(1) පච්චුප්පන්නවාරො

(ක) අනුලොමපුග්ගලො

153. (ක) යස්ස රූපක්ඛන්ධො උප්පජ්ජති තස්ස වෙදනාක්ඛන්ධො නිරුජ්ඣතීති? නො.

(ඛ) යස්ස වා පන වෙදනාක්ඛන්ධො නිරුජ්ඣති තස්ස රූපක්ඛන්ධො උප්පජ්ජතීති? නො.

154. (ක) යස්ස වෙදනාක්ඛන්ධො උප්පජ්ජති තස්ස සඤ්ඤාක්ඛන්ධො නිරුජ්ඣතීති? නො.

(ඛ) යස්ස වා පන සඤ්ඤාක්ඛන්ධො නිරුජ්ඣති තස්ස වෙදනාක්ඛන්ධො උප්පජ්ජතීති? නො.

(ඛ) අනුලොමඔකාසො

155. (ක) යත්ථ රූපක්ඛන්ධො උප්පජ්ජති තත්ථ වෙදනාක්ඛන්ධො නිරුජ්ඣතීති?

අසඤ්ඤසත්තෙ තත්ථ රූපක්ඛන්ධො උප්පජ්ජති, නො ච තත්ථ වෙදනාක්ඛන්ධො නිරුජ්ඣති. පඤ්චවොකාරෙ තත්ථ රූපක්ඛන්ධො ච උප්පජ්ජති වෙදනාක්ඛන්ධො ච නිරුජ්ඣති.

(ඛ) යත්ථ වා පන වෙදනාක්ඛන්ධො නිරුජ්ඣති තත්ථ රූපක්ඛන්ධො උප්පජ්ජතීති?

අරූපෙ තත්ථ වෙදනාක්ඛන්ධො නිරුජ්ඣති, නො ච තත්ථ රූපක්ඛන්ධො උප්පජ්ජති. පඤ්චවොකාරෙ තත්ථ වෙදනාක්ඛන්ධො ච නිරුජ්ඣති රූපක්ඛන්ධො ච උප්පජ්ජති.

156. (ක) යත්ථ වෙදනාක්ඛන්ධො උප්පජ්ජති තත්ථ සඤ්ඤාක්ඛන්ධො නිරුජ්ඣතීති? ආමන්තා.

(ඛ) යත්ථ වා පන සඤ්ඤාක්ඛන්ධො නිරුජ්ඣති තත්ථ වෙදනාක්ඛන්ධො උප්පජ්ජතීති? ආමන්තා.

(ග) අනුලොමපුග්ගලොකාසා

157. (ක) යස්ස යත්ථ රූපක්ඛන්ධො උප්පජ්ජති තස්ස තත්ථ වෙදනාක්ඛන්ධො නිරුජ්ඣතීති? නො.

(ඛ) යස්ස වා පන යත්ථ වෙදනාක්ඛන්ධො නිරුජ්ඣති තස්ස තත්ථ රූපක්ඛන්ධො උප්පජ්ජතීති? නො.

158. (ක) යස්ස යත්ථ වෙදනාක්ඛන්ධො උප්පජ්ජති තස්ස තත්ථ සඤ්ඤාක්ඛන්ධො නිරුජ්ඣතීති? නො.

(ඛ) යස්ස වා පන යත්ථ සඤ්ඤාක්ඛන්ධො නිරුජ්ඣති තස්ස තත්ථ වෙදනාක්ඛන්ධො උප්පජ්ජතීති? නො.

(ඝ) පච්චනීකපුග්ගලො

159. (ක) යස්ස රූපක්ඛන්ධො නුප්පජ්ජති තස්ස වෙදනාක්ඛන්ධො න නිරුජ්ඣතීති?

චතුවොකාරා පඤ්චවොකාරා චවන්තානං තෙසං රූපක්ඛන්ධො නුප්පජ්ජති, නො ච තෙසං වෙදනාක්ඛන්ධො න නිරුජ්ඣති. අරූපං උපපජ්ජන්තානං අසඤ්ඤසත්තා චවන්තානං තෙසං රූපක්ඛන්ධො ච නුප්පජ්ජති වෙදනාක්ඛන්ධො ච න නිරුජ්ඣති.

(ඛ) යස්ස වා පන වෙදනාක්ඛන්ධො න නිරුජ්ඣති තස්ස රූපක්ඛන්ධො නුප්පජ්ජතීති?

පඤ්චවොකාරං උපපජ්ජන්තානං අසඤ්ඤසත්තං උපපජ්ජන්තානං තෙසං වෙදනාක්ඛන්ධො න නිරුජ්ඣති, නො ච තෙසං රූපක්ඛන්ධො නුප්පජ්ජති. අරූපං උපපජ්ජන්තානං අසඤ්ඤසත්තා චවන්තානං තෙසං වෙදනාක්ඛන්ධො ච න නිරුජ්ඣති රූපක්ඛන්ධො ච නුප්පජ්ජති.

160. (ක) යස්ස වෙදනාක්ඛන්ධො නුප්පජ්ජති තස්ස සඤ්ඤාක්ඛන්ධො න නිරුජ්ඣතීති?

