2. දුකං

153. චත්තාරො ඛන්ධා න හෙතූ. සඞ්ඛාරක්ඛන්ධො සියා හෙතු, සියා න හෙතු. රූපක්ඛන්ධො අහෙතුකො. චත්තාරො ඛන්ධා සියා සහෙතුකා, සියා අහෙතුකා. රූපක්ඛන්ධො හෙතුවිප්පයුත්තො. චත්තාරො ඛන්ධා සියා හෙතුසම්පයුත්තා, සියා හෙතුවිප්පයුත්තා. රූපක්ඛන්ධො න වත්තබ්බො – ‘‘හෙතු චෙව සහෙතුකො චා’’තිපි, ‘‘සහෙතුකො චෙව න ච හෙතූ’’තිපි. තයො ඛන්ධා න වත්තබ්බා – ‘‘හෙතූ චෙව සහෙතුකා චා’’ති, සියා සහෙතුකා චෙව න ච හෙතූ, සියා න වත්තබ්බා – ‘‘සහෙතුකා චෙව න ච හෙතූ’’ති. සඞ්ඛාරක්ඛන්ධො සියා හෙතු චෙව සහෙතුකො ච, සියා සහෙතුකො චෙව න ච හෙතු, සියා න වත්තබ්බො – ‘‘හෙතු චෙව සහෙතුකො චා’’තිපි, ‘‘සහෙතුකො චෙව න ච හෙතූ’’තිපි. රූපක්ඛන්ධො න වත්තබ්බො – ‘‘හෙතු චෙව හෙතුසම්පයුත්තො චා’’තිපි, ‘‘හෙතුසම්පයුත්තො චෙව න ච හෙතූ’’තිපි. තයො ඛන්ධා න වත්තබ්බා – ‘‘හෙතූ චෙව හෙතුසම්පයුත්තා චා’’ති, සියා හෙතුසම්පයුත්තා චෙව න ච හෙතූ, සියා න වත්තබ්බා – ‘‘හෙතුසම්පයුත්තා චෙව න ච හෙතූ’’ති. සඞ්ඛාරක්ඛන්ධො සියා හෙතු චෙව හෙතුසම්පයුත්තො ච, සියා හෙතුසම්පයුත්තො චෙව න ච හෙතු, සියා න වත්තබ්බො – ‘‘හෙතු චෙව හෙතුසම්පයුත්තො චා’’තිපි, ‘‘හෙතුසම්පයුත්තො චෙව න ච හෙතූ’’තිපි. රූපක්ඛන්ධො න හෙතු අහෙතුකො. තයො ඛන්ධා සියා න හෙතූ සහෙතුකා, සියා න හෙතූ අහෙතුකා. සඞ්ඛාරක්ඛන්ධො සියා න හෙතු සහෙතුකො, සියා න හෙතු අහෙතුකො, සියා න වත්තබ්බො – ‘‘න හෙතු සහෙතුකො’’තිපි, ‘‘න හෙතු අහෙතුකො’’තිපි.

සප්පච්චයා, සඞ්ඛතා.

චත්තාරො ඛන්ධා අනිදස්සනා. රූපක්ඛන්ධො සියා සනිදස්සනො, සියා අනිදස්සනො. චත්තාරො ඛන්ධා අප්පටිඝා. රූපක්ඛන්ධො සියා සප්පටිඝො, සියා අප්පටිඝො. රූපක්ඛන්ධො රූපං. චත්තාරො ඛන්ධා අරූපා. රූපක්ඛන්ධො ලොකියො. චත්තාරො ඛන්ධා සියා ලොකියා, සියා ලොකුත්තරා; කෙනචි විඤ්ඤෙය්‍යා, කෙනචි න විඤ්ඤෙය්‍යා.

