුජ්ඣති. සචක්ඛුකානං චවන්තානං තෙසං තත්ථ සොතායතනඤ්ච නිරුජ්ඣිස්සති චක්ඛායතනඤ්ච නිරුජ්ඣති.

(ක) යස්ස යත්ථ චක්ඛායතනං නිරුජ්ඣති තස්ස තත්ථ ඝානායතනං නිරුජ්ඣිස්සතීති?

කාමාවචරෙ පරිනිබ්බන්තානං රූපාවචරා චවන්තානං තෙසං තත්ථ චක්ඛායතනං නිරුජ්ඣති, නො ච තෙසං තත්ථ ඝානායතනං නිරුජ්ඣිස්සති. ඉතරෙසං සචක්ඛුකානං කාමාවචරා චවන්තානං තෙසං තත්ථ චක්ඛායතනඤ්ච නිරුජ්ඣති ඝානායතනඤ්ච නිරුජ්ඣිස්සති.

(ඛ) යස්ස වා පන යත්ථ ඝානායතනං…පෙ… (යථා පච්චුප්පන්නාතීතෙපි තිවිධං විත්ථාරිතං එවං ඉදම්පි විත්ථාරෙතබ්බං).

(ක) යස්ස යත්ථ චක්ඛායතනං නිරුජ්ඣති තස්ස තත්ථ රූපායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං තත්ථ චක්ඛායතනං නිරුජ්ඣති, නො ච තෙසං තත්ථ රූපායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං තත්ථ චක්ඛායතනඤ්ච නිරුජ්ඣති රූපායතනඤ්ච නිරුජ්ඣිස්සති.

(ඛ) යස්ස වා පන යත්ථ රූපායතනං…පෙ….

(ක) යස්ස යත්ථ චක්ඛායතනං නිරුජ්ඣති තස්ස තත්ථ මනායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං තත්ථ චක්ඛායතනං නිරුජ්ඣති, නො ච තෙසං තත්ථ මනායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං තත්ථ චක්ඛායතනඤ්ච නිරුජ්ඣති මනායතනඤ්ච නිරුජ්ඣිස්සති.

(ඛ) යස්ස වා පන යත්ථ මනායතනං…පෙ….

(ක) යස්ස යත්ථ චක්ඛායතනං නිරුජ්ඣති තස්ස තත්ථ ධම්මායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං තත්ථ චක්ඛායතනං නිරුජ්ඣති, නො ච තෙසං තත්ථ ධම්මායතනං නිරුජ්ඣිස්සති. ඉතරෙසං සචක්ඛුකානං චවන්තානං තෙසං තත්ථ චක්ඛායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

(ඛ) යස්ස වා පන යත්ථ ධම්මායතනං නිරුජ්ඣිස්සති තස්ස තත්ථ චක්ඛායතනං නිරුජ්ඣතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං තත්ථ ධම්මායතනං නිරුජ්ඣිස්සති, නො ච තෙසං තත්ථ චක්ඛායතනං නිරුජ්ඣති. සචක්ඛුකානං චවන්තානං තෙසං තත්ථ ධම්මායතනඤ්ච නිරුජ්ඣිස්සති චක්ඛායතනඤ්ච නිරුජ්ඣති. (චක්ඛායතනමූලකං)

172. (ක) යස්ස යත්ථ ඝානායතනං නිරුජ්ඣති තස්ස තත්ථ රූපායතනං නිරුජ්ඣිස්සතීති?

කාමාවචරෙ පරිනිබ්බන්තානං තෙසං තත්ථ ඝානායතනං නිරුජ්ඣති, නො ච තෙසං තත්ථ රූපායතනං නිරුජ්ඣිස්සති. ඉතරෙසං සඝානකානං චවන්තානං තෙසං තත්ථ ඝානායතනඤ්ච නිරුජ්ඣති රූපායතනඤ්ච නිරුජ්ඣිස්සති.

(ඛ) යස්ස වා පන යත්ථ රූපායතනං නිරුජ්ඣිස්සති තස්ස තත්ථ ඝානායතනං නිරුජ්ඣතීති? කාමාවචරෙ පරිනිබ්බාන්තානං තෙසං තත්ථ…පෙ….

කාමාවචරං උපපජ්ජන්තානං අඝානකානං කාමාවචරා චවන්තානං රූපාවචරානං තෙසං තත්ථ…පෙ….

