(5) පච්චුප්පන්නානාගතවාරො

(ක) අනුලොමපුග්ගලො

80. (ක) යස්ස රූපක්ඛන්ධො උප්පජ්ජති තස්ස වෙදනාක්ඛන්ධො උප්පජ්ජිස්සතීති?

පච්ඡිමභවිකානං පඤ්චවොකාරං උපපජ්ජන්තානං තෙසං රූපක්ඛන්ධො උප්පජ්ජති, නො ච තෙසං වෙදනාක්ඛන්ධො උප්පජ්ජිස්සති. ඉතරෙසං පඤ්චවොකාරං උපපජ්ජන්තානං අසඤ්ඤසත්තං උපපජ්ජන්තානං තෙසං රූපක්ඛන්ධො ච උප්පජ්ජති වෙදනාක්ඛන්ධො ච උප්පජ්ජිස්සති.

(ඛ) යස්ස වා පන වෙදනාක්ඛන්ධො උප්පජ්ජිස්සති තස්ස රූපක්ඛන්ධො උප්පජ්ජතීති?

සබ්බෙසං චවන්තානං අරූපං උපපජ්ජන්තානං තෙසං වෙදනාක්ඛන්ධො උප්පජ්ජිස්සති, නො ච තෙසං රූපක්ඛන්ධො උප්පජ්ජති. පඤ්චවොකාරං උපපජ්ජන්තානං අසඤ්ඤසත්තං උපපජ්ජන්තානං තෙසං වෙදනාක්ඛන්ධො ච උප්පජ්ජිස්සති රූපක්ඛන්ධො ච උප්පජ්ජති.

81. (ක) යස්ස වෙදනාක්ඛන්ධො උප්පජ්ජති තස්ස සඤ්ඤාක්ඛන්ධො උප්පජ්ජිස්සතීති?

පච්ඡිමභවිකානං උපපජ්ජන්තානං තෙසං වෙදනාක්ඛන්ධො උප්පජ්ජති, නො ච තෙසං සඤ්ඤාක්ඛන්ධො උප්පජ්ජිස්සති. ඉතරෙසං චතුවොකාරං පඤ්චවොකාරං උපපජ්ජන්තානං තෙසං වෙදනාක්ඛන්ධො ච උප්පජ්ජති සඤ්ඤාක්ඛන්ධො ච උප්පජ්ජිස්සති.

(ඛ) යස්ස වා පන සඤ්ඤාක්ඛන්ධො උප්පජ්ජිස්සති තස්ස වෙදනාක්ඛන්ධො උප්පජ්ජතීති?

සබ්බෙසං චවන්තානං අසඤ්ඤසත්තං උපපජ්ජන්තානං තෙසං සඤ්ඤාක්ඛන්ධො උප්පජ්ජිස්සති, නො ච තෙසං වෙදනාක්ඛන්ධො උප්පජ්ජති. චතුවොකාරං පඤ්චවොකාරං උපපජ්ජන්තානං තෙසං සඤ්ඤාක්ඛන්ධො ච උප්පජ්ජිස්සති වෙදනාක්ඛන්ධො ච උප්පජ්ජති.

(ඛ) අනුලොමඔකාසො

82. (ක) යත්ථ රූපක්ඛන්ධො උප්පජ්ජති තත්ථ වෙදනාක්ඛන්ධො උප්පජ්ජිස්සතීති?

අසඤ්ඤසත්තෙ තත්ථ රූපක්ඛන්ධො උප්පජ්ජති, නො ච තත්ථ වෙදනාක්ඛන්ධො උප්පජ්ජිස්සති. පඤ්චවොකාරෙ තත්ථ රූපක්ඛන්ධො ච උප්පජ්ජති වෙදනාක්ඛන්ධො ච උප්පජ්ජිස්සති.

(ඛ) යත්ථ වා පන වෙදනාක්ඛන්ධො උප්පජ්ජිස්සති තත්ථ රූපක්ඛන්ධො උප්පජ්ජතීති?

