(3) මූලකනයො

92. (ක) යෙ කෙචි නාමා ධම්මා, සබ්බෙ තෙ නාමමූලකාති?

අහෙතුකං නාමං න නාමමූලකං. සහෙතුකං නාමං නාමමූලකං.

(ඛ) යෙ වා පන නාමමූලකා, සබ්බෙ තෙ ධම්මා නාමාති?

නාමසමුට්ඨානං රූපං නාමමූලකං, න නාමං. නාමං නාමමූලකඤ්චෙව නාමඤ්ච.

93. (ක) යෙ කෙචි නාමා ධම්මා, සබ්බෙ තෙ නාමමූලෙන එකමූලකාති?

අහෙතුකං නාමං නාමමූලෙන න එකමූලකං. සහෙතුකං නාමං නාමමූලෙන එකමූලකං.

(ඛ) යෙ වා පන නාමමූලෙන එකමූලකා, සබ්බෙ තෙ ධම්මා නාමාති?

නාමසමුට්ඨානං රූපං නාමමූලෙන එකමූලකං, න නාමං. නාමං නාමමූලෙන එකමූලකඤ්චෙව නාමඤ්ච.

94. (ක) යෙ කෙචි නාමමූලෙන එකමූලකා ධම්මා, සබ්බෙ තෙ නාමමූලෙන අඤ්ඤමඤ්ඤමූලකාති?

මූලානි යානි එකතො උප්පජ්ජන්ති නාමමූලානි එකමූලකානි චෙව අඤ්ඤමඤ්ඤමූලකානි ච. අවසෙසා නාමමූලසහජාතා ධම්මා නාමමූලෙන එකමූලකා, න ච අඤ්ඤමඤ්ඤමූලකා.

(ඛ) යෙ වා පන නාමමූලෙන අඤ්ඤමඤ්ඤමූලකා, සබ්බෙ තෙ ධම්මා නාමාති? ආමන්තා.