යස්ස යත්ථ ඝානායතනං නිරුජ්ඣති තස්ස තත්ථ මනායතනං…පෙ… ධම්මායතනං නිරුජ්ඣිස්සතීති?

කාමාවචරෙ පරිනිබ්බන්තානං තෙසං තත්ථ ඝානායතනං නිරුජ්ඣති, නො ච තෙසං තත්ථ ධම්මායතනං නිරුජ්ඣිස්සති. ඉතරෙසං සඝානකානං චවන්තානං තෙසං තත්ථ ඝානායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

යස්ස වා පන යත්ථ ධම්මායතනං…පෙ….

173. (ක) යස්ස යත්ථ රූපායතනං නිරුජ්ඣති තස්ස තත්ථ මනායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං අසඤ්ඤසත්තා චවන්තානං තෙසං තත්ථ රූපායතනං නිරුජ්ඣති, නො ච තෙසං තත්ථ මනායතනං නිරුජ්ඣිස්සති. ඉතරෙසං පඤ්චවොකාරා චවන්තානං තෙසං තත්ථ රූපායතනඤ්ච නිරුජ්ඣති මනායතනඤ්ච නිරුජ්ඣිස්සති.

(ඛ) යස්ස වා පන යත්ථ මනායතනං…පෙ….

(ක) යස්ස යත්ථ රූපායතනං නිරුජ්ඣති තස්ස තත්ථ ධම්මායතනං නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං තත්ථ රූපායතනං නිරුජ්ඣති, නො ච තෙසං තත්ථ ධම්මායතනං නිරුජ්ඣිස්සති. ඉතරෙසං සරූපකානං චවන්තානං තෙසං තත්ථ රූපායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

(ඛ) යස්ස වා පන යත්ථ ධම්මායතනං නිරුජ්ඣිස්සති තස්ස තත්ථ රූපායතනං නිරුජ්ඣතීති?

සබ්බෙසං උපපජ්ජන්තානං අරූපකානං චවන්තානං තෙසං තත්ථ ධම්මායතනං නිරුජ්ඣිස්සති, නො ච තෙසං තත්ථ රූපායතනං නිරුජ්ඣති. සරූපකානං චවන්තානං තෙසං තත්ථ ධම්මායතනඤ්ච නිරුජ්ඣිස්සති රූපායතනඤ්ච නිරුජ්ඣති.

174. (ක) යස්ස යත්ථ මනායතනං නිරුජ්ඣති තස්ස තත්ථ ධම්මායතනං නිරුජ්ඣිස්සතීති?

පරිනිබ්බන්තානං තෙසං තත්ථ මනායතනං නිරුජ්ඣති, නො ච තෙසං තත්ථ ධම්මායතනං නිරුජ්ඣිස්සති. ඉතරෙසං සචිත්තකානං චවන්තානං තෙසං තත්ථ මනායතනඤ්ච නිරුජ්ඣති ධම්මායතනඤ්ච නිරුජ්ඣිස්සති.

(ඛ) යස්ස වා පන යත්ථ ධම්මායතනං නිරුජ්ඣිස්සති තස්ස තත්ථ මනායතනං නිරුජ්ඣතීති?

සබ්බෙසං උපපජ්ජන්තානං අචිත්තකානං චවන්තානං තෙසං තත්ථ ධම්මායතනං නිරුජ්ඣිස්සති, නො ච තෙසං තත්ථ මනායතනං නිරුජ්ඣති. සචිත්තකානං චවන්තානං තෙසං තත්ථ ධම්මායතනඤ්ච නිරුජ්ඣිස්සති මනායතනඤ්ච නිරුජ්ඣති.

(ඝ) පච්චනීකපුග්ගලො

175. (ක) යස්ස චක්ඛායතනං න නිරුජ්ඣති තස්ස සොතායතනං න නිරුජ්ඣිස්සතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං චක්ඛායතනං න නිරුජ්ඣති, නො ච තෙසං සොතායතනං න නිරුජ්ඣිස්සති. අරූපෙ පච්ඡිමභවිකානං තෙසං චක්ඛායතනඤ්ච න නිරුජ්ඣති සොතායතනඤ්ච න නිරුජ්ඣිස්සති.