අරූපෙ තත්ථ වෙදනාක්ඛන්ධො උප්පජ්ජිස්සති, නො ච තත්ථ රූපක්ඛන්ධො උප්පජ්ජති. පඤ්චවොකාරෙ තත්ථ වෙදනාක්ඛන්ධො ච උප්පජ්ජිස්සති රූපක්ඛන්ධො ච උප්පජ්ජති.

83. (ක) යත්ථ වෙදනාක්ඛන්ධො උප්පජ්ජති තත්ථ සඤ්ඤාක්ඛන්ධො උප්පජ්ජිස්සතීති? ආමන්තා.

(ඛ) යත්ථ වා පන සඤ්ඤාක්ඛන්ධො උප්පජ්ජිස්සති තත්ථ වෙදනාක්ඛන්ධො උප්පජ්ජතීති? ආමන්තා.

(ග) අනුලොමපුග්ගලොකාසා

84. (ක) යස්ස යත්ථ රූපක්ඛන්ධො උප්පජ්ජති තස්ස තත්ථ වෙදනාක්ඛන්ධො උප්පජ්ජිස්සතීති?

පච්ඡිමභවිකානං පඤ්චවොකාරං උපපජ්ජන්තානං අසඤ්ඤසත්තං උපපජ්ජන්තානං තෙසං තත්ථ රූපක්ඛන්ධො උප්පජ්ජති, නො ච තෙසං තත්ථ වෙදනාක්ඛන්ධො උප්පජ්ජිස්සති. ඉතරෙසං පඤ්චවොකාරං උපපජ්ජන්තානං තෙසං තත්ථ රූපක්ඛන්ධො ච උප්පජ්ජති වෙදනාක්ඛන්ධො ච උප්පජ්ජිස්සති.

(ඛ) යස්ස වා පන යත්ථ වෙදනාක්ඛන්ධො උප්පජ්ජිස්සති තස්ස තත්ථ රූපක්ඛන්ධො උප්පජ්ජතීති?

පඤ්චවොකාරා චවන්තානං අරූපානං තෙසං තත්ථ වෙදනාක්ඛන්ධො උප්පජ්ජිස්සති, නො ච තෙසං තත්ථ රූපක්ඛන්ධො උප්පජ්ජති. පඤ්චවොකාරං උපපජ්ජන්තානං තෙසං තත්ථ වෙදනාක්ඛන්ධො ච උප්පජ්ජිස්සති රූපක්ඛන්ධො ච උප්පජ්ජති.

85. (ක) යස්ස යත්ථ වෙදනාක්ඛන්ධො උප්පජ්ජති තස්ස තත්ථ සඤ්ඤාක්ඛන්ධො උප්පජ්ජිස්සතීති?

පච්ඡිමභවිකානං උපපජ්ජන්තානං තෙසං තත්ථ වෙදනාක්ඛන්ධො උප්පජ්ජති, නො ච තෙසං තත්ථ සඤ්ඤාක්ඛන්ධො උප්පජ්ජිස්සති. ඉතරෙසං චතුවොකාරං පඤ්චවොකාරං උපපජ්ජන්තානං තෙසං තත්ථ වෙදනාක්ඛන්ධො ච උප්පජ්ජති සඤ්ඤාක්ඛන්ධො ච උප්පජ්ජිස්සති.

(ඛ) යස්ස වා පන යත්ථ සඤ්ඤාක්ඛන්ධො උප්පජ්ජිස්සති තස්ස තත්ථ වෙදනාක්ඛන්ධො උප්පජ්ජතීති?

චතුවොකාරා පඤ්චවොකාරා චවන්තානං තෙසං තත්ථ සඤ්ඤාක්ඛන්ධො උප්පජ්ජිස්සති, නො ච තෙසං තත්ථ වෙදනාක්ඛන්ධො උප්පජ්ජති. චතුවොකාරං පඤ්චවොකාරං උපපජ්ජන්තානං තෙසං තත්ථ සඤ්ඤාක්ඛන්ධො ච උප්පජ්ජිස්සති වෙදනාක්ඛන්ධො ච උප්පජ්ජති.

