3. සඤ්ඤාක්ඛන්ධො

62. තත්ථ කතමො සඤ්ඤාක්ඛන්ධො? එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සහෙතුකො, අත්ථි අහෙතුකො.

තිවිධෙන සඤ්ඤාක්ඛන්ධො – අත්ථි කුසලො, අත්ථි අකුසලො, අත්ථි අබ්‍යාකතො.

චතුබ්බිධෙන සඤ්ඤාක්ඛන්ධො – අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො.

පඤ්චවිධෙන සඤ්ඤාක්ඛන්ධො – අත්ථි සුඛින්ද්‍රියසම්පයුත්තො, අත්ථි දුක්ඛින්ද්‍රියසම්පයුත්තො, අත්ථි සොමනස්සින්ද්‍රියසම්පයුත්තො, අත්ථි දොමනස්සින්ද්‍රියසම්පයුත්තො, අත්ථි උපෙක්ඛින්ද්‍රියසම්පයුත්තො. එවං පඤ්චවිධෙන සඤ්ඤාක්ඛන්ධො.

ඡබ්බිධෙන සඤ්ඤාක්ඛන්ධො – චක්ඛුසම්ඵස්සජා සඤ්ඤා, සොතසම්ඵස්සජා සඤ්ඤා, ඝානසම්ඵස්සජා සඤ්ඤා, ජිව්හාසම්ඵස්සජා සඤ්ඤා, කායසම්ඵස්සජා සඤ්ඤා, මනොසම්ඵස්සජා සඤ්ඤා. එවං ඡබ්බිධෙන සඤ්ඤාක්ඛන්ධො.

සත්තවිධෙන සඤ්ඤාක්ඛන්ධො – චක්ඛුසම්ඵස්සජා සඤ්ඤා, සොතසම්ඵස්සජා සඤ්ඤා, ඝානසම්ඵස්සජා සඤ්ඤා, ජිව්හාසම්ඵස්සජා සඤ්ඤා, කායසම්ඵස්සජා සඤ්ඤා, මනොධාතුසම්ඵස්සජා සඤ්ඤා, මනොවිඤ්ඤාණධාතුසම්ඵස්සජා සඤ්ඤා. එවං සත්තවිධෙන සඤ්ඤාක්ඛන්ධො.

අට්ඨවිධෙන සඤ්ඤාක්ඛන්ධො – චක්ඛුසම්ඵස්සජා සඤ්ඤා…පෙ… කායසම්ඵස්සජා සඤ්ඤා අත්ථි සුඛසහගතා, අත්ථි දුක්ඛසහගතා, මනොධාතුසම්ඵස්සජා සඤ්ඤා, මනොවිඤ්ඤාණධාතුසම්ඵස්සජා සඤ්ඤා. එවං අට්ඨවිධෙන සඤ්ඤාක්ඛන්ධො.

නවවිධෙන සඤ්ඤාක්ඛන්ධො – චක්ඛුසම්ඵස්සජා සඤ්ඤා…පෙ… කායසම්ඵස්සජා සඤ්ඤා, මනොධාතුසම්ඵස්සජා සඤ්ඤා, මනොවිඤ්ඤාණධාතුසම්ඵස්සජා සඤ්ඤා අත්ථි කුසලා, අත්ථි අකුසලා, අත්ථි අබ්‍යාකතා. එවං නවවිධෙන සඤ්ඤාක්ඛන්ධො.

දසවිධෙන සඤ්ඤාක්ඛන්ධො – චක්ඛුසම්ඵස්සජා සඤ්ඤා…පෙ… කායසම්ඵස්සජා සඤ්ඤා අත්ථි සුඛසහගතා, අත්ථි දුක්ඛසහගතා, මනොධාතුසම්ඵස්සජා සඤ්ඤා, මනොවිඤ්ඤාණධාතුසම්ඵස්සජා සඤ්ඤා අත්ථි කුසලා, අත්ථි අකුසලා, අත්ථි අබ්‍යාකතා. එවං දසවිධෙන සඤ්ඤාක්ඛන්ධො.

63. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සහෙතුකො, අත්ථි අහෙතුකො.

තිවිධෙන සඤ්ඤාක්ඛන්ධො – අත්ථි සුඛාය වෙදනාය සම්පයුත්තො, අත්ථි දුක්ඛාය වෙදනාය සම්පයුත්තො, අත්ථි අදුක්ඛමසුඛාය වෙදනාය සම්පයුත්තො…පෙ…. එවං දසවිධෙන සඤ්ඤාක්ඛන්ධො.

64. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සහෙතුකො, අත්ථි අහෙතුකො.

තිවිධෙන සඤ්ඤාක්ඛන්ධො – අත්ථි විපාකො, අත්ථි විපාකධම්මධම්මො, අත්ථි නෙවවිපාකනවිපාකධම්මධම්මො. අත්ථි උපාදින්නුපාදානියො, අත්ථි අනුපාදින්නුපාදානියො, අත්ථි අනුපාදින්නඅනුපාදානියො. අත්ථි සංකිලිට්ඨසංකිලෙසිකො, අත්ථි අසංකිලිට්ඨසංකිලෙසිකො, අත්ථි අසංකිලිට්ඨඅසංකිලෙසිකො. අත්ථි සවිතක්කසවිචාරො, අත්ථි අවිතක්කවිචාරමත්තො, අත්ථි අවිතක්කඅවිචාරො. අත්ථි පීතිසහගතො, අත්ථි සුඛසහගතො, අත්ථි උපෙක්ඛාසහගතො. අත්ථි දස්සනෙන පහාතබ්බො, අත්ථි භාවනාය පහාතබ්බො, අත්ථි නෙව දස්සනෙන න භාවනාය පහාතබ්බො. අත්ථි දස්සනෙන පහාතබ්බහෙතුකො, අත්ථි භාවනාය පහාතබ්බහෙතුකො, අත්ථි නෙව දස්සනෙන න භාවනාය පහාතබ්බහෙතුකො. අත්ථි ආචයගාමී, අත්ථි අපචයගාමී, අත්ථි නෙවාචයගාමිනාපචයගාමී. අත්ථි සෙක්ඛො, අත්ථි අසෙක්ඛො, අත්ථි නෙවසෙක්ඛනාසෙක්ඛො. අත්ථි පරිත්තො, අත්ථි මහග්ගතො, අත්ථි අප්පමාණො. අත්ථි පරිත්තාරම්මණො, අත්ථි මහග්ගතාරම්මණො, අත්ථි අප්පමාණාරම්මණො. අත්ථි හීනො, අත්ථි මජ්ඣිමො, අත්ථි පණීතො. අත්ථි මිච්ඡත්තනියතො, අත්ථි සම්මත්තනියතො, අත්ථි අනියතො. අත්ථි මග්ගාරම්මණො, අත්ථි මග්ගහෙතුකො, අත්ථි මග්ගාධිපති. අත්ථි උප්පන්නො, අත්ථි අනුප්පන්නො, අත්ථි උප්පාදී. අත්ථි අතීතො, අත්ථි අනාගතො, අත්ථි පච්චුප්පන්නො. අත්ථි අතීතාරම්මණො, අත්ථි අනාගතාරම්මණො, අත්ථි පච්චුප්පන්නාරම්මණො. අත්ථි අජ්ඣත්තො, අත්ථි බහිද්ධො, අත්ථි අජ්ඣත්තබහිද්ධො. අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො…පෙ… එවං දසවිධෙන සඤ්ඤාක්ඛන්ධො.

65. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි හෙතුසම්පයුත්තො, අත්ථි හෙතුවිප්පයුත්තො. අත්ථි න හෙතුසහෙතුකො, අත්ථි න හෙතුඅහෙතුකො. අත්ථි ලොකියො, අත්ථි ලොකුත්තරො. අත්ථි කෙනචි විඤ්ඤෙය්‍යො, අත්ථි කෙනචි න විඤ්ඤෙය්‍යො. අත්ථි සාසවො, අත්ථි අනාසවො. අත්ථි ආසවසම්පයුත්තො, අත්ථි ආසවවිප්පයුත්තො. අත්ථි ආසවවිප්පයුත්තසාසවො, අත්ථි ආසවවිප්පයුත්තඅනාසවො. අත්ථි සංයොජනියො, අත්ථි අසංයොජනියො. අත්ථි සංයොජනසම්පයුත්තො, අත්ථි සංයොජනවිප්පයුත්තො. අත්ථි සංයොජනවිප්පයුත්තසංයොජනියො, අත්ථි සංයොජනවිප්පයුත්තඅසංයොජනියො. අත්ථි ගන්ථනියො, අත්ථි අගන්ථනියො. අත්ථි ගන්ථසම්පයුත්තො, අත්ථි ගන්ථවිප්පයුත්තො. අත්ථි ගන්ථවිප්පයුත්තගන්ථනියො, අත්ථි ගන්ථවිප්පයුත්තඅගන්ථනියො. අත්ථි ඔඝනියො, අත්ථි අනොඝනියො. අත්ථි ඔඝසම්පයුත්තො, අත්ථි ඔඝවිප්පයුත්තො. අත්ථි ඔඝවිප්පයුත්තඔඝනියො, අත්ථි ඔඝවිප්පයුත්තඅනොඝනියො. අත්ථි යොගනියො, අත්ථි අයොගනියො. අත්ථි යොගසම්පයුත්තො, අත්ථි යොගවිප්පයුත්තො. අත්ථි යොගවිප්පයුත්තයොගනියො, අත්ථි යොගවිප්පයුත්තඅයොගනියො. අත්ථි නීවරණියො, අත්ථි අනීවරණියො. අත්ථි නීවරණසම්පයුත්තො, අත්ථි නීවරණවිප්පයුත්තො. අත්ථි නීවරණවිප්පයුත්තනීවරණියො, අත්ථි නීවරණවිප්පයුත්තඅනීවරණියො. අත්ථි පරාමට්ඨො, අත්ථි අපරාමට්ඨො. අත්ථි පරාමාසසම්පයුත්තො, අත්ථි පරාමාසවිප්පයුත්තො. අත්ථි පරාමාසවිප්පයුත්තපරාමට්ඨො, අත්ථි පරාමාසවිප්පයුත්තඅපරාමට්ඨො. අත්ථි උපාදින්නො, අත්ථි අනුපාදින්නො. අත්ථි උපාදානියො, අත්ථි අනුපාදානියො. අත්ථි උපාදානසම්පයුත්තො, අත්ථි උපාදානවිප්පයුත්තො. අත්ථි උපාදානවිප්පයුත්තඋපාදානියො, අත්ථි උපාදානවිප්පයුත්තඅනුපාදානියො. අත්ථි සංකිලෙසිකො, අත්ථි අසංකිලෙසිකො. අත්ථි සංකිලිට්ඨො, අත්ථි අසංකිලිට්ඨො. අත්ථි කිලෙසසම්පයුත්තො, අත්ථි කිලෙසවිප්පයුත්තො. අත්ථි කිලෙසවිප්පයුත්තසංකිලෙසිකො, අත්ථි කිලෙසවිප්පයුත්තඅසංකිලෙසිකො. අත්ථි දස්සනෙන පහාතබ්බො, අත්ථි න දස්සනෙන පහාතබ්බො. අත්ථි භාවනාය පහාතබ්බො, අත්ථි න භාවනාය පහාතබ්බො. අත්ථි දස්සනෙන පහාතබ්බහෙතුකො, අත්ථි න දස්සනෙන පහාතබ්බහෙතුකො. අත්ථි භාවනාය පහාතබ්බහෙතුකො, අත්ථි න භාවනාය පහාතබ්බහෙතුකො. අත්ථි සවිතක්කො, අත්ථි අවිතක්කො. අත්ථි සවිචාරො, අත්ථි අවිචාරො. අත්ථි සප්පීතිකො, අත්ථි අප්පීතිකො. අත්ථි පීතිසහගතො, අත්ථි න පීතිසහගතො. අත්ථි සුඛසහගතො, අත්ථි න සුඛසහගතො. අත්ථි උපෙක්ඛාසහගතො, අත්ථි න උපෙක්ඛාසහගතො. අත්ථි කාමාවචරො, අත්ථි න කාමාවචරො. අත්ථි රූපාවචරො, අත්ථි න රූපාවචරො. අත්ථි අරූපාවචරො, අත්ථි න අරූපාවචරො. අත්ථි පරියාපන්නො, අත්ථි අපරියාපන්නො. අත්ථි නිය්‍යානිකො, අත්ථි අනිය්‍යානිකො. අත්ථි නියතො, අත්ථි අනියතො. අත්ථි සඋත්තරො, අත්ථි අනුත්තරො. අත්ථි සරණො, අත්ථි අරණො.