(ඛ) යස්ස වා පන සොතායතනං න නිරුජ්ඣිස්සති තස්ස චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං සොතායතනං න නිරුජ්ඣිස්සති, නො ච තෙසං චක්ඛායතනං න නිරුජ්ඣති. අරූපෙ පච්ඡිමභවිකානං තෙසං සොතායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

(ක) යස්ස චක්ඛායතනං න නිරුජ්ඣති තස්ස ඝානායතනං න නිරුජ්ඣිස්සතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං චක්ඛායතනං න නිරුජ්ඣති, නො ච තෙසං ඝානායතනං න නිරුජ්ඣිස්සති. පච්ඡිමභවිකානං රූපාවචරං උපපජ්ජන්තානං අරූපෙ පච්ඡිමභවිකානං තෙසං චක්ඛායතනඤ්ච න නිරුජ්ඣති ඝානායතනඤ්ච න නිරුජ්ඣිස්සති.

(ඛ) යස්ස වා පන ඝානායතනං න නිරුජ්ඣිස්සති තස්ස චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං යෙ ච රූපාවචරං අරූපාවචරං උපපජ්ජිත්වා පරිනිබ්බායිස්සන්ති තෙසං චවන්තානං තෙසං ඝානායතනං න නිරුජ්ඣිස්සති, නො ච තෙසං චක්ඛායතනං න නිරුජ්ඣති. පච්ඡිමභවිකානං රූපාවචරං උපපජ්ජන්තානං අරූපෙ පච්ඡිමභවිකානං තෙසං ඝානායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

(ක) යස්ස චක්ඛායතනං න නිරුජ්ඣති තස්ස රූපායතනං න නිරුජ්ඣිස්සතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං චක්ඛායතනං න නිරුජ්ඣති, නො ච තෙසං රූපායතනං න නිරුජ්ඣිස්සති. අරූපෙ පච්ඡිමභවිකානං තෙසං චක්ඛායතනඤ්ච න නිරුජ්ඣති රූපායතනඤ්ච න නිරුජ්ඣිස්සති.

(ඛ) යස්ස වා පන රූපායතනං න නිරුජ්ඣිස්සති තස්ස චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං රූපායතනං න නිරුජ්ඣිස්සති, නො ච තෙසං චක්ඛායතනං න නිරුජ්ඣති. අරූපෙ පච්ඡිමභවිකානං තෙසං රූපායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

යස්ස චක්ඛායතනං න නිරුජ්ඣති තස්ස මනායතනං…පෙ… ධම්මායතනං න නිරුජ්ඣිස්සතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං චක්ඛායතනං න නිරුජ්ඣති, නො ච තෙසං ධම්මායතනං න නිරුජ්ඣිස්සති. අරූපෙ පරිනිබ්බන්තානං තෙසං චක්ඛායතනඤ්ච න නිරුජ්ඣති ධම්මායතනඤ්ච න නිරුජ්ඣිස්සති.

යස්ස වා පන ධම්මායතනං න නිරුජ්ඣිස්සති තස්ස චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං තෙසං ධම්මායතනං න නිරුජ්ඣිස්සති, නො ච තෙසං චක්ඛායතනං න නිරුජ්ඣති. අරූපෙ පරිනිබ්බන්තානං තෙසං ධම්මායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

176. (ක) යස්ස ඝානායතනං න නිරුජ්ඣති තස්ස රූපායතනං න නිරුජ්ඣිස්සතීති?

සබ්බෙසං උපපජ්ජන්තානං අඝානකානං චවන්තානං තෙසං ඝානායතනං න නිරුජ්ඣති, නො ච තෙසං රූපායතනං න නිරුජ්ඣිස්සති. රූපාවචරෙ පරිනිබ්බන්තානං අරූපෙ පච්ඡිමභවිකානං තෙසං ඝානායතනඤ්ච න නිරුජ්ඣති රූපායතනඤ්ච න නිරුජ්ඣිස්සති.

(ඛ) යස්ස වා පන රූපායතනං න නිරුජ්ඣිස්සති තස්ස ඝානායතනං න නිරුජ්ඣතීති?

කාමාවචරෙ පරිනිබ්බන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං රූපායතනං න නිරුජ්ඣිස්සති, නො ච තෙසං ඝානායතනං න නිරුජ්ඣති. රූපාවචරෙ පරිනිබ්බන්තානං අරූපෙ පච්ඡිමභවිකානං තෙසං රූපායතනඤ්ච න නිරුජ්ඣිස්සති ඝානායතනඤ්ච න නිරුජ්ඣති.