(ඝ) පච්චනීකපුග්ගලො

86. (ක) යස්ස රූපක්ඛන්ධො නුප්පජ්ජති තස්ස වෙදනාක්ඛන්ධො නුප්පජ්ජිස්සතීති?

සබ්බෙසං චවන්තානං අරූපං උපපජ්ජන්තානං තෙසං රූපක්ඛන්ධො නුප්පජ්ජති, නො ච තෙසං වෙදනාක්ඛන්ධො නුප්පජ්ජිස්සති. පඤ්චවොකාරෙ පරිනිබ්බන්තානං අරූපෙ පච්ඡිමභවිකානං තෙසං රූපක්ඛන්ධො ච නුප්පජ්ජති වෙදනාක්ඛන්ධො ච නුප්පජ්ජිස්සති.

(ඛ) යස්ස වා පන වෙදනාක්ඛන්ධො නුප්පජ්ජිස්සති තස්ස රූපක්ඛන්ධො නුප්පජ්ජතීති?

පච්ඡිමභවිකානං පඤ්චවොකාරං උපපජ්ජන්තානං තෙසං වෙදනාක්ඛන්ධො නුප්පජ්ජිස්සති, නො ච තෙසං රූපක්ඛන්ධො නුප්පජ්ජති. පඤ්චවොකාරෙ පරිනිබ්බන්තානං අරූපෙ පච්ඡිමභවිකානං තෙසං වෙදනාක්ඛන්ධො ච නුප්පජ්ජිස්සති රූපක්ඛන්ධො ච නුප්පජ්ජති.

87. (ක) යස්ස වෙදනාක්ඛන්ධො නුප්පජ්ජති තස්ස සඤ්ඤාක්ඛන්ධො නුප්පජ්ජිස්සතීති?

සබ්බෙසං චවන්තානං අසඤ්ඤසත්තං උපපජ්ජන්තානං තෙසං වෙදනාක්ඛන්ධො නුප්පජ්ජති, නො ච තෙසං සඤ්ඤාක්ඛන්ධො නුප්පජ්ජිස්සති. පරිනිබ්බන්තානං තෙසං වෙදනාක්ඛන්ධො ච නුප්පජ්ජති සඤ්ඤාක්ඛන්ධො ච නුප්පජ්ජිස්සති.

(ඛ) යස්ස වා පන සඤ්ඤාක්ඛන්ධො නුප්පජ්ජිස්සති තස්ස වෙදනාක්ඛන්ධො නුප්පජ්ජතීති?

පච්ඡිමභවිකානං උපපජ්ජන්තානං [පච්ඡිමභවිකානං පඤ්චවොකාරං උපපජ්ජන්තානං (සී. ස්‍යා.)] තෙසං සඤ්ඤාක්ඛන්ධො නුප්පජ්ජිස්සති, නො ච තෙසං වෙදනාක්ඛන්ධො නුප්පජ්ජති. පරිනිබ්බන්තානං තෙසං සඤ්ඤාක්ඛන්ධො ච නුප්පජ්ජිස්සති වෙදනාක්ඛන්ධො ච නුප්පජ්ජති.

(ඞ) පච්චනීකඔකාසො

88. (ක) යත්ථ රූපක්ඛන්ධො නුප්පජ්ජති තත්ථ වෙදනාක්ඛන්ධො නුප්පජ්ජිස්සතීති? උප්පජ්ජිස්සති.

(ඛ) යත්ථ වා පන වෙදනාක්ඛන්ධො නුප්පජ්ජිස්සති තත්ථ රූපක්ඛන්ධො නුප්පජ්ජතීති? උප්පජ්ජති.