තිවිධෙන සඤ්ඤාක්ඛන්ධො – අත්ථි කුසලො, අත්ථි අකුසලො, අත්ථි අබ්‍යාකතො…පෙ…. එවං දසවිධෙන සඤ්ඤාක්ඛන්ධො.

66. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සරණො, අත්ථි අරණො.

තිවිධෙන සඤ්ඤාක්ඛන්ධො – අත්ථි සුඛාය වෙදනාය සම්පයුත්තො, අත්ථි දුක්ඛාය වෙදනාය සම්පයුත්තො, අත්ථි අදුක්ඛමසුඛාය වෙදනාය සම්පයුත්තො. අත්ථි විපාකො…පෙ… අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො…පෙ…. එවං දසවිධෙන සඤ්ඤාක්ඛන්ධො.

(යථා කුසලත්තිකෙ විත්ථාරො, එවං සබ්බෙපි තිකා විත්ථාරෙතබ්බා.)

දුකමූලකං.

67. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සහෙතුකො, අත්ථි අහෙතුකො.

තිවිධෙන සඤ්ඤාක්ඛන්ධො – අත්ථි කුසලො, අත්ථි අකුසලො, අත්ථි අබ්‍යාකතො…පෙ…. එවං දසවිධෙන සඤ්ඤාක්ඛන්ධො.

68. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි හෙතුසම්පයුත්තො, අත්ථි හෙතුවිප්පයුත්තො…පෙ… අත්ථි සරණො, අත්ථි අරණො.

තිවිධෙන සඤ්ඤාක්ඛන්ධො – අත්ථි කුසලො, අත්ථි අකුසලො, අත්ථි අබ්‍යාකතො…පෙ…. එවං දසවිධෙන සඤ්ඤාක්ඛන්ධො.

69. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සහෙතුකො, අත්ථි අහෙතුකො.

තිවිධෙන සඤ්ඤාක්ඛන්ධො – අත්ථි සුඛාය වෙදනාය සම්පයුත්තො, අත්ථි දුක්ඛාය වෙදනාය සම්පයුත්තො, අත්ථි අදුක්ඛමසුඛාය වෙදනාය සම්පයුත්තො. අත්ථි විපාකො…පෙ… අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො…පෙ…. එවං දසවිධෙන සඤ්ඤාක්ඛන්ධො.

70. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි හෙතුසම්පයුත්තො, අත්ථි හෙතුවිප්පයුත්තො…පෙ… අත්ථි සරණො, අත්ථි අරණො.

තිවිධෙන සඤ්ඤාක්ඛන්ධො…පෙ… අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො…පෙ…. එවං දසවිධෙන සඤ්ඤාක්ඛන්ධො.