චත්තාරො ඛන්ධා නො ආසවා. සඞ්ඛාරක්ඛන්ධො සියා ආසවො, සියා නො ආසවො. රූපක්ඛන්ධො සාසවො. චත්තාරො ඛන්ධා සියා සාසවා, සියා අනාසවා. රූපක්ඛන්ධො ආසවවිප්පයුත්තො. චත්තාරො ඛන්ධා සියා ආසවසම්පයුත්තා, සියා ආසවවිප්පයුත්තා. රූපක්ඛන්ධො න වත්තබ්බො – ‘‘ආසවො චෙව සාසවො චා’’ති, සාසවො චෙව නො ච ආසවො. තයො ඛන්ධා න වත්තබ්බා – ‘‘ආසවා චෙව සාසවා චා’’ති, සියා සාසවා චෙව නො ච ආසවා, සියා න වත්තබ්බා – ‘‘සාසවා චෙව නො ච ආසවා’’ති. සඞ්ඛාරක්ඛන්ධො සියා ආසවො චෙව සාසවො ච, සියා සාසවො චෙව නො ච ආසවො, සියා න වත්තබ්බො – ‘‘ආසවො චෙව සාසවො චා’’තිපි, ‘‘සාසවො චෙව නො ච ආසවො’’තිපි. රූපක්ඛන්ධො න වත්තබ්බො – ‘‘ආසවො චෙව ආසවසම්පයුත්තො චා’’තිපි, ‘‘ආසවසම්පයුත්තො චෙව නො ච ආසවො’’තිපි. තයො ඛන්ධා න වත්තබ්බා – ‘‘ආසවා චෙව ආසවසම්පයුත්තා චා’’ති, සියා ආසවසම්පයුත්තා චෙව නො ච ආසවා, සියා න වත්තබ්බා – ‘‘ආසවසම්පයුත්තා චෙව නො ච ආසවා’’ති. සඞ්ඛාරක්ඛන්ධො සියා ආසවො චෙව ආසවසම්පයුත්තො ච, සියා ආසවසම්පයුත්තො චෙව නො ච ආසවො, සියා න වත්තබ්බො – ‘‘ආසවො චෙව ආසවසම්පයුත්තො චා’’තිපි, ‘‘ආසවසම්පයුත්තො චෙව නො ච ආසවො’’තිපි. රූපක්ඛන්ධො ආසවවිප්පයුත්තසාසවො. චත්තාරො ඛන්ධා සියා ආසවවිප්පයුත්තසාසවා, සියා ආසවවිප්පයුත්තඅනාසවා, සියා න වත්තබ්බා – ‘‘ආසවවිප්පයුත්තසාසවා’’තිපි, ‘‘ආසවවිප්පයුත්තඅනාසවා’’තිපි.