චතුවොකාරා පඤ්චවොකාරා චවන්තානං තෙසං වෙදනාක්ඛන්ධො නුප්පජ්ජති, නො ච තෙසං සඤ්ඤාක්ඛන්ධො න නිරුජ්ඣති. අසඤ්ඤසත්තානං තෙසං වෙදනාක්ඛන්ධො ච නුප්පජ්ජති සඤ්ඤාක්ඛන්ධො ච න නිරුජ්ඣති.

(ඛ) යස්ස වා පන සඤ්ඤාක්ඛන්ධො න නිරුජ්ඣති තස්ස වෙදනාක්ඛන්ධො නුප්පජ්ජතීති?

චතුවොකාරං පඤ්චවොකාරං උපපජ්ජන්තානං තෙසං සඤ්ඤාක්ඛන්ධො න නිරුජ්ඣති, නො ච තෙසං වෙදනාක්ඛන්ධො නුප්පජ්ජති. අසඤ්ඤසත්තානං තෙසං සඤ්ඤාක්ඛන්ධො ච න නිරුජ්ඣති වෙදනාක්ඛන්ධො ච නුප්පජ්ජති.

(ඞ) පච්චනීකඔකාසො

161. (ක) යත්ථ රූපක්ඛන්ධො නුප්පජ්ජති තත්ථ වෙදනාක්ඛන්ධො න නිරුජ්ඣතීති? නිරුජ්ඣති.

(ඛ) යත්ථ වා පන වෙදනාක්ඛන්ධො න නිරුජ්ඣති තත්ථ රූපක්ඛන්ධො නුප්පජ්ජතීති? උප්පජ්ජති.

162. (ක) යත්ථ වෙදනාක්ඛන්ධො නුප්පජ්ජති තත්ථ සඤ්ඤාක්ඛන්ධො න නිරුජ්ඣතීති? ආමන්තා.

(ඛ) යත්ථ වා පන සඤ්ඤාක්ඛන්ධො න නිරුජ්ඣති තත්ථ වෙදනාක්ඛන්ධො නුප්පජ්ජතීති? ආමන්තා.

(ච) පච්චනීකපුග්ගලොකාසා

163. (ක) යස්ස යත්ථ රූපක්ඛන්ධො නුප්පජ්ජති තස්ස තත්ථ වෙදනාක්ඛන්ධො න නිරුජ්ඣතීති?

චතුවොකාරා පඤ්චවොකාරා චවන්තානං තෙසං තත්ථ රූපක්ඛන්ධො නුප්පජ්ජති, නො ච තෙසං තත්ථ වෙදනාක්ඛන්ධො න නිරුජ්ඣති. අරූපං උපපජ්ජන්තානං අසඤ්ඤසත්තා චවන්තානං තෙසං තත්ථ රූපක්ඛන්ධො නුප්පජ්ජති වෙදනාක්ඛන්ධො ච න නිරුජ්ඣති.

(ඛ) යස්ස වා පන යත්ථ වෙදනාක්ඛන්ධො න නිරුජ්ඣති තස්ස තත්ථ රූපක්ඛන්ධො නුප්පජ්ජතීති?

පඤ්චවොකාරං උපපජ්ජන්තානං අසඤ්ඤසත්තං උපපජ්ජන්තානං තෙසං තත්ථ වෙදනාක්ඛන්ධො න නිරුජ්ඣති, නො ච තෙසං තත්ථ රූපක්ඛන්ධො නුප්පජ්ජති. අරූපං උපපජ්ජන්තානං අසඤ්ඤසත්තා චවන්තානං තෙසං තත්ථ වෙදනාක්ඛන්ධො ච න නිරුජ්ඣති රූපක්ඛන්ධො ච නුප්පජ්ජති.

164. (ක) යස්ස යත්ථ වෙදනාක්ඛන්ධො නුප්පජ්ජති තස්ස තත්ථ සඤ්ඤාක්ඛන්ධො න නිරුජ්ඣතීති?

චතුවොකාරා පඤ්චවොකාරා චවන්තානං තෙසං තත්ථ වෙදනාක්ඛන්ධො නුප්පජ්ජති, නො ච තෙසං තත්ථ සඤ්ඤාක්ඛන්ධො න නිරුජ්ඣති. අසඤ්ඤසත්තානං තෙසං තත්ථ වෙදනාක්ඛන්ධො ච නුප්පජ්ජති සඤ්ඤාක්ඛන්ධො ච න නිරුජ්ඣති.

(ඛ) යස්ස වා පන යත්ථ සඤ්ඤාක්ඛන්ධො න නිරුජ්ඣති තස්ස තත්ථ වෙදනාක්ඛන්ධො නුප්පජ්ජතීති?

චතුවොකාරං පඤ්චවොකාරං උපපජ්ජන්තානං තෙසං තත්ථ සඤ්ඤාක්ඛන්ධො න නිරුජ්ඣති, නො ච තෙසං තත්ථ වෙදනාක්ඛන්ධො නුප්පජ්ජති. අසඤ්ඤසත්තානං තෙසං තත්ථ සඤ්ඤාක්ඛන්ධො ච න නිරුජ්ඣති වෙදනාක්ඛන්ධො ච නුප්පජ්ජති.