තිකමූලකං.

71. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සහෙතුකො, අත්ථි අහෙතුකො.

තිවිධෙන සඤ්ඤාක්ඛන්ධො – අත්ථි කුසලො, අත්ථි අකුසලො, අත්ථි අබ්‍යාකතො…පෙ…. එවං දසවිධෙන සඤ්ඤාක්ඛන්ධො.

72. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි හෙතුසම්පයුත්තො, අත්ථි හෙතුවිප්පයුත්තො.

තිවිධෙන සඤ්ඤාක්ඛන්ධො – අත්ථි සුඛාය වෙදනාය සම්පයුත්තො, අත්ථි දුක්ඛාය වෙදනාය සම්පයුත්තො, අත්ථි අදුක්ඛමසුඛාය වෙදනාය සම්පයුත්තො…පෙ…. එවං දසවිධෙන සඤ්ඤාක්ඛන්ධො.

73. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි න හෙතු සහෙතුකො, අත්ථි න හෙතු අහෙතුකො.

තිවිධෙන සඤ්ඤාක්ඛන්ධො – අත්ථි විපාකො, අත්ථි විපාකධම්මධම්මො, අත්ථි නෙවවිපාකනවිපාකධම්මධම්මො…පෙ…. එවං දසවිධෙන සඤ්ඤාක්ඛන්ධො.

74. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ලොකියො, අත්ථි ලොකුත්තරො.

තිවිධෙන සඤ්ඤාක්ඛන්ධො – අත්ථි උපාදින්නුපාදානියො, අත්ථි අනුපාදින්නුපාදානියො, අත්ථි අනුපාදින්නඅනුපාදානියො…පෙ…. එවං දසවිධෙන සඤ්ඤාක්ඛන්ධො.

75. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි කෙනචි විඤ්ඤෙය්‍යො, අත්ථි කෙනචි න විඤ්ඤෙය්‍යො.

තිවිධෙන සඤ්ඤාක්ඛන්ධො – අත්ථි සංකිලිට්ඨසංකිලෙසිකො, අත්ථි අසංකිලිට්ඨසංකිලෙසිකො, අත්ථි අසංකිලිට්ඨඅසංකිලෙසිකො…පෙ…. එවං දසවිධෙන සඤ්ඤාක්ඛන්ධො.

76. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සාසවො, අත්ථි අනාසවො.

තිවිධෙන සඤ්ඤාක්ඛන්ධො – අත්ථි සවිතක්කසවිචාරො, අත්ථි අවිතක්කවිචාරමත්තො, අත්ථි අවිතක්කඅවිචාරො…පෙ…. එවං දසවිධෙන සඤ්ඤාක්ඛන්ධො.

77. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ආසවසම්පයුත්තො, අත්ථි ආසවවිප්පයුත්තො.

තිවිධෙන සඤ්ඤාක්ඛන්ධො – අත්ථි පීතිසහගතො, අත්ථි සුඛසහගතො, අත්ථි උපෙක්ඛාසහගතො…පෙ…. එවං දසවිධෙන සඤ්ඤාක්ඛන්ධො.

78. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ආසවවිප්පයුත්තසාසවො, අත්ථි ආසවවිප්පයුත්තඅනාසවො.

තිවිධෙන සඤ්ඤාක්ඛන්ධො – අත්ථි දස්සනෙන පහාතබ්බො, අත්ථි භාවනාය පහාතබ්බො, අත්ථි නෙව දස්සනෙන න භාවනාය පහාතබ්බො…පෙ…. එවං දසවිධෙන සඤ්ඤාක්ඛන්ධො.

79. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සංයොජනියො, අත්ථි අසංයොජනියො.