චත්තාරො ඛන්ධා නො සංයොජනා. සඞ්ඛාරක්ඛන්ධො සියා සංයොජනං, සියා නො සංයොජනං. රූපක්ඛන්ධො සංයොජනියො. චත්තාරො ඛන්ධා සියා සංයොජනියා, සියා අසංයොජනියා. රූපක්ඛන්ධො සංයොජනවිප්පයුත්තො. චත්තාරො ඛන්ධා සියා සංයොජනසම්පයුත්තා, සියා සංයොජනවිප්පයුත්තා. රූපක්ඛන්ධො න වත්තබ්බො – ‘‘සංයොජනඤ්චෙව සංයොජනියො චා’’ති, ‘‘සංයොජනියො චෙව නො ච සංයොජනං’’. තයො ඛන්ධා න වත්තබ්බා – ‘‘සංයොජනා චෙව සංයොජනියා චා’’ති, සියා සංයොජනියා චෙව නො ච සංයොජනා, සියා න වත්තබ්බා – ‘‘සංයොජනියා චෙව නො ච සංයොජනා’’ති. සඞ්ඛාරක්ඛන්ධො සියා සංයොජනඤ්චෙව සංයොජනියො ච, සියා සංයොජනියො චෙව නො ච සංයොජනං, සියා න වත්තබ්බො – ‘‘සංයොජනඤ්චෙව සංයොජනියො චා’’තිපි, ‘‘සංයොජනියො චෙව නො ච සංයොජන’’න්තිපි. රූපක්ඛන්ධො න වත්තබ්බො – ‘‘සංයොජනඤ්චෙව සංයොජනසම්පයුත්තො චා’’තිපි, ‘‘සංයොජනසම්පයුත්තො චෙව නො ච සංයොජන’’න්තිපි. තයො ඛන්ධා න වත්තබ්බා – ‘‘සංයොජනා චෙව සංයොජනසම්පයුත්තා චා’’ති, සියා සංයොජනසම්පයුත්තා චෙව නො ච සංයොජනා, සියා න වත්තබ්බා – ‘‘සංයොජනසම්පයුත්තා චෙව නො ච සංයොජනා’’ති. සඞ්ඛාරක්ඛන්ධො සියා සංයොජනඤ්චෙව සංයොජනසම්පයුත්තො ච, සියා සංයොජනසම්පයුත්තො චෙව නො ච සංයොජනං, සියා න වත්තබ්බො – ‘‘සංයොජනඤ්චෙව සංයොජනසම්පයුත්තො චා’’තිපි, ‘‘සංයොජනසම්පයුත්තො චෙව නො ච සංයොජන’’න්තිපි. රූපක්ඛන්ධො සංයොජනවිප්පයුත්තසංයොජනියො. චත්තාරො ඛන්ධා සියා සංයොජනවිප්පයුත්තසංයොජනියා, සියා සංයොජනවිප්පයුත්තඅසංයොජනියා, සියා න වත්තබ්බා – ‘‘සංයොජනවිප්පයුත්තසංයොජනියා’’තිපි, ‘‘සංයොජනවිප්පයුත්තඅසංයොජනියා’’තිපි.

චත්තාරො ඛන්ධා නො ගන්ථා. සඞ්ඛාරක්ඛන්ධො සියා ගන්ථො, සියා නො ගන්ථො. රූපක්ඛන්ධො ගන්ථනියො. චත්තාරො ඛන්ධා සියා ගන්ථනියා, සියා අගන්ථනියා. රූපක්ඛන්ධො ගන්ථවිප්පයුත්තො. චත්තාරො ඛන්ධා සියා ගන්ථසම්පයුත්තා, සියා ගන්ථවිප්පයුත්තා. රූපක්ඛන්ධො න වත්තබ්බො – ‘‘ගන්ථො චෙව ගන්ථනියො චා’’ති, ‘‘ගන්ථනියො චෙව නො ච ගන්ථො’’. තයො ඛන්ධා න වත්තබ්බා – ‘‘ගන්ථා චෙව ගන්ථනියා චා’’ති, සියා ගන්ථනියා චෙව නො ච ගන්ථා, සියා න වත්තබ්බා – ‘‘ගන්ථනියා චෙව නො ච ගන්ථා’’ති. සඞ්ඛාරක්ඛන්ධො සියා ගන්ථො චෙව ගන්ථනියො ච, සියා ගන්ථනියො චෙව නො ච ගන්ථො, සියා න වත්තබ්බො – ‘‘ගන්ථො චෙව ගන්ථනියො චා’’තිපි, ‘‘ගන්ථනියො චෙව නො ච ගන්ථො’’තිපි. රූපක්ඛන්ධො න වත්තබ්බො – ‘‘ගන්ථො චෙව ගන්ථසම්පයුත්තො චා’’තිපි, ‘‘ගන්ථසම්පයුත්තො චෙව නො ච ගන්ථො’’තිපි. තයො ඛන්ධා න වත්තබ්බා – ‘‘ගන්ථා චෙව ගන්ථසම්පයුත්තා චා’’ති, සියා ගන්ථසම්පයුත්තා චෙව නො ච ගන්ථා, සියා න වත්තබ්බා – ‘‘ගන්ථසම්පයුත්තා චෙව නො ච ගන්ථා’’ති. සඞ්ඛාරක්ඛන්ධො සියා ගන්ථො චෙව ගන්ථසම්පයුත්තො ච, සියා ගන්ථසම්පයුත්තො චෙව නො ච ගන්ථො, සියා න වත්තබ්බො – ‘‘ගන්ථො චෙව ගන්ථසම්පයුත්තො චා’’තිපි, ‘‘ගන්ථසම්පයුත්තො චෙව නො ච ගන්ථො’’ති පි. රූපක්ඛන්ධො ගන්ථවිප්පයුත්තගන්ථනියො. චත්තාරො ඛන්ධා සියා ගන්ථවිප්පයුත්තගන්ථනියා, සියා ගන්ථවිප්පයුත්තඅගන්ථනියා, සියා න වත්තබ්බා – ‘‘ගන්ථවිප්පයුත්තගන්ථනියා’’තිපි, ‘‘ගන්ථවිප්පයුත්තඅගන්ථනියා’’තිපි.

