(5) පච්චුප්පන්නානාගතවාරො

(ක) අනුලොමපුග්ගලො

133. (ක) යස්ස රූපක්ඛන්ධො නිරුජ්ඣති තස්ස වෙදනාක්ඛන්ධො නිරුජ්ඣිස්සතීති?

පඤ්චවොකාරෙ පරිනිබ්බන්තානං තෙසං රූපක්ඛන්ධො නිරුජ්ඣති, නො ච තෙසං වෙදනාක්ඛන්ධො නිරුජ්ඣිස්සති. ඉතරෙසං පඤ්චවොකාරා චවන්තානං අසඤ්ඤසත්තා චවන්තානං තෙසං රූපක්ඛන්ධො ච නිරුජ්ඣති වෙදනාක්ඛන්ධො ච නිරුජ්ඣිස්සති.

(ඛ) යස්ස වා පන වෙදනාක්ඛන්ධො නිරුජ්ඣිස්සති තස්ස රූපක්ඛන්ධො නිරුජ්ඣතීති?

සබ්බෙසං උපපජ්ජන්තානං අරූපා චවන්තානං තෙසං වෙදනාක්ඛන්ධො නිරුජ්ඣිස්සති, නො ච තෙසං රූපක්ඛන්ධො නිරුජ්ඣති. පඤ්චවොකාරා චවන්තානං අසඤ්ඤසත්තා චවන්තානං තෙසං වෙදනාක්ඛන්ධො ච නිරුජ්ඣිස්සති රූපක්ඛන්ධො ච නිරුජ්ඣති.

134. (ක) යස්ස වෙදනාක්ඛන්ධො නිරුජ්ඣති තස්ස සඤ්ඤාක්ඛන්ධො නිරුජ්ඣිස්සතීති?

පරිනිබ්බන්තානං තෙසං වෙදනාක්ඛන්ධො නිරුජ්ඣති, නො ච තෙසං සඤ්ඤාක්ඛන්ධො නිරුජ්ඣිස්සති. ඉතරෙසං චතුවොකාරා පඤ්චවොකාරා චවන්තානං තෙසං වෙදනාක්ඛන්ධො ච නිරුජ්ඣති සඤ්ඤාක්ඛන්ධො ච නිරුජ්ඣිස්සති.

(ඛ) යස්ස වා පන සඤ්ඤාක්ඛන්ධො නිරුජ්ඣිස්සති තස්ස වෙදනාක්ඛන්ධො නිරුජ්ඣතීති?

සබ්බෙසං උපපජ්ජන්තානං අසඤ්ඤසත්තා චවන්තානං තෙසං සඤ්ඤාක්ඛන්ධො නිරුජ්ඣිස්සති, නො ච තෙසං වෙදනාක්ඛන්ධො නිරුජ්ඣති. චතුවොකාරා පඤ්චවොකාරා චවන්තානං තෙසං සඤ්ඤාක්ඛන්ධො ච නිරුජ්ඣිස්සති වෙදනාක්ඛන්ධො නිරුජ්ඣති.

(ඛ) අනුලොමඔකාසො

135. යත්ථ රූපක්ඛන්ධො නිරුජ්ඣති…පෙ….

(ග) අනුලොමපුග්ගලොකාසා

136. (ක) යස්ස යත්ථ රූපක්ඛන්ධො නිරුජ්ඣති තස්ස තත්ථ වෙදනාක්ඛන්ධො නිරුජ්ඣිස්සතීති?

පඤ්චවොකාරෙ පරිනිබ්බන්තානං අසඤ්ඤසත්තා චවන්තානං තෙසං තත්ථ රූපක්ඛන්ධො නිරුජ්ඣති, නො ච තෙසං තත්ථ වෙදනාක්ඛන්ධො නිරුජ්ඣිස්සති. ඉතරෙසං පඤ්චවොකාරා චවන්තානං තෙසං තත්ථ රූපක්ඛන්ධො ච නිරුජ්ඣති වෙදනාක්ඛන්ධො ච නිරුජ්ඣිස්සති.