යස්ස ඝානායතනං න නිරුජ්ඣති තස්ස මනායතනං…පෙ… ධම්මායතනං න නිරුජ්ඣිස්සතීති?

සබ්බෙසං උපපජ්ජන්තානං අඝානකානං චවන්තානං තෙසං ඝානායතනං න නිරුජ්ඣති, නො ච තෙසං ධම්මායතනං න නිරුජ්ඣිස්සති. රූපාවචරෙ අරූපාවචරෙ පරිනිබ්බන්තානං තෙසං ඝානායතනඤ්ච න නිරුජ්ඣති ධම්මායතනඤ්ච න නිරුජ්ඣිස්සති.

යස්ස වා පන ධම්මායතනං න නිරුජ්ඣිස්සති තස්ස ඝානායතනං න නිරුජ්ඣතීති?

කාමාවචරෙ පරිනිබ්බන්තානං තෙසං ධම්මායතනං න නිරුජ්ඣිස්සති, නො ච තෙසං ඝානායතනං න නිරුජ්ඣති. රූපාවචරෙ අරූපාවචරෙ පරිනිබ්බන්තානං තෙසං ධම්මායතනඤ්ච න නිරුජ්ඣිස්සති ඝානායතනඤ්ච න නිරුජ්ඣති.

177. යස්ස රූපායතනං න නිරුජ්ඣති තස්ස මනායතනං…පෙ… ධම්මායතනං න නිරුජ්ඣිස්සතීති?

සබ්බෙසං උපපජ්ජන්තානං අරූපකානං චවන්තානං තෙසං රූපායතනං න නිරුජ්ඣති, නො ච තෙසං ධම්මායතනං න නිරුජ්ඣිස්සති. අරූපෙ පරිනිබ්බන්තානං තෙසං රූපායතනඤ්ච න නිරුජ්ඣති ධම්මායතනඤ්ච න නිරුජ්ඣිස්සති.

යස්ස වා පන ධම්මායතනං න නිරුජ්ඣිස්සති තස්ස රූපායතනං න නිරුජ්ඣතීති?

පඤ්චවොකාරෙ පරිනිබ්බන්තානං තෙසං ධම්මායතනං න නිරුජ්ඣිස්සති, නො ච තෙසං රූපායතනං න නිරුජ්ඣති. අරූපෙ පරිනිබ්බන්තානං තෙසං ධම්මායතනඤ්ච න නිරුජ්ඣිස්සති රූපායතනඤ්ච න නිරුජ්ඣති.

178. (ක) යස්ස මනායතනං න නිරුජ්ඣති තස්ස ධම්මායතනං න නිරුජ්ඣිස්සතීති? නිරුජ්ඣිස්සති.

(ඛ) යස්ස වා පන ධම්මායතනං න නිරුජ්ඣිස්සති තස්ස මනායතනං න නිරුජ්ඣතීති? නිරුජ්ඣති.

(ඞ) පච්චනීකඔකාසො

179. යත්ථ චක්ඛායතනං න නිරුජ්ඣති…පෙ….

(ච) පච්චනීකපුග්ගලොකාසා

180. (ක) යස්ස යත්ථ චක්ඛායතනං න නිරුජ්ඣති තස්ස තත්ථ සොතායතනං න නිරුජ්ඣිස්සතීති?

පඤ්චවොකාරං උපපජ්ජන්තානං අචක්ඛුකානං කාමාවචරා චවන්තානං තෙසං තත්ථ චක්ඛායතනං න නිරුජ්ඣති, නො ච තෙසං තත්ථ සොතායතනං න නිරුජ්ඣිස්සති. අසඤ්ඤසත්තානං අරූපානං තෙසං තත්ථ චක්ඛායතනඤ්ච න නිරුජ්ඣති සොතායතනඤ්ච න නිරුජ්ඣිස්සති.

(ඛ) යස්ස වා පන යත්ථ සොතායතනං න නිරුජ්ඣිස්සති තස්ස තත්ථ චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං තෙසං තත්ථ සොතායතනං න නිරුජ්ඣිස්සති, නො ච තෙසං තත්ථ චක්ඛායතනං න නිරුජ්ඣති. අසඤ්ඤසත්තානං අරූපානං තෙසං තත්ථ සොතායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

(ක) යස්ස යත්ථ චක්ඛායතනං න නිරුජ්ඣති තස්ස තත්ථ ඝානායතනං න නිරුජ්ඣිස්සතීති?