චත්තාරො ඛන්ධා නො ඔඝා…පෙ… නො යොගා…පෙ… නො නීවරණා. සඞ්ඛාරක්ඛන්ධො සියා නීවරණං, සියා නො නීවරණං. රූපක්ඛන්ධො නීවරණියො. චත්තාරො ඛන්ධා සියා නීවරණියා, සියා අනීවරණියා. රූපක්ඛන්ධො නීවරණවිප්පයුත්තො. චත්තාරො ඛන්ධා සියා නීවරණසම්පයුත්තා, සියා නීවරණවිප්පයුත්තා. රූපක්ඛන්ධො න වත්තබ්බො – ‘‘නීවරණඤ්චෙව නීවරණියො චා’’ති, ‘‘නීවරණියො චෙව නො ච නීවරණං’’. තයො ඛන්ධා න වත්තබ්බා – ‘‘නීවරණා චෙව නීවරණියා චා’’ති, සියා නීවරණියා චෙව නො ච නීවරණා, සියා න වත්තබ්බා – ‘‘නීවරණියා චෙව නො ච නීවරණා’’ති. සඞ්ඛාරක්ඛන්ධො සියා නීවරණඤ්චෙව නීවරණියො ච, සියා නීවරණියො චෙව නො ච නීවරණං, සියා න වත්තබ්බො – ‘‘නීවරණඤ්චෙව නීවරණියො චා’’තිපි, ‘‘නීවරණියො චෙව නො ච නීවරණ’’න්තිපි. රූපක්ඛන්ධො න වත්තබ්බො – ‘‘නීවරණඤ්චෙව නීවරණසම්පයුත්තො චා’’තිපි, ‘‘නීවරණසම්පයුත්තො චෙව නො ච නීවරණ’’න්තිපි. තයො ඛන්ධා න වත්තබ්බා – ‘‘නීවරණා චෙව නීවරණසම්පයුත්තා චා’’ති, සියා නීවරණසම්පයුත්තා චෙව නො ච නීවරණා, සියා න වත්තබ්බා – ‘‘නීවරණසම්පයුත්තා චෙව නො ච නීවරණා’’ති. සඞ්ඛාරක්ඛන්ධො සියා නීවරණඤ්චෙව නීවරණසම්පයුත්තො ච, සියා නීවරණසම්පයුත්තො චෙව නො ච නීවරණං, සියා න වත්තබ්බො – ‘‘නීවරණඤ්චෙව නීවරණසම්පයුත්තො චා’’තිපි, ‘‘නීවරණසම්පයුත්තො චෙව නො ච නීවරණ’’න්තිපි. රූපක්ඛන්ධො නීවරණවිප්පයුත්තනීවරණියො. චත්තාරො ඛන්ධා සියා නීවරණවිප්පයුත්තනීවරණියා, සියා නීවරණවිප්පයුත්තඅනීවරණියා, සියා න වත්තබ්බා – ‘‘නීවරණවිප්පයුත්තනීවරණියා’’තිපි, ‘‘නීවරණවිප්පයුත්තඅනීවරණියා’’තිපි.