තිවිධෙන සඤ්ඤාක්ඛන්ධො – අත්ථි දස්සනෙන පහාතබ්බහෙතුකො, අත්ථි භාවනාය පහාතබ්බහෙතුකො, අත්ථි නෙව දස්සනෙන න භාවනාය පහාතබ්බහෙතුකො…පෙ…. එවං දසවිධෙන සඤ්ඤාක්ඛන්ධො.

80. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සංයොජනසම්පයුත්තො, අත්ථි සංයොජනවිප්පයුත්තො.

තිවිධෙන සඤ්ඤාක්ඛන්ධො – අත්ථි ආචයගාමී, අත්ථි අපචයගාමී, අත්ථි නෙවාචයගාමිනාපචයගාමී…පෙ…. එවං දසවිධෙන සඤ්ඤාක්ඛන්ධො.

81. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි සංයොජනවිප්පයුත්තසංයොජනියො, අත්ථි සංයොජනවිප්පයුත්තඅසංයොජනියො.

තිවිධෙන සඤ්ඤාක්ඛන්ධො – අත්ථි සෙක්ඛො, අත්ථි අසෙක්ඛො, අත්ථි නෙවසෙක්ඛනාසෙක්ඛො…පෙ…. එවං දසවිධෙන සඤ්ඤාක්ඛන්ධො.

82. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ගන්ථනියො, අත්ථි අගන්ථනියො.

තිවිධෙන සඤ්ඤාක්ඛන්ධො – අත්ථි පරිත්තො, අත්ථි මහග්ගතො, අත්ථි අප්පමාණො…පෙ…. එවං දසවිධෙන සඤ්ඤාක්ඛන්ධො.

83. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ගන්ථසම්පයුත්තො, අත්ථි ගන්ථවිප්පයුත්තො.

තිවිධෙන සඤ්ඤාක්ඛන්ධො – අත්ථි පරිත්තාරම්මණො, අත්ථි මහග්ගතාරම්මණො, අත්ථි අප්පමාණාරම්මණො…පෙ…. එවං දසවිධෙන සඤ්ඤාක්ඛන්ධො.

84. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ගන්ථවිප්පයුත්තගන්ථනියො, අත්ථි ගන්ථවිප්පයුත්තඅගන්ථනියො.

තිවිධෙන සඤ්ඤාක්ඛන්ධො – අත්ථි හීනො, අත්ථි මජ්ඣිමො, අත්ථි පණීතො…පෙ…. එවං දසවිධෙන සඤ්ඤාක්ඛන්ධො.

85. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ඔඝනියො, අත්ථි අනොඝනියො.

තිවිධෙන සඤ්ඤාක්ඛන්ධො – අත්ථි මිච්ඡත්තනියතො, අත්ථි සම්මත්තනියතො, අත්ථි අනියතො…පෙ…. එවං දසවිධෙන සඤ්ඤාක්ඛන්ධො.

86. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ඔඝසම්පයුත්තො, අත්ථි ඔඝවිප්පයුත්තො.

තිවිධෙන සඤ්ඤාක්ඛන්ධො – අත්ථි මග්ගාරම්මණො, අත්ථි මග්ගහෙතුකො, අත්ථි මග්ගාධිපති…පෙ…. එවං දසවිධෙන සඤ්ඤාක්ඛන්ධො.

87. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි ඔඝවිප්පයුත්තඔඝනියො, අත්ථි ඔඝවිප්පයුත්තඅනොඝනියො.

තිවිධෙන සඤ්ඤාක්ඛන්ධො – අත්ථි උප්පන්නො, අත්ථි අනුප්පන්නො, අත්ථි උප්පාදී…පෙ…. එවං දසවිධෙන සඤ්ඤාක්ඛන්ධො.

88. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි යොගනියො, අත්ථි අයොගනියො.

තිවිධෙන සඤ්ඤාක්ඛන්ධො – අත්ථි අතීතො, අත්ථි අනාගතො, අත්ථි පච්චුප්පන්නො…පෙ…. එවං දසවිධෙන සඤ්ඤාක්ඛන්ධො.

89. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි යොගසම්පයුත්තො, අත්ථි යොගවිප්පයුත්තො.

තිවිධෙන සඤ්ඤාක්ඛන්ධො – අත්ථි අතීතාරම්මණො, අත්ථි අනාගතාරම්මණො, අත්ථි පච්චුප්පන්නාරම්මණො…පෙ…. එවං දසවිධෙන සඤ්ඤාක්ඛන්ධො.

90. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි යොගවිප්පයුත්තයොගනියො, අත්ථි යොගවිප්පයුත්තඅයොගනියො.

තිවිධෙන සඤ්ඤාක්ඛන්ධො – අත්ථි අජ්ඣත්තො, අත්ථි බහිද්ධො, අත්ථි අජ්ඣත්තබහිද්ධො…පෙ…. එවං දසවිධෙන සඤ්ඤාක්ඛන්ධො.

91. එකවිධෙන සඤ්ඤාක්ඛන්ධො – ඵස්සසම්පයුත්තො.

දුවිධෙන සඤ්ඤාක්ඛන්ධො – අත්ථි නීවරණියො, අත්ථි අනීවරණියො.

තිවිධෙන සඤ්ඤාක්ඛන්ධො – අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො…පෙ…. එවං දසවිධෙන සඤ්ඤාක්ඛන්ධො.

උභතොවඩ්ඪකං.

සත්තවිධෙන සඤ්ඤාක්ඛන්ධො – අත්ථි කුසලො, අත්ථි අකුසලො, අත්ථි අබ්‍යාකතො, අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො. එවං සත්තවිධෙන සඤ්ඤාක්ඛන්ධො.

අපරොපි සත්තවිධෙන සඤ්ඤාක්ඛන්ධො – අත්ථි සුඛාය වෙදනාය සම්පයුත්තො, අත්ථි දුක්ඛාය වෙදනාය සම්පයුත්තො, අත්ථි අදුක්ඛමසුඛාය වෙදනාය සම්පයුත්තො, අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො…පෙ… අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො, අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො. එවං සත්තවිධෙන සඤ්ඤාක්ඛන්ධො.

චතුවීසතිවිධෙන සඤ්ඤාක්ඛන්ධො – චක්ඛුසම්ඵස්සපච්චයා සඤ්ඤාක්ඛන්ධො අත්ථි කුසලො, අත්ථි අකුසලො, අත්ථි අබ්‍යාකතො; සොතසම්ඵස්සපච්චයා…පෙ… ඝානසම්ඵස්සපච්චයා…පෙ… ජිව්හාසම්ඵස්සපච්චයා…පෙ… කායසම්ඵස්සපච්චයා…පෙ… මනොසම්ඵස්සපච්චයා සඤ්ඤාක්ඛන්ධො අත්ථි කුසලො, අත්ථි අකුසලො, අත්ථි අබ්‍යාකතො; චක්ඛුසම්ඵස්සජා සඤ්ඤා, සොතසම්ඵස්සජා සඤ්ඤා, ඝානසම්ඵස්සජා සඤ්ඤා, ජිව්හාසම්ඵස්සජා සඤ්ඤා, කායසම්ඵස්සජා සඤ්ඤා, මනොසම්ඵස්සජා සඤ්ඤා. එවං චතුවීසතිවිධෙන සඤ්ඤාක්ඛන්ධො.