89. (ක) යත්ථ වෙදනාක්ඛන්ධො නුප්පජ්ජති තත්ථ සඤ්ඤාක්ඛන්ධො නුප්පජ්ජිස්සතීති? ආමන්තා.

(ඛ) යත්ථ වා පන සඤ්ඤාක්ඛන්ධො නුප්පජ්ජිස්සති තත්ථ වෙදනාක්ඛන්ධො නුප්පජ්ජතීති? ආමන්තා.

(ච) පච්චනීකපුග්ගලොකාසා

90. (ක) යස්ස යත්ථ රූපක්ඛන්ධො නුප්පජ්ජති තස්ස තත්ථ වෙදනාක්ඛන්ධො නුප්පජ්ජිස්සතීති?

පඤ්චවොකාරා චවන්තානං අරූපානං තෙසං තත්ථ රූපක්ඛන්ධො නුප්පජ්ජති, නො ච තෙසං තත්ථ වෙදනාක්ඛන්ධො නුප්පජ්ජිස්සති. පඤ්චවොකාරෙ පරිනිබ්බන්තානං අරූපෙ පච්ඡිමභවිකානං අසඤ්ඤසත්තා චවන්තානං තෙසං තත්ථ රූපක්ඛන්ධො ච නුප්පජ්ජති වෙදනාක්ඛන්ධො ච නුප්පජ්ජිස්සති.

(ඛ) යස්ස වා පන යත්ථ වෙදනාක්ඛන්ධො නුප්පජ්ජිස්සති තස්ස තත්ථ රූපක්ඛන්ධො නුප්පජ්ජතීති?

පච්ඡිමභවිකානං පඤ්චවොකාරං උපපජ්ජන්තානං අසඤ්ඤසත්තං උපපජ්ජන්තානං තෙසං තත්ථ වෙදනාක්ඛන්ධො නුප්පජ්ජිස්සති, නො ච තෙසං තත්ථ රූපක්ඛන්ධො නුප්පජ්ජති. පඤ්චවොකාරෙ පරිනිබ්බන්තානං අරූපෙ පච්ඡිමභවිකානං අසඤ්ඤසත්තා චවන්තානං තෙසං තත්ථ වෙදනාක්ඛන්ධො ච නුප්පජ්ජිස්සති රූපක්ඛන්ධො ච නුප්පජ්ජති.

91. (ක) යස්ස යත්ථ වෙදනාක්ඛන්ධො නුප්පජ්ජති තස්ස තත්ථ සඤ්ඤාක්ඛන්ධො නුප්පජ්ජිස්සතීති?

චතුවොකාරා පඤ්චවොකාරා චවන්තානං තෙසං තත්ථ වෙදනාක්ඛන්ධො නුප්පජ්ජති, නො ච තෙසං තත්ථ සඤ්ඤාක්ඛන්ධො නුප්පජ්ජිස්සති. පරිනිබ්බන්තානං අසඤ්ඤසත්තානං තෙසං තත්ථ වෙදනාක්ඛන්ධො ච නුප්පජ්ජති සඤ්ඤාක්ඛන්ධො ච නුප්පජ්ජිස්සති.

(ඛ) යස්ස වා පන යත්ථ සඤ්ඤාක්ඛන්ධො නුප්පජ්ජිස්සති තස්ස තත්ථ වෙදනාක්ඛන්ධො නුප්පජ්ජතීති?

පච්ඡිමභවිකානං උපපජ්ජන්තානං තෙසං තත්ථ සඤ්ඤාක්ඛන්ධො නුප්පජ්ජිස්සති, නො ච තෙසං තත්ථ වෙදනාක්ඛන්ධො නුප්පජ්ජති. පරිනිබ්බන්තානං අසඤ්ඤසත්තානං තෙසං තත්ථ සඤ්ඤාක්ඛන්ධො ච නුප්පජ්ජිස්සති වෙදනාක්ඛන්ධො ච නුප්පජ්ජති.