චත්තාරො ඛන්ධා නො පරාමාසා. සඞ්ඛාරක්ඛන්ධො සියා පරාමාසො, සියා නො පරාමාසො. රූපක්ඛන්ධො පරාමට්ඨො. චත්තාරො ඛන්ධා සියා පරාමට්ඨා, සියා අපරාමට්ඨා. රූපක්ඛන්ධො පරාමාසවිප්පයුත්තො. තයො ඛන්ධා සියා පරාමාසසම්පයුත්තා, සියා පරාමාසවිප්පයුත්තා. සඞ්ඛාරක්ඛන්ධො සියා පරාමාසසම්පයුත්තො, සියා පරාමාසවිප්පයුත්තො, සියා න වත්තබ්බො – ‘‘පරාමාසසම්පයුත්තො’’තිපි, ‘‘පරාමාසවිප්පයුත්තො’’තිපි. රූපක්ඛන්ධො න වත්තබ්බො – ‘‘පරාමාසො චෙව පරාමට්ඨො චා’’ති, ‘‘පරාමට්ඨො චෙව නො ච පරාමාසො’’. තයො ඛන්ධා න වත්තබ්බා – ‘‘පරාමාසා චෙව පරාමට්ඨා චා’’ති, සියා පරාමට්ඨා චෙව නො ච පරාමාසා, සියා න වත්තබ්බා – ‘‘පරාමට්ඨා චෙව නො ච පරාමාසා’’ති. සඞ්ඛාරක්ඛන්ධො සියා පරාමාසො චෙව පරාමට්ඨො ච, සියා පරාමට්ඨො චෙව නො ච පරාමාසො, සියා න වත්තබ්බො – ‘‘පරාමාසො චෙව පරාමට්ඨො චා’’තිපි, ‘‘පරාමට්ඨො චෙව නො ච පරාමාසො’’තිපි. රූපක්ඛන්ධො පරාමාසවිප්පයුත්තපරාමට්ඨො. චත්තාරො ඛන්ධා සියා පරාමාසවිප්පයුත්තපරාමට්ඨා, සියා පරාමාසවිප්පයුත්තඅපරාමට්ඨා, සියා න වත්තබ්බා – ‘‘පරාමාසවිප්පයුත්තපරාමට්ඨා’’තිපි, ‘‘පරාමාසවිප්පයුත්තඅපරාමට්ඨා’’තිපි.

රූපක්ඛන්ධො අනාරම්මණො. චත්තාරො ඛන්ධා සාරම්මණා. විඤ්ඤාණක්ඛන්ධො චිත්තං. චත්තාරො ඛන්ධා නො චිත්තා. තයො ඛන්ධා චෙතසිකා. ද්වෙ ඛන්ධා අචෙතසිකා. තයො ඛන්ධා චිත්තසම්පයුත්තා. රූපක්ඛන්ධො චිත්තවිප්පයුත්තො. විඤ්ඤාණක්ඛන්ධො න වත්තබ්බො – ‘‘චිත්තෙන සම්පයුත්තො’’තිපි, ‘‘චිත්තෙන විප්පයුත්තො’’තිපි. තයො ඛන්ධා චිත්තසංසට්ඨා. රූපක්ඛන්ධො චිත්තවිසංසට්ඨො. විඤ්ඤාණක්ඛන්ධො න වත්තබ්බො – ‘‘චිත්තෙන සංසට්ඨො’’තිපි, ‘‘චිත්තෙන විසංසට්ඨො’’තිපි. තයො ඛන්ධා චිත්තසමුට්ඨානා. විඤ්ඤාණක්ඛන්ධො නො චිත්තසමුට්ඨානො. රූපක්ඛන්ධො සියා චිත්තසමුට්ඨානො, සියා නො චිත්තසමුට්ඨානො. තයො ඛන්ධා චිත්තසහභුනො. විඤ්ඤාණක්ඛන්ධො නො චිත්තසහභූ. රූපක්ඛන්ධො සියා චිත්තසහභූ, සියා නො චිත්තසහභූ. තයො ඛන්ධා චිත්තානුපරිවත්තිනො. විඤ්ඤාණක්ඛන්ධො නො චිත්තානුපරිවත්ති. රූපක්ඛන්ධො සියා චිත්තානුපරිවත්ති, සියා නො චිත්තානුපරිවත්ති. තයො ඛන්ධා චිත්තසංසට්ඨසමුට්ඨානා. ද්වෙ ඛන්ධා නො චිත්තසංසට්ඨසමුට්ඨානා. තයො ඛන්ධා චිත්තසංසට්ඨසමුට්ඨානසහභුනො. ද්වෙ ඛන්ධා නො චිත්තසංසට්ඨසමුට්ඨානසහභුනො. තයො ඛන්ධා චිත්තසංසට්ඨසමුට්ඨානානුපරිවත්තිනො. ද්වෙ ඛන්ධා නො චිත්තසංසට්ඨසමුට්ඨානානුපරිවත්තිනො.