කාමාවචරං උපපජ්ජන්තානං අචක්ඛුකානං කාමාවචරා චවන්තානං තෙසං තත්ථ චක්ඛායතනං න නිරුජ්ඣති, නො ච තෙසං තත්ථ ඝානායතනං න නිරුජ්ඣිස්සති. රූපාවචරං උපපජ්ජන්තානං අසඤ්ඤසත්තානං අරූපානං තෙසං තත්ථ චක්ඛායතනඤ්ච න නිරුජ්ඣති ඝානායතනඤ්ච න නිරුජ්ඣිස්සති.

(ඛ) යස්ස වා පන යත්ථ ඝානායතනං න නිරුජ්ඣිස්සති තස්ස තත්ථ චක්ඛායතනං න නිරුජ්ඣතීති?

කාමාවචරෙ පරිනිබ්බන්තානං රූපාවචරා චවන්තානං තෙසං තත්ථ ඝානායතනං න නිරුජ්ඣිස්සති, නො ච තෙසං තත්ථ චක්ඛායතනං න නිරුජ්ඣති. රූපාවචරං උපපජ්ජන්තානං අසඤ්ඤසත්තානං අරූපානං තෙසං තත්ථ ඝානායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

(ක) යස්ස යත්ථ චක්ඛායතනං න නිරුජ්ඣති තස්ස තත්ථ රූපායතනං න නිරුජ්ඣිස්සතීති?

පඤ්චවොකාරං උපපජ්ජන්තානං අචක්ඛුකානං කාමාවචරා චවන්තානං අසඤ්ඤසත්තානං තෙසං තත්ථ චක්ඛායතනං න නිරුජ්ඣති, නො ච තෙසං තත්ථ රූපායතනං න නිරුජ්ඣිස්සති. අරූපානං තෙසං තත්ථ චක්ඛායතනඤ්ච න නිරුජ්ඣති රූපායතනඤ්ච න නිරුජ්ඣිස්සති.

(ඛ) යස්ස වා පන යත්ථ රූපායතනං න නිරුජ්ඣිස්සති තස්ස තත්ථ චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං තෙසං තත්ථ රූපායතනං න නිරුජ්ඣිස්සති, නො ච තෙසං තත්ථ චක්ඛායතනං න නිරුජ්ඣති. අරූපානං තෙසං තත්ථ රූපායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

(ක) යස්ස යත්ථ චක්ඛායතනං න නිරුජ්ඣති තස්ස තත්ථ මනායතනං න නිරුජ්ඣිස්සතීති?

පඤ්චවොකාරං උපපජ්ජන්තානං අචක්ඛුකානං කාමාවචරා චවන්තානං අරූපානං තෙසං තත්ථ චක්ඛායතනං න නිරුජ්ඣති, නො ච තෙසං තත්ථ මනායතනං න නිරුජ්ඣිස්සති. අරූපෙ පරිනිබ්බන්තානං අසඤ්ඤසත්තානං තෙසං තත්ථ චක්ඛායතනඤ්ච න නිරුජ්ඣති මනායතනඤ්ච න නිරුජ්ඣිස්සති.

(ඛ) යස්ස වා පන යත්ථ මනායතනං න නිරුජ්ඣිස්සති තස්ස තත්ථ චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං තෙසං තත්ථ මනායතනං න නිරුජ්ඣිස්සති, නො ච තෙසං තත්ථ චක්ඛායතනං න නිරුජ්ඣති. අරූපෙ පරිනිබ්බන්තානං අසඤ්ඤසත්තානං තෙසං තත්ථ මනායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති.

(ක) යස්ස යත්ථ චක්ඛායතනං න නිරුජ්ඣති තස්ස තත්ථ ධම්මායතනං න නිරුජ්ඣිස්සතීති?

සබ්බෙසං උපපජ්ජන්තානං අචක්ඛුකානං චවන්තානං තෙසං තත්ථ චක්ඛායතනං න නිරුජ්ඣති, නො ච තෙසං තත්ථ ධම්මායතනං න නිරුජ්ඣිස්සති. අරූපෙ පරිනිබ්බන්තානං තෙසං තත්ථ චක්ඛායතනඤ්ච න නිරුජ්ඣති ධම්මායතනඤ්ච න නිරුජ්ඣිස්සති.

