(3) අනාගතවාරො

(ක) අනුලොමපුග්ගලො

116. (ක) යස්ස රූපක්ඛන්ධො නිරුජ්ඣිස්සති තස්ස වෙදනාක්ඛන්ධො නිරුජ්ඣිස්සතීති? ආමන්තා.

(ඛ) යස්ස වා පන වෙදනාක්ඛන්ධො නිරුජ්ඣිස්සති තස්ස රූපක්ඛන්ධො නිරුජ්ඣිස්සතීති?

පච්ඡිමභවිකානං අරූපං උපපජ්ජන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං වෙදනාක්ඛන්ධො නිරුජ්ඣිස්සති, නො ච තෙසං රූපක්ඛන්ධො නිරුජ්ඣිස්සති. ඉතරෙසං තෙසං වෙදනාක්ඛන්ධො ච නිරුජ්ඣිස්සති රූපක්ඛන්ධො ච නිරුජ්ඣිස්සති.

(ඛ) අනුලොමඔකාසො

117. (ක) යත්ථ රූපක්ඛන්ධො නිරුජ්ඣිස්සති තත්ථ වෙදනාක්ඛන්ධො නිරුජ්ඣිස්සතීති?

අසඤ්ඤසත්තෙ තත්ථ රූපක්ඛන්ධො නිරුජ්ඣිස්සති, නො ච තත්ථ වෙදනාක්ඛන්ධො නිරුජ්ඣිස්සති. පඤ්චවොකාරෙ තත්ථ රූපක්ඛන්ධො ච නිරුජ්ඣිස්සති වෙදනාක්ඛන්ධො ච නිරුජ්ඣිස්සති.

(ඛ) යත්ථ වා පන වෙදනාක්ඛන්ධො නිරුජ්ඣිස්සති තත්ථ රූපක්ඛන්ධො නිරුජ්ඣිස්සතීති?

අරූපෙ තත්ථ වෙදනාක්ඛන්ධො නිරුජ්ඣිස්සති, නො ච තත්ථ රූපක්ඛන්ධො නිරුජ්ඣිස්සති. පඤ්චවොකාරෙ තත්ථ වෙදනාක්ඛන්ධො ච නිරුජ්ඣිස්සති රූපක්ඛන්ධො ච නිරුජ්ඣිස්සති.

(ග) අනුලොමපුග්ගලොකාසා

118. (ක) යස්ස යත්ථ රූපක්ඛන්ධො නිරුජ්ඣිස්සති තස්ස තත්ථ වෙදනාක්ඛන්ධො නිරුජ්ඣිස්සතීති?

අසඤ්ඤසත්තානං තෙසං තත්ථ රූපක්ඛන්ධො නිරුජ්ඣිස්සති, නො ච තෙසං තත්ථ වෙදනාක්ඛන්ධො නිරුජ්ඣිස්සති. පඤ්චවොකාරානං තෙසං තත්ථ රූපක්ඛන්ධො ච නිරුජ්ඣිස්සති වෙදනාක්ඛන්ධො ච නිරුජ්ඣිස්සති.

(ඛ) යස්ස වා පන යත්ථ වෙදනාක්ඛන්ධො නිරුජ්ඣිස්සති තස්ස තත්ථ රූපක්ඛන්ධො නිරුජ්ඣිස්සතීති?

අරූපානං තෙසං තත්ථ වෙදනාක්ඛන්ධො නිරුජ්ඣිස්සති, නො ච තෙසං තත්ථ රූපක්ඛන්ධො නිරුජ්ඣිස්සති. පඤ්චවොකාරානං තෙසං තත්ථ වෙදනාක්ඛන්ධො ච නිරුජ්ඣිස්සති රූපක්ඛන්ධො ච නිරුජ්ඣිස්සති.

(ඝ) පච්චනීකපුග්ගලො

119. (ක) යස්ස රූපක්ඛන්ධො න නිරුජ්ඣිස්සති තස්ස වෙදනාක්ඛන්ධො න නිරුජ්ඣිස්සතීති?

පච්ඡිමභවිකානං අරූපං උපපජ්ජන්තානං යෙ ච අරූපං උපපජ්ජිත්වා පරිනිබ්බායිස්සන්ති තෙසං චවන්තානං තෙසං රූපක්ඛන්ධො න නිරුජ්ඣිස්සති, නො ච තෙසං වෙදනාක්ඛන්ධො න නිරුජ්ඣිස්සති. පරිනිබ්බන්තානං තෙසං රූපක්ඛන්ධො ච න නිරුජ්ඣිස්සති වෙදනාක්ඛන්ධො ච න නිරුජ්ඣිස්සති.

(ඛ) යස්ස වා පන වෙදනාක්ඛන්ධො න නිරුජ්ඣිස්සති තස්ස රූපක්ඛන්ධො න නිරුජ්ඣිස්සතීති? ආමන්තා.

(ඞ) පච්චනීකඔකාසො

120. (ක) යත්ථ රූපක්ඛන්ධො න නිරුජ්ඣිස්සති තත්ථ වෙදනාක්ඛන්ධො න නිරුජ්ඣිස්සතීති? නිරුජ්ඣිස්සති.

(ඛ) යත්ථ වා පන වෙදනාක්ඛන්ධො න නිරුජ්ඣිස්සති තත්ථ රූපක්ඛන්ධො න නිරුජ්ඣිස්සතීති? නිරුජ්ඣිස්සති.

(ච) පච්චනීකපුග්ගලොකාසා

121. (ක) යස්ස යත්ථ රූපක්ඛන්ධො න නිරුජ්ඣිස්සති තස්ස තත්ථ වෙදනාක්ඛන්ධො න නිරුජ්ඣිස්සතීති?

අරූපානං තෙසං තත්ථ රූපක්ඛන්ධො න නිරුජ්ඣිස්සති, නො ච තෙසං තත්ථ වෙදනාක්ඛන්ධො න නිරුජ්ඣිස්සති. පරිනිබ්බන්තානං තෙසං තත්ථ රූපක්ඛන්ධො ච න නිරුජ්ඣිස්සති වෙදනාක්ඛන්ධො ච න නිරුජ්ඣිස්සති.

(ඛ) යස්ස වා පන යත්ථ වෙදනාක්ඛන්ධො න නිරුජ්ඣිස්සති තස්ස තත්ථ රූපක්ඛන්ධො න නිරුජ්ඣිස්සතීති?

අසඤ්ඤසත්තානං තෙසං තත්ථ වෙදනාක්ඛන්ධො න නිරුජ්ඣිස්සති, නො ච තෙසං තත්ථ රූපක්ඛන්ධො න නිරුජ්ඣිස්සති. පරිනිබ්බන්තානං තෙසං තත්ථ වෙදනාක්ඛන්ධො ච න නිරුජ්ඣිස්සති රූපක්ඛන්ධො ච න නිරුජ්ඣිස්සති.