විඤ්ඤාණක්ඛන්ධො අජ්ඣත්තිකො. තයො ඛන්ධා බාහිරා. රූපක්ඛන්ධො සියා අජ්ඣත්තිකො, සියා බාහිරො. චත්තාරො ඛන්ධා නො උපාදා. රූපක්ඛන්ධො සියා උපාදා, සියා නො උපාදා, සියා උපාදින්නා, සියා අනුපාදින්නා. චත්තාරො ඛන්ධා නො උපාදානා. සඞ්ඛාරක්ඛන්ධො සියා උපාදානං, සියා නො උපාදානං. රූපක්ඛන්ධො උපාදානියො. චත්තාරො ඛන්ධා සියා උපාදානියා, සියා අනුපාදානියා. රූපක්ඛන්ධො උපාදානවිප්පයුත්තො. චත්තාරො ඛන්ධා සියා උපාදානසම්පයුත්තා, සියා උපාදානවිප්පයුත්තා. රූපක්ඛන්ධො න වත්තබ්බො – ‘‘උපාදානඤ්චෙව උපාදානියො චා’’ති, ‘‘උපාදානියො චෙව නො ච උපාදානං’’. තයො ඛන්ධා න වත්තබ්බා – ‘‘උපාදානඤ්චෙව උපාදානියා චා’’ති, සියා උපාදානියා චෙව නො ච උපාදානා, සියා න වත්තබ්බා – ‘‘උපාදානියා චෙව නො ච උපාදානා’’ති. සඞ්ඛාරක්ඛන්ධො සියා උපාදානඤ්චෙව උපාදානියො ච, සියා උපාදානියො චෙව නො ච උපාදානං, සියා න වත්තබ්බො – ‘‘උපාදානඤ්චෙව උපාදානියො චා’’තිපි, ‘‘උපාදානියො චෙව නො ච උපාදාන’’න්තිපි. රූපක්ඛන්ධො න වත්තබ්බො – ‘‘උපාදානඤ්චෙව උපාදානසම්පයුත්තො චා’’තිපි, ‘‘උපාදානසම්පයුත්තො චෙව නො ච උපාදාන’’න්තිපි. තයො ඛන්ධා න වත්තබ්බා – ‘‘උපාදානා චෙව උපාදානසම්පයුත්තා චා’’ති, සියා උපාදානසම්පයුත්තා චෙව නො ච උපාදානා, සියා න වත්තබ්බා – ‘‘උපාදානසම්පයුත්තා චෙව නො ච උපාදානා’’ති. සඞ්ඛාරක්ඛන්ධො සියා උපාදානඤ්චෙව උපාදානසම්පයුත්තො ච, සියා උපාදානසම්පයුත්තො චෙව නො ච උපාදානං, සියා න වත්තබ්බො – ‘‘උපාදානඤ්චෙව උපාදානසම්පයුත්තො චා’’තිපි, ‘‘උපාදානසම්පයුත්තො චෙව නො ච උපාදාන’’න්තිපි. රූපක්ඛන්ධො උපාදානවිප්පයුත්තඋපාදානියො. චත්තාරො ඛන්ධා සියා උපාදානවිප්පයුත්තඋපාදානියා, සියා උපාදානවිප්පයුත්තඅනුපාදානියා, සියා න වත්තබ්බා – ‘‘උපාදානවිප්පයුත්තඋපාදානියා’’තිපි, ‘‘උපාදානවිප්පයුත්තඅනුපාදානියා’’තිපි.