(ඛ) යස්ස වා පන යත්ථ ධම්මායතනං න නිරුජ්ඣිස්සති තස්ස තත්ථ චක්ඛායතනං න නිරුජ්ඣතීති?

පඤ්චවොකාරෙ පරිනිබ්බන්තානං තෙසං තත්ථ ධම්මායතනං න නිරුජ්ඣිස්සති, නො ච තෙසං තත්ථ චක්ඛායතනං න නිරුජ්ඣති. අරූපෙ පරිනිබ්බන්තානං තෙසං තත්ථ ධම්මායතනඤ්ච න නිරුජ්ඣිස්සති චක්ඛායතනඤ්ච න නිරුජ්ඣති. (චක්ඛායතනමූලකං)

181. (ක) යස්ස යත්ථ ඝානායතනං න නිරුජ්ඣති තස්ස තත්ථ රූපායතනං න නිරුජ්ඣිස්සතීති?

කාමාවචරං උපපජ්ජන්තානං අඝානකානං කාමාවචරා චවන්තානං රූපාවචරානං තෙසං තත්ථ ඝානායතනං න නිරුජ්ඣති, නො ච තෙසං තත්ථ රූපායතනං න නිරුජ්ඣිස්සති. රූපාවචරෙ පරිනිබ්බන්තානං අරූපානං තෙසං තත්ථ ඝානායතනඤ්ච න නිරුජ්ඣති රූපායතනඤ්ච න නිරුජ්ඣිස්සති.

(ඛ) යස්ස වා පන යත්ථ රූපායතනං න නිරුජ්ඣිස්සති තස්ස තත්ථ ඝානායතනං න නිරුජ්ඣතීති?

කාමාවචරෙ පරිනිබ්බන්තානං තෙසං තත්ථ රූපායතනං න නිරුජ්ඣිස්සති, නො ච තෙසං තත්ථ ඝානායතනං න නිරුජ්ඣති. රූපාවචරෙ පරිනිබ්බන්තානං අරූපානං තෙසං තත්ථ රූපායතනඤ්ච න නිරුජ්ඣිස්සති ඝානායතනඤ්ච න නිරුජ්ඣති.

(ක) යස්ස යත්ථ ඝානායතනං න නිරුජ්ඣති තස්ස තත්ථ මනායතනං න නිරුජ්ඣිස්සතීති?

කාමාවචරං උපපජ්ජන්තානං අඝානකානං කාමාවචරා චවන්තානං රූපාවචරානං අරූපාවචරානං තෙසං තත්ථ ඝානායතනං න නිරුජ්ඣති, නො ච තෙසං තත්ථ මනායතනං න නිරුජ්ඣිස්සති. රූපාවචරෙ අරූපාවචරෙ පරිනිබ්බන්තානං අසඤ්ඤසත්තානං තෙසං තත්ථ ඝානායතනඤ්ච න නිරුජ්ඣති මනායතනඤ්ච න නිරුජ්ඣිස්සති.

(ඛ) යස්ස වා පන යත්ථ මනායතනං න නිරුජ්ඣිස්සති තස්ස තත්ථ ඝානායතනං න නිරුජ්ඣතීති?

කාමාවචරෙ පරිනිබ්බන්තානං තෙසං තත්ථ මනායතනං න නිරුජ්ඣිස්සති, නො ච තෙසං තත්ථ ඝානායතනං න නිරුජ්ඣති. රූපාවචරෙ අරූපාවචරෙ පරිනිබ්බන්තානං අසඤ්ඤසත්තානං තෙසං තත්ථ මනායතනඤ්ච න නිරුජ්ඣිස්සති ඝානායතනඤ්ච න නිරුජ්ඣති.

(ක) යස්ස යත්ථ ඝානායතනං න නිරුජ්ඣති තස්ස තත්ථ ධම්මායතනං න නිරුජ්ඣිස්සතීති?