(ඛ) යස්ස වා පන යත්ථ වෙදනාක්ඛන්ධො නිරුජ්ඣිස්සති තස්ස තත්ථ රූපක්ඛන්ධො නිරුජ්ඣතීති?

පඤ්චවොකාරං උපපජ්ජන්තානං අරූපානං තෙසං තත්ථ වෙදනාක්ඛන්ධො නිරුජ්ඣිස්සති, නො ච තෙසං තත්ථ රූපක්ඛන්ධො නිරුජ්ඣති. පඤ්චවොකාරා චවන්තානං තෙසං තත්ථ වෙදනාක්ඛන්ධො ච නිරුජ්ඣිස්සති රූපක්ඛන්ධො ච නිරුජ්ඣති.

137. (ක) යස්ස යත්ථ වෙදනාක්ඛන්ධො නිරුජ්ඣති තස්ස තත්ථ සඤ්ඤාක්ඛන්ධො නිරුජ්ඣිස්සතීති?

පරිනිබ්බන්තානං තෙසං තත්ථ වෙදනාක්ඛන්ධො නිරුජ්ඣති, නො ච තෙසං තත්ථ සඤ්ඤාක්ඛන්ධො නිරුජ්ඣිස්සති. ඉතරෙසං චතුවොකාරා පඤ්චවොකාරා චවන්තානං තෙසං තත්ථ වෙදනාක්ඛන්ධො ච නිරුජ්ඣති සඤ්ඤාක්ඛන්ධො ච නිරුජ්ඣිස්සති.

(ඛ) යස්ස වා පන යත්ථ සඤ්ඤාක්ඛන්ධො නිරුජ්ඣිස්සති තස්ස තත්ථ වෙදනාක්ඛන්ධො නිරුජ්ඣතීති?

චතුවොකාරං පඤ්චවොකාරං උපපජ්ජන්තානං තෙසං තත්ථ සඤ්ඤාක්ඛන්ධො නිරුජ්ඣිස්සති, නො ච තෙසං තත්ථ වෙදනාක්ඛන්ධො නිරුජ්ඣති. චතුවොකාරා පඤ්චවොකාරා චවන්තානං තෙසං තත්ථ සඤ්ඤාක්ඛන්ධො ච නිරුජ්ඣිස්සති වෙදනාක්ඛන්ධො ච නිරුජ්ඣති.

(ඝ) පච්චනීකපුග්ගලො

138. (ක) යස්ස රූපක්ඛන්ධො න නිරුජ්ඣති තස්ස වෙදනාක්ඛන්ධො න නිරුජ්ඣිස්සතීති?

සබ්බෙසං උපපජ්ජන්තානං අරූපා චවන්තානං තෙසං රූපක්ඛන්ධො න නිරුජ්ඣති, නො ච තෙසං වෙදනාක්ඛන්ධො න නිරුජ්ඣිස්සති. අරූපෙ පරිනිබ්බන්තානං තෙසං රූපක්ඛන්ධො ච න නිරුජ්ඣති වෙදනාක්ඛන්ධො ච න නිරුජ්ඣිස්සති.

(ඛ) යස්ස වා පන වෙදනාක්ඛන්ධො න නිරුජ්ඣිස්සති තස්ස රූපක්ඛන්ධො න නිරුජ්ඣතීති?

පඤ්චවොකාරෙ පරිනිබ්බන්තානං තෙසං වෙදනාක්ඛන්ධො න නිරුජ්ඣිස්සති, නො ච තෙසං රූපක්ඛන්ධො න නිරුජ්ඣති. අරූපෙ පරිනිබ්බන්තානං තෙසං වෙදනාක්ඛන්ධො ච න නිරුජ්ඣිස්සති රූපක්ඛන්ධො ච න නිරුජ්ඣති.