අපරොපි චතුවීසතිවිධෙන සඤ්ඤාක්ඛන්ධො – චක්ඛුසම්ඵස්සපච්චයා සඤ්ඤාක්ඛන්ධො අත්ථි සුඛාය වෙදනාය සම්පයුත්තො…පෙ… අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො, චක්ඛුසම්ඵස්සජා සඤ්ඤා…පෙ… මනොසම්ඵස්සජා සඤ්ඤා. සොතසම්ඵස්සපච්චයා…පෙ… ඝානසම්ඵස්සපච්චයා…පෙ… ජිව්හාසම්ඵස්සපච්චයා…පෙ… කායසම්ඵස්සපච්චයා…පෙ… මනොසම්ඵස්සපච්චයා සඤ්ඤාක්ඛන්ධො අත්ථි සුඛාය වෙදනාය සම්පයුත්තො…පෙ… අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො; චක්ඛුසම්ඵස්සජා සඤ්ඤා…පෙ… මනොසම්ඵස්සජා සඤ්ඤා. එවං චතුවීසතිවිධෙන සඤ්ඤාක්ඛන්ධො.

තිංසතිවිධෙන සඤ්ඤාක්ඛන්ධො – චක්ඛුසම්ඵස්සපච්චයා සඤ්ඤාක්ඛන්ධො අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො, සොතසම්ඵස්සපච්චයා…පෙ… ඝානසම්ඵස්සපච්චයා …පෙ… ජිව්හාසම්ඵස්සපච්චයා…පෙ… කායසම්ඵස්සපච්චයා…පෙ… මනොසම්ඵස්සපච්චයා සඤ්ඤාක්ඛන්ධො අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො, චක්ඛුසම්ඵස්සජා සඤ්ඤා…පෙ… මනොසම්ඵස්සජා සඤ්ඤා. එවං තිංසතිවිධෙන සඤ්ඤාක්ඛන්ධො.

බහුවිධෙන සඤ්ඤාක්ඛන්ධො – චක්ඛුසම්ඵස්සපච්චයා සඤ්ඤාක්ඛන්ධො අත්ථි කුසලො, අත්ථි අකුසලො, අත්ථි අබ්‍යාකතො, අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො, සොතසම්ඵස්සපච්චයා …පෙ… ඝානසම්ඵස්සපච්චයා…පෙ… ජිව්හාසම්ඵස්සපච්චයා…පෙ… කායසම්ඵස්සපච්චයා…පෙ… මනොසම්ඵස්සපච්චයා සඤ්ඤාක්ඛන්ධො අත්ථි කුසලො, අත්ථි අකුසලො, අත්ථි අබ්‍යාකතො, අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො, චක්ඛුසම්ඵස්සජා සඤ්ඤා…පෙ… මනොසම්ඵස්සජා සඤ්ඤා. එවං බහුවිධෙන සඤ්ඤාක්ඛන්ධො.

අපරොපි බහුවිධෙන සඤ්ඤාක්ඛන්ධො – චක්ඛුසම්ඵස්සපච්චයා සඤ්ඤාක්ඛන්ධො අත්ථි සුඛාය වෙදනාය සම්පයුත්තො…පෙ… අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො, අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො, සොතසම්ඵස්සපච්චයා…පෙ… ඝානසම්ඵස්සපච්චයා…පෙ… ජිව්හාසම්ඵස්සපච්චයා…පෙ… කායසම්ඵස්සපච්චයා…පෙ… මනොසම්ඵස්සපච්චයා සඤ්ඤාක්ඛන්ධො අත්ථි අජ්ඣත්තාරම්මණො, අත්ථි බහිද්ධාරම්මණො, අත්ථි අජ්ඣත්තබහිද්ධාරම්මණො, අත්ථි කාමාවචරො, අත්ථි රූපාවචරො, අත්ථි අරූපාවචරො, අත්ථි අපරියාපන්නො, චක්ඛුසම්ඵස්සජා සඤ්ඤා, සොතසම්ඵස්සජා සඤ්ඤා, ඝානසම්ඵස්සජා සඤ්ඤා, ජිව්හාසම්ඵස්සජා සඤ්ඤා, කායසම්ඵස්සජා සඤ්ඤා, මනොසම්ඵස්සජා සඤ්ඤා. එවං බහුවිධෙන සඤ්ඤාක්ඛන්ධො.

අයං වුච්චති සඤ්ඤාක්ඛන්ධො.