සබ්බෙසං උපපජ්ජන්තානං අඝානකානං චවන්තානං තෙසං තත්ථ ඝානායතනං න නිරුජ්ඣති, නො ච තෙසං තත්ථ ධම්මායතනං න නිරුජ්ඣිස්සති. රූපාවචරෙ අරූපාවචරෙ පරිනිබ්බන්තානං තෙසං තත්ථ ඝානායතනඤ්ච න නිරුජ්ඣති ධම්මායතනඤ්ච න නිරුජ්ඣිස්සති.

(ඛ) යස්ස වා පන යත්ථ ධම්මායතනං න නිරුජ්ඣිස්සති තස්ස තත්ථ ඝානායතනං න නිරුජ්ඣතීති?

කාමාවචරෙ පරිනිබ්බන්තානං තෙසං තත්ථ ධම්මායතනං න නිරුජ්ඣිස්සති, නො ච තෙසං තත්ථ ඝානායතනං න නිරුජ්ඣති. රූපාවචරෙ අරූපාවචරෙ පරිනිබ්බන්තානං තෙසං තත්ථ ධම්මායතනඤ්ච න නිරුජ්ඣිස්සති ඝානායතනඤ්ච න නිරුජ්ඣති. (ඝානායතනමූලකං)

182. (ක) යස්ස යත්ථ රූපායතනං න නිරුජ්ඣති තස්ස තත්ථ මනායතනං න නිරුජ්ඣිස්සතීති?

පඤ්චවොකාරං උපපජ්ජන්තානං අරූපානං තෙසං තත්ථ රූපායතනං න නිරුජ්ඣති, නො ච තෙසං තත්ථ මනායතනං න නිරුජ්ඣිස්සති. අරූපෙ පරිනිබ්බන්තානං අසඤ්ඤසත්තං උපපජ්ජන්තානං තෙසං තත්ථ රූපායතනඤ්ච න නිරුජ්ඣති මනායතනඤ්ච න නිරුජ්ඣිස්සති.

(ඛ) යස්ස වා පන යත්ථ මනායතනං න නිරුජ්ඣිස්සති තස්ස තත්ථ රූපායතනං න නිරුජ්ඣතීති?

පඤ්චවොකාරෙ පරිනිබ්බන්තානං අසඤ්ඤසත්තා චවන්තානං තෙසං තත්ථ මනායතනං න නිරුජ්ඣිස්සති, නො ච තෙසං තත්ථ රූපායතනං න නිරුජ්ඣති. අරූපෙ පරිනිබ්බන්තානං අසඤ්ඤසත්තං උපපජ්ජන්තානං තෙසං තත්ථ මනායතනඤ්ච න නිරුජ්ඣිස්සති රූපායතනඤ්ච න නිරුජ්ඣති.

(ක) යස්ස යත්ථ රූපායතනං න නිරුජ්ඣති තස්ස තත්ථ ධම්මායතනං න නිරුජ්ඣිස්සතීති?

සබ්බෙසං උපපජ්ජන්තානං අරූපකානං චවන්තානං තෙසං තත්ථ රූපායතනං න නිරුජ්ඣති, නො ච තෙසං තත්ථ ධම්මායතනං න නිරුජ්ඣිස්සති. අරූපෙ පරිනිබ්බන්තානං තෙසං තත්ථ රූපායතනඤ්ච න නිරුජ්ඣති ධම්මායතනඤ්ච න නිරුජ්ඣිස්සති.

(ඛ) යස්ස වා පන යත්ථ ධම්මායතනං න නිරුජ්ඣිස්සති තස්ස තත්ථ රූපායතනං න නිරුජ්ඣතීති?

පඤ්චවොකාරෙ පරිනිබ්බන්තානං තෙසං තත්ථ ධම්මායතනං න නිරුජ්ඣිස්සති, නො ච තෙසං තත්ථ රූපායතනං න නිරුජ්ඣති. අරූපෙ පරිනිබ්බන්තානං තෙසං තත්ථ ධම්මායතනඤ්ච න නිරුජ්ඣිස්සති රූපායතනඤ්ච න නිරුජ්ඣති. (රූපායතනමූලකං)

183. (ක) යස්ස යත්ථ මනායතනං න නිරුජ්ඣති තස්ස තත්ථ ධම්මායතනං න නිරුජ්ඣිස්සතීති? නිරුජ්ඣිස්සති.

(ඛ) යස්ස වා පන යත්ථ ධම්මායතනං න නිරුජ්ඣිස්සති තස්ස තත්ථ මනායතනං න නිරුජ්ඣතීති? නිරුජ්ඣති.