139. (ක) යස්ස වෙදනාක්ඛන්ධො න නිරුජ්ඣති තස්ස සඤ්ඤාක්ඛන්ධො න නිරුජ්ඣිස්සතීති? නිරුජ්ඣිස්සති.

(ඛ) යස්ස වා පන සඤ්ඤාක්ඛන්ධො න නිරුජ්ඣිස්සති තස්ස වෙදනාක්ඛන්ධො න නිරුජ්ඣතීති? නිරුජ්ඣති.

(ඞ) පච්චනීකඔකාසො

140. යත්ථ රූපක්ඛන්ධො න නිරුජ්ඣති…පෙ….

(ච) පච්චනීකපුග්ගලොකාසා

141. (ක) යස්ස යත්ථ රූපක්ඛන්ධො න නිරුජ්ඣති තස්ස තත්ථ වෙදනාක්ඛන්ධො න නිරුජ්ඣිස්සතීති?

පඤ්චවොකාරං උපපජ්ජන්තානං අරූපානං තෙසං තත්ථ රූපක්ඛන්ධො න නිරුජ්ඣති, නො ච තෙසං තත්ථ වෙදනාක්ඛන්ධො න නිරුජ්ඣිස්සති. අරූපෙ පරිනිබ්බන්තානං අසඤ්ඤසත්තං උපපජ්ජන්තානං තෙසං තත්ථ රූපක්ඛන්ධො ච න නිරුජ්ඣති වෙදනාක්ඛන්ධො ච න නිරුජ්ඣිස්සති.

(ඛ) යස්ස වා පන යත්ථ වෙදනාක්ඛන්ධො න නිරුජ්ඣිස්සති තස්ස තත්ථ රූපක්ඛන්ධො න නිරුජ්ඣතීති?

පඤ්චවොකාරෙ පරිනිබ්බන්තානං අසඤ්ඤසත්තා චවන්තානං තෙසං තත්ථ වෙදනාක්ඛන්ධො න නිරුජ්ඣිස්සති, නො ච තෙසං තත්ථ රූපක්ඛන්ධො න නිරුජ්ඣති. අරූපෙ පරිනිබ්බන්තානං අසඤ්ඤසත්තං උපපජ්ජන්තානං තෙසං තත්ථ වෙදනාක්ඛන්ධො ච න නිරුජ්ඣිස්සති රූපක්ඛන්ධො ච න නිරුජ්ඣති.

142. (ක) යස්ස යත්ථ වෙදනාක්ඛන්ධො න නිරුජ්ඣති තස්ස තත්ථ සඤ්ඤාක්ඛන්ධො න නිරුජ්ඣිස්සතීති?

චතුවොකාරං පඤ්චවොකාරං උපපජ්ජන්තානං තෙසං තත්ථ වෙදනාක්ඛන්ධො න නිරුජ්ඣති, නො ච තෙසං තත්ථ සඤ්ඤාක්ඛන්ධො න නිරුජ්ඣිස්සති. අසඤ්ඤසත්තානං තෙසං තත්ථ වෙදනාක්ඛන්ධො ච න නිරුජ්ඣති සඤ්ඤාක්ඛන්ධො ච න නිරුජ්ඣිස්සති.

(ඛ) යස්ස වා පන යත්ථ සඤ්ඤාක්ඛන්ධො න නිරුජ්ඣිස්සති තස්ස තත්ථ වෙදනාක්ඛන්ධො න නිරුජ්ඣතීති?

පරිනිබ්බන්තානං තෙසං තත්ථ සඤ්ඤාක්ඛන්ධො න නිරුජ්ඣිස්සති, නො ච තෙසං තත්ථ වෙදනාක්ඛන්ධො න නිරුජ්ඣති. අසඤ්ඤසත්තානං තෙසං තත්ථ සඤ්ඤාක්ඛන්ධො ච න නිරුජ්ඣිස්සති වෙදනාක්ඛන්ධො ච න නිරුජ්ඣති.