චත්තාරො ඛන්ධා නො කිලෙසා. සඞ්ඛාරක්ඛන්ධො සියා කිලෙසො, සියා නො කිලෙසො. රූපක්ඛන්ධො සංකිලෙසිකො. චත්තාරො ඛන්ධා සියා සංකිලෙසිකා, සියා අසංකිලෙසිකා. රූපක්ඛන්ධො අසංකිලිට්ඨො. චත්තාරො ඛන්ධා සියා සංකිලිට්ඨා, සියා අසංකිලිට්ඨා. රූපක්ඛන්ධො කිලෙසවිප්පයුත්තො. චත්තාරො ඛන්ධා සියා කිලෙසසම්පයුත්තා, සියා කිලෙසවිප්පයුත්තා. රූපක්ඛන්ධො න වත්තබ්බො – ‘‘කිලෙසො චෙව සංකිලෙසිකො චා’’ති, ‘‘සංකිලෙසිකො චෙව නො ච කිලෙසො’’. තයො ඛන්ධා න වත්තබ්බා – ‘‘කිලෙසා චෙව සංකිලෙසිකා චා’’ති, සියා සංකිලෙසිකා චෙව නො ච කිලෙසා, සියා න වත්තබ්බා – ‘‘සංකිලෙසිකා චෙව නො ච කිලෙසා’’ති. සඞ්ඛාරක්ඛන්ධො සියා කිලෙසො චෙව සංකිලෙසිකො ච, සියා සංකිලෙසිකො චෙව නො ච කිලෙසො, සියා න වත්තබ්බො – ‘‘කිලෙසො චෙව සංකිලෙසිකො චා’’තිපි, ‘‘සංකිලෙසිකො චෙව නො ච කිලෙසො’’තිපි. රූපක්ඛන්ධො න වත්තබ්බො – ‘‘කිලෙසො චෙව සංකිලිට්ඨො චා’’තිපි, ‘‘සංකිලිට්ඨො චෙව නො ච කිලෙසො’’තිපි. තයො ඛන්ධා න වත්තබ්බා – ‘‘කිලෙසො චෙව සංකිලිට්ඨා චා’’ති, සියා සංකිලිට්ඨා චෙව නො ච කිලෙසා, සියා න වත්තබ්බා – ‘‘සංකිලිට්ඨා චෙව නො ච කිලෙසා’’ති. සඞ්ඛාරක්ඛන්ධො සියා කිලෙසො චෙව සංකිලිට්ඨො ච, සියා සංකිලිට්ඨො චෙව නො ච කිලෙසො, සියා න වත්තබ්බො – ‘‘කිලෙසො චෙව සංකිලිට්ඨො චා’’තිපි, ‘‘සංකිලිට්ඨො චෙව නො ච කිලෙසො’’තිපි.

රූපක්ඛන්ධො න වත්තබ්බො – ‘‘කිලෙසො චෙව කිලෙසසම්පයුත්තො චා’’තිපි, ‘‘කිලෙසසම්පයුත්තො චෙව නො ච කිලෙසො’’තිපි. තයො ඛන්ධා න වත්තබ්බා – ‘‘කිලෙසා චෙව කිලෙසසම්පයුත්තා චා’’ති, සියා කිලෙසසම්පයුත්තා චෙව නො ච කිලෙසා, සියා න වත්තබ්බා – කිලෙසසම්පයුත්තා චෙව නො ච කිලෙසා’’ති. සඞ්ඛාරක්ඛන්ධො සියා කිලෙසො චෙව කිලෙසසම්පයුත්තො ච, සියා කිලෙසසම්පයුත්තො චෙව නො ච කිලෙසො, සියා න වත්තබ්බො – ‘‘කිලෙසො චෙව කිලෙසසම්පයුත්තො චා’’තිපි, ‘‘කිලෙසසම්පයුත්තො චෙව නො ච කිලෙසො’’තිපි. රූපක්ඛන්ධො කිලෙසවිප්පයුත්තසංකිලෙසිකො. චත්තාරො ඛන්ධා සියා කිලෙසවිප්පයුත්තසංකිලෙසිකා, සියා කිලෙසවිප්පයුත්තඅසංකිලෙසිකා, සියා න වත්තබ්බා – ‘‘කිලෙසවිප්පයුත්තසංකිලෙසිකා’’තිපි, ‘‘කිලෙසවිප්පයුත්තඅසංකිලෙසිකා’’තිපි.

රූපක්ඛන්ධො න දස්සනෙන පහාතබ්බො. චත්තාරො ඛන්ධා සියා දස්සනෙන පහාතබ්බා, සියා න දස්සනෙන පහාතබ්බා. රූපක්ඛන්ධො න භාවනාය පහාතබ්බො. චත්තාරො ඛන්ධා සියා භාවනාය පහාතබ්බා, සියා න භාවනාය පහාතබ්බා. රූපක්ඛන්ධො න දස්සනෙන පහාතබ්බහෙතුකො. චත්තාරො ඛන්ධා සියා දස්සනෙන පහාතබ්බහෙතුකා, සියා න දස්සනෙන පහාතබ්බහෙතුකා. රූපක්ඛන්ධො න භාවනාය පහාතබ්බහෙතුකො. චත්තාරො ඛන්ධා සියා භාවනාය පහාතබ්බහෙතුකා, සියා න භාවනාය පහාතබ්බහෙතුකා. රූපක්ඛන්ධො අවිතක්කො. චත්තාරො ඛන්ධා සියා සවිතක්කා, සියා අවිතක්කා. රූපක්ඛන්ධො අවිචාරො. චත්තාරො ඛන්ධා සියා සවිචාරා, සියා අවිචාරා. රූපක්ඛන්ධො අප්පීතිකො, චත්තාරො ඛන්ධා සියා සප්පීතිකා, සියා අප්පීතිකා. රූපක්ඛන්ධො න පීතිසහගතො. චත්තාරො ඛන්ධා සියා පීතිසහගතා, සියා න පීතිසහගතා. ද්වෙ ඛන්ධා න සුඛසහගතා. තයො ඛන්ධා සියා සුඛසහගතා, සියා න සුඛසහගතා. ද්වෙ ඛන්ධා න උපෙක්ඛාසහගතා. තයො ඛන්ධා සියා උපෙක්ඛාසහගතා, සියා න උපෙක්ඛාසහගතා.

රූපක්ඛන්ධො කාමාවචරො. චත්තාරො ඛන්ධා සියා කාමාවචරා, සියා න කාමාවචරා. රූපක්ඛන්ධො න රූපාවචරො. චත්තාරො ඛන්ධා සියා රූපාවචරා, සියා න රූපාවචරා. රූපක්ඛන්ධො න අරූපාවචරො. චත්තාරො ඛන්ධා සියා අරූපාවචරා, සියා න අරූපාවචරා. රූපක්ඛන්ධො පරියාපන්නො. චත්තාරො ඛන්ධා සියා පරියාපන්නා, සියා අපරියාපන්නා. රූපක්ඛන්ධො අනිය්‍යානිකො. චත්තාරො ඛන්ධා සියා නිය්‍යානිකා, සියා අනිය්‍යානිකා. රූපක්ඛන්ධො අනියතො. චත්තාරො ඛන්ධා සියා නියතා, සියා අනියතා. රූපක්ඛන්ධො සඋත්තරො. චත්තාරො ඛන්ධා සියා සඋත්තරා, සියා අනුත්තරා. රූපක්ඛන්ධො අරණො. චත්තාරො ඛන්ධා සියා සරණා, සියා අරණාති.

පඤ්හාපුච්ඡකං.

ඛන්ධවිභඞ්ගො නිට්ඨිතො.